Yɛ January 2021 lɛ, Gbɛtsɔɔmɔ Kuu lɛ tswa adafi akɛ ajie wolo hee ko ni akɛbaafee Biblia mli nikasemɔ kpo, no ji, Oyi Aná Wala Kɛya Naanɔ! wolo lɛ. a Be ni onu nakai adafitswaa lɛ, te onu he ohã tɛŋŋ? Matthew, ni jɛ Canada lɛ wie akɛ: “Mimii shɛ mihe waa! Ni mimiishɛɛ lɛ da be ni ahãa wiemɔ lɛ, kɛ be ni ajieɔ vidioi ni gbalaa nɔ hewɔ ni afee wolo lɛ mli lɛ, kɛ bɔ ni aka ekɛ nitsumɔ akwɛ lɛ. Mishwe waa akɛ minine ashɛ eko nɔ koni mikɛbɔi nitsumɔ nɔŋŋ.”

 Oyi Aná Wala Kɛya Naanɔ! wolo lɛ tsɔɔ wɔ gbɛ hee ni wɔbaatsɔ nɔ wɔkɛ mɛi akase Biblia lɛ. Kɛ̃lɛ, jeee no pɛ ji srɔto ni yɔɔ wolo hee nɛɛ kɛ woji krokomɛi ni wɔkɛ mɛi ekase lɛ he. Kɛ́ okɛ Oyi Aná Wala Kɛya Naanɔ! wolo lɛ nɔ ni aprinti lɛ eko feɔ nikasemɔ lɛ, ekolɛ, oyɔse akɛ kɛ́ omɔ mli lɛ esoro bɔ ni eyɔɔ kwraa. Kɛ́ ootao ona nɔ hewɔ ni wɔkɛɔ nakai lɛ, hã wɔkwɛ bɔ ni afee wolo lɛ ahã kɛ nibii ni akɛfee.

 Wolo loo pepa ni ti. Mɛni hewɔ ehe bahia ni akɛ pepa ni ti afee Oyi Aná Wala Kɛya Naanɔ! wolo lɛ? Mfonirii fɛfɛji 600 kɛ sɛɛ yɔɔ Oyi Aná Wala Kɛya Naanɔ! wolo lɛ mli, efa fe mfonirii ni yɔɔ Wɔbaanyɛ Wɔkase wolo lɛ mli lɛ aafee toi nyɔŋma! Agbɛnɛ hu, gbɛ agboi kamɔ wolo hee nɛɛ niŋmai lɛ anaa yɛ baafai lɛ anɔ bɔ ni abaanyɛ aŋmala nii yɛ jɛmɛ. Nibii enyɔ nɛɛ kɛ naagba wulu ko ba, no ji: Kɛ́ pepa lɛ tiii lɛ, obaanyɛ ona mfonirii ni yɔɔ baafa ni oyɔɔ nɔ lɛ sɛɛ hu. Bɔ ni afee ni ekaba lɛ nakai lɛ, nyɛmimɛi ni tsuɔ nii yɛ International Printing Department (IPD) yɛ Wallkill, ni yɔɔ New York, yɛ U.S.A. lɛ, ka pepai srɔtoi ejwɛ ni asafo lɛ kɛkalaa wɔwoji yɛ woji akalamɔhe lɛ amɛkwɛ. Gbɛtsɔɔmɔ Kuu lɛ Niŋmaa Ajinafoi Akuu lɛ kwɛ pepai srɔtoi ni akɛkala lɛ fɛɛ, ni amɛhala pepa ni ti ni hãŋ ana mfonirii ni yɔɔ sɛɛ lɛ. Eyɛ mli akɛ pepa nɛɛ jara wa fe pepai ni wɔkɛfɔɔ wɔwoji lɛ akalamɔ lɛ moŋ, shi kɛ́ Biblia nikaselɔi lɛ miikane Oyi Aná Wala Kɛya Naanɔ! wolo lɛ mli saji lɛ, ehãaa amɛna mfonirii ni yɔɔ baafã ko sɛɛ lɛ, no hewɔ lɛ egbalaaa amɛjwɛŋmɔ yɛ nɔ ni amɛkaneɔ lɛ nɔ.

 Nɔ ni akɛha sɛɛ lɛ yɛ srɔto. Nɔ ni akɛha wolo nɛɛ sɛɛ lɛ yɛ srɔto yɛ nɔ ni wɔkɛhaa wɔwoji krokomɛi lɛ asɛɛ lɛ he, ejaakɛ akɛ nɔ ko ni esoro lɛ kwraa ni baabu wolo muu lɛ fɛɛ he lɛ ha sɛɛ. Nɔ najiaŋ ni akɛ nibii ni akɛhaa wɔwoji krokomɛi lɛ asɛɛ lɛ nɔŋŋ eko baaha sɛɛ lɛ, akɛ nɔ ni baahã mfonirii ni yɔɔ wolo lɛ sɛɛ lɛ afee fɛo waa, ni ana lɛ jogbaŋŋ lɛ hu ha sɛɛ. Nɔ ni akɛha sɛɛ lɛ hu buɔ wolo lɛ he koni kɛ́ akɛtsu nii shii abɔ po lɛ, ekatserɛ mra. Kɛ̃lɛ, nɔ ni akɛha sɛɛ nɛɛ jara wa toi enumɔ fe ekrokomɛi ni wɔkɛhaa wɔwoji krokomɛi lɛ asɛɛ lɛ. No hewɔ lɛ, bɔ ni afee ni ejara lɛ aba shi lɛ, nitsumɔhe niji srɔtoi fee ekome ni amɛhé.

 Mɛni hewɔ akɛ nibii ni jara wala nɛɛ fee wolo nɛɛ? Nyɛmi nuu ko ni tsuɔ nii yɛ IPD lɛ tsɔɔ mli akɛ: “Wɔmiikpa gbɛ akɛ, akɛ wolo nɛɛ baatsu nii waa, no hewɔ lɛ, wɔmiisumɔ ni ehi bɔ ni eyɔɔ lɛ, ekɔɔɔ he eko be abɔ ni akɛbaatsu nii loo shii abɔ ni mɔ ko kɛbaatsu nii lɛ.” Eduardo, ni tsuɔ nii yɛ Woji Akalamɔ Ɔfis ni yɔɔ Brazil nitsumɔhe nine lɛ wie akɛ: “Eŋɔɔ wɔnaa akɛ Yehowa asafo lɛ kɛ nibii kpakpai fee wolo fɛfɛo nɛɛ koni ekafite mra, ni ehiɛmɔ hu akawa; nakai beiaŋ nɔŋŋ lɛ, akɛ oniai lɛ tsu nii yɛ hiɛshikamɔ mli.”

 Wɔje Oyi Aná Wala Kɛya Naanɔ! wolo lɛ kalamɔ shishi yɛ March 2021. Be nɛɛ mli lɛ, COVID-19 tsɛŋemɔ hela lɛ yɛ, ni ekɛ naagbai srɔtoi ba. Akɛni no mli lɛ, Betel yɛ lockdown hewɔ lɛ, mɛi nyɛɛɛ ajɛ shĩa amɛbaye amɛbua yɛ woji akalamɔhe lɛ, ni anyɛɛɛ ahã mɛi hee hu abasɔmɔ yɛ Betel. Enɛ hewɔ lɛ, woji akalamɔhei komɛi náaa mɛi falɛ ni ataoɔ lɛ koni amɛbatsu nii yɛ jɛmɛ, ni aŋamɔ woji akalamɔhei komɛi hu yɛ amralo lɛ naatsĩi komɛi ahewɔ.

 Te afee tɛŋŋ aye naagbai nɛɛ anɔ? Be ni woji akalamɔhei lɛ bɔi nitsumɔ ekoŋŋ lɛ, ahã nyɛmimɛi ni tsuɔ nii yɛ Betel dipatmɛnt krokomɛi lɛ baye amɛbua yɛ jɛmɛ gbii fioo. Joel, ni tsuɔ nii yɛ IPD lɛ wie akɛ, “Hekɛafɔleshãa kɛ shwelɛ ni nyɛmimɛi ná akɛ amɛbaakase nibii hee lɛ ye ebua ni anyɛ atsu nitsumɔ lɛ.”

 Yɛ naagbai nɛɛ fɛɛ asɛɛ lɛ, wɔnyɛ wɔkala Oyi Aná Wala Kɛya Naanɔ! wolo lɛ akpekpei pii momo. Ebaabi ni aná wolo, iŋki, nɔ ni akɛbaaha sɛɛ, gluu, kɛ nibii krokomɛi dani anyɛ akala wolo lɛ. Yɛ klɛŋklɛŋ nyɔji enumɔ ni akɛkala wolo lɛ mli lɛ, akɛ Amɛrika dɔlai 2,300,000 kɛ sɛɛ hé ehe nibii lɛ pɛ. Bɔ ni afee ni wɔnyɛ wɔbaa shika yi lɛ, wɔkwɛ jogbaŋŋ koni wɔkala yibɔ pɛ ni he baahia asafoi lɛ.

 Te Biblia nikaselɔi kɛ amɛtsɔɔlɔi lɛ naa wolo hee kɛhã Biblia kasemɔ nɛɛ amɛhãa tɛŋŋ? Nyɛminuu Paul, ni jɛ Australia lɛ wie akɛ: “Oyi Aná Wala Kɛya Naanɔ! wolo lɛ kɛ nitsumɔ ŋɔɔ aahu akɛ, kɛ́ mikɛyaafee Biblia mli nikasemɔ lɛ mimii shɛɔ mihe waa. Bɔ ni afee wolo lɛ yɛ akɔnɔ ni ehãa anyɛɔ akɛ mɛi gbaa sane lɛɛlɛŋ. Abua saji ni shishinumɔ waaa, sanebimɔi ni tãa mɔ tsuiŋ, vidioi, mfonirii, akrabatsai, kɛ otii ni nikaselɔ lɛ kɛma ehiɛ, loo nɔ ni ebaanyɛ efee lɛ anaa yɛ wolo lɛ mli. Bɔ ni afee lɛ jogbaŋŋ lɛ hãa minitsɔɔmɔ lɛ yaa hiɛ be fɛɛ be.”

Mɔ ko ni akɛ lɛ kaseɔ Biblia lɛ yɛ United States lɛ wie akɛ:  “Misumɔɔ wolo hee nɛɛ waa. Mfonirii ni yɔɔ mli lɛ hãa minuɔ otii lɛ ashishi jogbaŋŋ. Vidioi lɛ taa mitsuiŋ, ni ewoɔ mi hewalɛ koni mikɛ nɔ ni mikaseɔ lɛ atsu nii.” Biblia nikaselɔ nɛɛ hãa akɛ lɛ kaseɔ nii shii enyɔ yɛ otsi lɛ mli, ni eyaa asafoŋ kpee daa.

 Ehe miihia ni akala Oyi Aná Wala Kɛya Naanɔ! wolo lɛ akpekpei abɔ lolo yɛ wiemɔi babaoo amli. Anɔkwa, kɛbashi bianɛ lɛ, Gbɛtsɔɔmɔ Kuu lɛ ekpɛlɛ akɛ akala wolo lɛ yɛ wiemɔi 710 mli, enɛ fa fe wiemɔi ni akala Wɔbaanyɛ Wɔkase wolo lɛ yɛ mli lɛ kɛ wiemɔi 340 sɔŋŋ!

 Nɛgbɛ wɔnáa shika ni akɛkalaa woji lɛ kɛjɛɔ? Wɔnáa shika lɛ kɛtsɔ oniai ni nyɛtsuɔ kɛfĩɔ jeŋ muu fɛɛ nitsumɔ lɛ sɛɛ lɛ nɔ, ni babaoo lɛ nyɛkɛtsɔɔ donate.pr418.com lɛ nɔ. Wɔhiɛ sɔɔ oniai ni nyɛjɛɔ nyɛtsuiiaŋ nyɛtsuɔ lɛ waa. Oniai nɛɛ yeɔ ebuaa wɔ ni wɔkalaa Biblia kasemɔ woji wɔhãa mɛi ni miisumɔ ni amɛkase Yehowa he nii koni ‘amɛhi shi kɛya naanɔ yɛ miishɛɛ mli’ lɛ.​—Lala 22:26.