Taakɛ ta ni miiya nɔ yɛ Ukraine lɛ ehã wɔna lɛ, jamɔŋ hiɛnyiɛlɔi babaoo ni ji Kristofoi miiwo mɛi hewalɛ koni amɛkɛ amɛhe awo ta lɛ mli. Kadimɔ saji ni tsɔɔ akɛ osɔfoi komɛi miifi mɛi ni wuɔ ta lɛ afã ko sɛɛ, ni osɔfoi komɛi hu miifi afã kroko sɛɛ:

•   “Wɔkɛ woo kpele miihã wɔtabilɔi fɛɛ ni miiwu amɛmiishi mɛi ni ebatutua wɔmaŋ Ukraine lɛ, ni wɔhiɛ sɔɔ amɛ waa . . . Wɔtsui kɛ nyɛ yɛ, wɔsɔleɔ wɔhãa nyɛ, ni wɔfiɔ nyɛsɛɛ be fɛɛ be.”​—Epiphanius I, ni ji Kyiv maŋ osɔfonukpa lɛ ji mɔ ni wie enɛ, ni abɔ he amaniɛ yɛ The Jerusalem Post, March 16, 2022 nɔ lɛ mli.

•   “Russia Ɔtodɔks Sɔlemɔ lɛ osɔfonukpa lɛ to jamɔŋ gwabɔɔ krɛdɛɛ ko he gbɛjianɔ kɛhã Russia asraafoi lɛ. Yɛ gwabɔɔ nɛɛ shishi lɛ, ewo asraafoi lɛ hewalɛ koni amɛfã amɛmaŋ lɛ he yɛ ta ni Russia kã he ewuɔ yɛ Ukraine lɛ mli, bɔ ni Russiabii pɛ baanyɛ afee.”​—Reuters, April 3, 2022.

 Ani esa akɛ Kristofoi kɛ amɛhe awo ta mli? Mɛni Biblia lɛ kɛɔ yɛ he?

 Biblia lɛ tsɔɔ akɛ, mɛi ni ji Yesu Kristo sɛɛnyiɛlɔi diɛŋtsɛ lɛ kɛ amɛhe wooo ta mli.

•   “Okɛ oklante lɛ awo etoohe, ejaakɛ mɛi fɛɛ ni gbalaa klante lɛ, klante naa amɛbaagbo yɛ.”​—Mateo 26:52.

   Kɛ́ mɔ ko fiɔ tawuu sɛɛ, ewoɔ mli hewalɛ, loo eyaa ta lɛ, ani eeye Yesu wiemɔi nɛɛ anɔ?

•   “Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.”​—Yohane 13:34, 35.

   Kɛ́ mɔ ko fiɔ tawuu sɛɛ, loo efiɔ afã ko sɛɛ yɛ tawuu mli lɛ, ani eejie suɔmɔ ni Yesu tsɔɔ akɛ akɛbaale ekaselɔi loo esɛɛnyiɛlɔi lɛ kpo?

 Kɛ́ ootao ole enɛ he saji krokomɛi lɛ, kanemɔ sane ni ji “Is War Compatible With Christianity?” lɛ.

 Ani ŋmɛnɛ lɛ, Kristofoi baanyɛ atsi amɛhe kɛje tawuu he? Hɛɛ. Biblia lɛ gba akɛ, yɛ wɔbei nɛɛ amli, ni ji “naagbee gbii lɛ amli lɛ” abaaná mɛi ni jɛ majimaji fɛɛ amli ni “amɛkaseŋ tawuu hu dɔŋŋ,” ni enɛ kɛ Yesu tsɔɔmɔi lɛ kpãa gbee.​—Yesaia 2:2, 4, shishigbɛ niŋmaa.

•   Kɛ́ ootao ole enɛ he saji krokomɛi lɛ, kanemɔ Buu-Mɔɔ mli sane ni ji “Mɛni Ji Nyɔŋmɔ Susumɔ yɛ Ta He?” lɛ.

 Etsɛŋ kwraa, Yehowa, a ni ji “toiŋjɔlɛ Nyɔŋmɔ lɛ” baatsɔ eŋwɛi nɔyeli lɛ nɔ ejie gbɔmɛi “kɛje nɔnyɛɛ kɛ yiwalɛ mli.”​—Filipibii 4:9; Lala 72:14.

•   Kɛ́ ootao ole gbɛ nɔ ni ebaatsɔ efee nakai lɛ, kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ?