Yɛ May 19, 2022 lɛ, maji anɔ onukpai 75 kɛ sɛɛ bɔ United Nations Security Council (Jeŋmaji Ekomefeemɔ Shweshweeshwefeemɔ Gwabɔɔ) lɛ amaniɛ akɛ, “COVID-19 hela lɛ kɛ kɔɔyɔɔŋ tsakemɔ (climate change) lɛ hã niyenii ni he wa yɛ jeŋ fɛɛ momo lɛ mli wo wu. Shi agbɛnɛ ta ni miiya nɔ yɛ Ukraine lɛ ehã shihilɛ nɛɛ mli ewa fe tsutsu lɛ, ni ebaanyɛ ehã hɔmɔ aba jeŋ fɛɛ.” No sɛɛ etsɛɛɛ nɔŋŋ ni magazin ko ni ji The Economist lɛ wie akɛ, “Eyɛ mli akɛ naagbai babaoo miiya nɔ yɛ je nɛɛ mli momo moŋ, shi ta nɛɛ hewɔ lɛ, hɔmɔ baaye mɛi babaoo fe tsutsu lɛ.” Biblia lɛ egba efɔ̃ shi akɛ hɔmɔ ni tamɔ nɛkɛ baaba yɛ wɔbei nɛɛ amli, shi etsɔɔ wɔ bɔ ni wɔbaafee wɔkpee naa hu.

•    Yesu gba akɛ: “Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔmɔ . . . baaba.”​—Mateo 24:7.

•    Biblia mli wolo ni ji Kpojiemɔ lɛ wie mfonirifeemɔŋ okpɔŋɔnɔtaralɔi ejwɛ komɛi ahe. Okpɔŋɔnɔtaralɔi nɛɛ ateŋ mɔ kome damɔ shi kɛhã tai. Okpɔŋɔnɔtalɔ kroko ni nyiɛ esɛɛ lɛ damɔ shi kɛhã hɔmɔ, ni tsɔɔ akɛ be baashɛ ni ebaawa akɛ mɛi baaná niyenii, ni mɛi baahɔɔ niyenii lɛ jarawalɛ. Biblia lɛ kɛɛ akɛ, “Mina okpɔŋɔ diŋ ko, ni mɔ ni ta enɔ lɛ hiɛ nsɛnii ni ja yɛ edɛŋ. Minu nɔ ko ni tamɔ gbee ko . . . Ekɛɛ, ‘Wiiti susumɔnɔ kome lɛ, okɛ gbi muu fɛɛ nitsumɔ nyɔmɔwoo baahe! Barle susumɔnii etɛ lɛ, no hu okɛ gbi muu fɛɛ nitsumɔ nyɔmɔwoo baahe.”​—Kpojiemɔ 6:5, 6, Contemporary English Version.

 Biblia mli gbalɛ nɛɛ ni tsɔɔ akɛ hɔmɔ baaba lɛ miiba mli bianɛ, yɛ bei ni Biblia lɛ tsɛɔ lɛ akɛ “naagbee gbii lɛ” amli. (2 Timoteo 3:1) Kɛ́ ootao ole “naagbee gbii lɛ” kɛ okpɔŋɔnɔtaralɔi ejwɛ ni awie amɛhe yɛ Kpojiemɔ wolo lɛ mli lɛ ahe saji krokomɛi lɛ, kwɛmɔ vidio ni ji Je Lɛŋ Shihilɛ Etsake Kwraa Kɛjɛ Afi 1914 Kɛbaa lɛ, ni okane sane ni ji “Okpɔŋɔnɔtaralɔi Ejwɛ Lɛ​—Namɛi Ni?” lɛ hu.

•    Ŋaawoi kpakpai yɛ Biblia lɛ mli ni baanyɛ awa wɔ ni wɔkpee shihilɛi ni mli wawai ni wɔkɛkpeɔ lɛ anaa. Shihilɛi nɛɛ ekomɛi ji, niyenii ajara ni yaa nɔ ewaa, loo niyenii ni anáaa. Kanemɔ ŋaawoi nɛɛ ekomɛi yɛ sane ni ji “How to Live on Less” lɛ mli.

•    Biblia lɛ hãa wɔnáa hiɛnɔkamɔ hu akɛ wɔsɛɛ lɛ, nibii baahi. Ewo shi akɛ be ko baaba ni “shikpɔŋ lɛ nɔ baayi kɛ ŋmaa,” ni mɔ fɛɛ mɔ baaná niyenii babaoo eye. (Lala 72:16) Kɛ́ ootao ole hiɛnɔkamɔ ni Biblia kɛhãa yɛ wɔsɛɛ he, kɛ nɔ hewɔ ni wɔbaanyɛ wɔkɛ wɔhiɛ afɔ̃ nɔ lɛ he saji krokomɛi lɛ, kanemɔ sane ni ji, “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ” lɛ.