Yɛ July 2022 nyɔɔŋ lɛ mli lɛ, atswara tui kɛye awui waa yɛ je lɛŋ hei srɔtoi, ni ehã mɛi ahe jɔ̃ amɛhe:

•   “Gbe ni agbe Japan maŋkwralɔ ko ni ehe gbɛ́i waa [ni ji Japan tsutsu maŋ onukpa Shinzo Abe] lɛ egba Japan maŋ lɛ naa waa, ni mɛi anaa kpɛ amɛhe waa yɛ je lɛŋ fɛɛ, titri lɛ akɛni ale Japan maŋ lɛ akɛ afɔɔɔ yiwalɛ nibii tamɔ nɛkɛ feemɔ yɛ jɛmɛ, ni maŋ lɛ ewo mla ni mli wa ni akɛkudɔɔ tuhiɛmɔ lɛ hewɔ.”​—July 10, 2022, The Japan Times.

•   “Denmark maŋbii lɛ anaa kpɛ amɛhe waa be ni nuu ko tswa mɛi etɛ tu kɛgbe amɛ yɛ shwapo wulu ko mli yɛ Copenhagen lɛ.”​—July 4, 2022, Reuters.

•   “South Africa: Mɛi 15 gboi be ni hii komɛi je gbɛ amɛtswara tui amɛwo mɛi ateŋ yɛ dãanumɔhe ko ni yɔɔ Soweto maŋ lɛ mli lɛ.”​—July 10, 2022, The Guardian.

•   “Atswara tui kɛgbe mɛi ni fa fe 220 yɛ U.S. yɛ otsi ni aye July 4 gbi jurɔ lɛ mli.”​—July 5, 2022, CBS News.

 Ani hiɛnɔkamɔ ko yɛ akɛ wɔsɛɛ lɛ, yiwalɛ nifeemɔi asɛɛ baafo? Mɛni Biblia lɛ kɛɔ yɛ he?

 Biblia lɛ tsɛɔ be ni wɔyɔɔ mli nɛɛ akɛ “naagbee gbii lɛ,” ni eji be ni mɛi baafee basabasa kɛ yiwalɛ nii gbeyeigbeyei. (2 Timoteo 3:1, 3) Yiwalɛ nifeemɔi nɛɛ ehã be fɛɛ be nɛɛ mɛi atsui kã amɛpampam. (Luka 21:11) Shi Biblia lɛ ewo shi akɛ etsɛŋ, yiwalɛ nifeemɔi baaba naagbee, ni mɛi “baahi he ko ni toiŋjɔlɛ babaoo yɔɔ, shihilɛhei ni oshãra ko bɛ jɛmɛ kɛ hei ni ajɔɔ he yɛ ni hãa mɛi atsui nyɔɔ amɛmli.” (Yesaia 32:18) Mɛni baahã yiwalɛ nifeemɔ sɛɛ afo?

 Nyɔŋmɔ baajie efɔŋfeelɔi kɛje shihilɛ mli, ni ebaakpata nibii fɛɛ ni akɛyeɔ awui lɛ hiɛ.

•   “Shi mɛi fɔji lɛ, abaafolɔ amɛ kɛbaaje shikpɔŋ lɛ nɔ.”​—Abɛi 2:22.

•   “[Nyɔŋmɔ baafo] tai asɛɛ yɛ shikpɔŋ lɛ nɔ fɛɛ. Ekuɔ gãi mli ni efolɔɔ akpɔlɔ mli; ekɛ la shãa ta shwiilii lɛ.”​—Lala 46:9.

 Nyɔŋmɔ baatsɔɔ mɛi ni amɛtiu toiŋjɔlɛ sɛɛ, ni kɛtsɔ no nɔ lɛ, yiwalɛ nifeemɔi asɛɛ baafo.

•   “Amɛyeŋ awui ko ni amɛfiteŋ nɔ ko yɛ migɔŋ krɔŋkrɔŋ lɛ nɔ fɛɛ, ejaakɛ bɔ fɛɛ bɔ ni fee lɛ, Yehowa he nilee baayi shikpɔŋ lɛ nɔ obɔ tamɔ bɔ ni nui eha ŋshɔ lɛ nɔ lɛ.”​—Yesaia 11:9.

•   Amrɔ nɛɛ po lɛ, Nyɔŋmɔ miitsɔɔ mɛi ni yɔɔ jeŋ fɛɛ lɛ ni amɛtsi amɛhe kɛje yiwalɛ nifeemɔi ahe ni amɛkɛ nibii ni akɛyeɔ awui akatsu nii, ni no baatsɔɔ akɛ ‘amɛtswia amɛtawuu klantei kɛfee tsina kɔii anaa dadei, ni amɛtswia amɛkpɔlɔi hu kɛfee kaklai ni akɛsaa tsei ahe.’​—Mika 4:3.

 Biblia lɛ ewo shi akɛ be ko baaba ni wɔsheŋ gbeyei akɛ abaaye wɔ awui. Kɛ́ ootao ole enɛ he saji krokomɛi lɛ, kanemɔ sane ni ji “Freedom From Fear​—Is It Possible?” lɛ.

 Kɛ́ ootao ole nɔ ni baahã yiwalɛ nifeemɔi asɛɛ afo kwraa lɛ he saji krokomɛi lɛ, kanemɔ sane ni ji “Peace on Earth at Last!” lɛ.