Kui komɛi kɛ basabasafeemɔ efite nii waa yɛ Haiti. Akɛ basabasafeemɔ miiye awui waa yɛ South Africa kɛ Mexico, kɛ Latin America maji komɛi anɔ. Yɛ hei ni yiwalɛ nifeemɔi anɔ egbɔ fioo po lɛ, mɛi nuɔ he akɛ amɛbɛ shweshweeshwe, ni amɛhao waa, ejaakɛ amɛnuɔ nifeemɔi ni mla eŋmɛɛɛ gbɛ ahe amaniɛbɔi; ekomɛi ji juu, mɛi anibii ni afiteɔ, kɛ shĩai kɛ amɛhenɔi ni ashãa.

 Mɛni Biblia lɛ kɛɔ yɛ mlakwamɔ ni yaa nɔ yɛ jeŋ fɛɛ lɛ he?

 Biblia lɛ gba akɛ, mlakwamɔ baafee “je lɛ naagbee gbii lɛ” he okadi lɛ fã. (Mateo 24:3) Be ni Yesu tsɔɔ nibii ni baafee nakai okadi lɛ, ewie akɛ:

•   “Akɛni abaaya nɔ afee nibii babaoo ni mla eŋmɛɛɛ gbɛ hewɔ lɛ, mɛi pii asuɔmɔ lɛ he baajɔ.”​—Mateo 24:12.

 Biblia lɛ gba hu akɛ, “naagbee gbii lɛ amli lɛ” gbɔmɛi baatsɔmɔ “mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa.” (2 Timoteo 3:1-5) Mikome mifa sui nɛɛ ahewɔ ni ŋmɛnɛ lɛ mlakwamɔ efa babaoo lɛ.

 Shi, wɔyɛ yiŋtoi kpakpai ahewɔ ni esa akɛ wɔná hiɛnɔkamɔ. Biblia lɛ ewo shi akɛ etsɛŋ, abaajie mlakwamɔ kɛje shihilɛ mli.

•   “Eshwɛ be fioo kɛkɛ, ni onaŋ mɛi fɔji lɛ dɔŋŋ; obaayakwɛ he ni amɛyɔɔ lɛ, shi onaŋ amɛ yɛ jɛmɛ. Shi mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.”​—Lala 37:10, 11.

 Kasemɔ hiɛnɔkamɔ ni Biblia lɛ kɛhãa lɛ, kɛ nɔ hewɔ ni wɔbaanyɛ wɔhe wɔye akɛ nibii ni yaa nɔ ŋmɛnɛ lɛ ji Biblia gbalɛ mlibaa lɛ he saji krokomɛi. Kanemɔ saji ni nyiɛ sɛɛ nɛɛ okwɛ.

 “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ”

 “Mɛni Ji “Naagbee Gbii Lɛ” Ahe Okadi Lɛ?”

 “Did the Bible Predict the Way People Think and Act Today?”