Yɛ October 9, 2024 lɛ, kuu ni ji World Wildlife Fund lɛ bɔ amaniɛ ko kɛtsɔ̃ɔ bɔ ni adesai anifeemɔi ekpãtã ŋa mli kooloi ahiɛ lɛ, ni enɛ yɛ musuŋshãa waa. Amaniɛbɔɔ lɛ tsɔɔ akɛ “kooloi abɔ ni yɔɔ afii 50 (1970-2020) ni eho lɛ amlijai ejwɛ mli ekome pɛ yɔɔ ŋmɛnɛ.” Amaniɛbɔɔ lɛ bɔ kɔkɔ akɛ: “Wɔbaanyɛ wɔwie kɛ nɔmimaa akɛ nibii ni baaya nɔ yɛ afii enumɔ ni kã wɔhiɛ lɛ mli lɛ baatsɔɔ kɛji nibii ni wala yɔɔ amɛmli lɛ baaya nɔ ahi Shikpɔŋ lɛ nɔ loo amɛhiɛ baakpãtã.”

 Kɛ́ mɛi nu amaniɛbɔi ni tamɔ nɛkɛ lɛ, amɛnaa kpɛɔ amɛhe waa. Wɔsumɔɔ wɔshikpɔŋ fɛfɛo nɛɛ waa, ni kɛ́ wɔna akɛ kooloi kɛ nibii ni wala yɔɔ amɛmli lɛ ahiɛ miikpãtã lɛ, edɔɔ wɔ waa. Wɔnuɔ he nakai, ejaakɛ Nyɔŋmɔ bɔ wɔ koni wɔkwɛ kooloi lɛ anɔ.​—1 Mose 1:27, 28; Abɛi 12:10.

 No hewɔ lɛ, ekolɛ obaabi ohe akɛ, ‘Ani wɔbaanyɛ wɔbu kooloi kɛ nibii ni wala yɔɔ amɛmli yɛ shikpɔŋ nɛɛ nɔ lɛ ahe? Mɛni Biblia lɛ kɛo yɛ he?’

 Ekɔɔɔ he eko bɔ ni wɔbaabɔ mɔdɛŋ kɛbaa kooloi ni yɔɔ shikpɔŋ nɛɛ nɔ lɛ ayi lɛ, Nyɔŋmɔ pɛ ji mɔ ni baanyɛ ebu amɛhe jogbaŋŋ kɛmɔ shi. Biblia lɛ gba yɛ Kpojiemɔ 11:18 lɛ akɛ, Nyɔŋmɔ ‘baafite mɛi ni fiteɔ shikpɔŋ lɛ.’ Nakai ŋmalɛ lɛ tsɔɔ wɔ nibii enyɔ komɛi:

1.  1. Nyɔŋmɔ hãŋ mɛi afite shikpɔŋ lɛ kwraa loo amɛkpãtã shikpɔŋ lɛ hiɛ.

2.  2. Etsɛŋ, Nyɔŋmɔ baatsu shihilɛ nɛɛ he nii. Mɛni hewɔ wɔwieɔ nakai? Ŋmɛnɛ lɛ, adesai anifeemɔi ehã kooloi kɛ nibii ni wala yɔɔ amɛmli yɛ shikpɔŋ lɛ nɔ lɛ awala eyaje oshãra mli fe bei fɛɛ ni eho..

 Mɛni Nyɔŋmɔ baafee kɛtsu naagba nɛɛ he nii? Ebaahã eŋwɛi nɔyeli lɛ, loo Maŋtsɛyeli lɛ, aye shikpɔŋ muu lɛ fɛɛ nɔ. (Mateo 6:10) Nakai nɔyeli lɛ baaye abua adesai ni boɔ Nyɔŋmɔ toi lɛ, ni ebaatsɔse amɛ bɔ ni baahã amɛnyɛ amɛbu shikpɔŋ nɛɛ nɔ kooloi kɛ nibii ni wala yɔɔ amɛmli lɛ ahe, ni amɛkwɛ nɔ jogbaŋŋ hu.​—Yesaia 11:9.