Yɛ January 27, 2023 lɛ, mɛi pii baaye gbi jurɔ krɛdɛɛ ko ni atsɛɔ lɛ International Holocaust Remembrance Day lɛ kɛkai mɛi babaoo ni Nazi nɔyeli lɛ kpãtã amɛhiɛ lɛ. Ekolɛ gbɔmɛi ni agbe kɛ yiwalɛ nifeemɔi ni yɔɔ gbeyei ni tee nɔ afii 75 kɛ sɛɛ nɛ lɛ baahã obi ohe akɛ, ‘Mɛni hewɔ Nyɔŋmɔ ŋmɛ gbɛ ni nakai yiwalɛ nifeemɔi ni yɔɔ gbeyei kɛ musuŋshaa lɛ ba?’

•   Kɛ́ ootao ole nɔ ni Biblia lɛ kɛɔ yɛ nifeemɔi ni tamɔ nɛkɛ lɛ he lɛ kanemɔ sane ni ji, “Why Did the Holocaust Happen? Why Didn’t God Stop It?” lɛ.

 Yudafoi ji mɛi titri ni na nɔ waa yɛ hiɛkpãtãmɔ ni ba nɛɛ mli. Aje gbɛ atsɔ ŋaa kɛkpãtã Yudafoi akpekpei abɔ komɛi ahiɛ. Awa kui krokomɛi hu ayi, ni agbe amɛteaŋ mɛi komɛi be ni hiɛkpãtãmɔ nɛɛ yaa nɔ lɛ mli. Mɛi nɛɛ ekomɛi ji Yehowa Odasefoi ni awa amɛ yi yɛ amɛhemɔkɛyelii ni damɔ Biblia lɛ nɔ lɛ hewɔ lɛ.

•   Kɛ́ ootao ole enɛ he saji krokomɛi lɛ kanemɔ sane ni ji, “What Happened to Jehovah’s Witnesses During the Time of the Holocaust?” lɛ.

 Mɛi pii miishe gbeyei akɛ bɔ ni akpãtã mɛi babaoo ahiɛ yɛ nakai beiaŋ lɛ baanyɛ aba ekoŋŋ. Miishɛɛ sane ji akɛ, Biblia lɛ ewo shi akɛ, wɔsɛɛ lɛ hiɛkpãtãmɔ loo awuiyeli ni tamɔ nɛkɛ baŋ dɔŋŋ.

•   “‘Ejaakɛ mi lɛ, mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa kɛɛ, ‘toiŋjɔlɛ jwɛŋmɔi ni, shi jeee sane fɔŋ, koni ahi ahã nyɛ wɔsɛɛ ni nyɛná hiɛnɔkamɔ.’”​—Yeremia 29:11. a

 Hiɛnɔkamɔ nɛɛ baaba mli be ni Yehowa Nyɔŋmɔ baatsu saji ahe nii kɛfo efɔŋfeemɔ sɛɛ, ni ejie nibii gbohii fɛɛ kɛje shihilɛ mli lɛ. Etsɛŋ kwraa:

•   Yehowa Nyɔŋmɔ baakpãtã mɛi fɔji fɛɛ ni yeɔ mɛi krokomɛi awui lɛ ahiɛ.​—Abɛi 2:22.

•   Ebaashɛje mɛi ni ena nɔ kɛ mɛi fɛɛ ni miipiŋ lɛ amii.​—Kpojiemɔ 21:4.

•   Ebaatee mɛi ni egboi lɛ shi kɛba wala mli yɛ shikpɔŋ lɛ nɔ.​—Yohane 5:28, 29.

 Obaanyɛ okɛ ohiɛ afɔ̃ hiɛnɔkamɔ ni shɛjeɔ mɔmii ni Biblia lɛ kɛhãa lɛ nɔ. Kɛ́ ootao ole nɔ hewɔ ni wɔkɛɔ nakai lɛ, ofainɛ kaa Biblia mli nikasemɔ ni wɔkɛ mɛi feɔ ni wɔheee shika lɛ okwɛ.