NYƐYAA NƆ NYƐBUA!
Pɔlitis Mli Yiwalɛ Nifeemɔi—Mɛni Biblia Lɛ Kɛɔ Yɛ He?
Aafee yiwalɛ nii srɔtoi yɛ pɔlitis mli yɛ je lɛ hei babaoo, ni ehã mɛi ehao waa.
Aju shi agbe mɛi ni miishi mple kɛhã maŋkwramɔŋ hegbɛi lɛ ateŋ mɛi 39 sɔŋŋ yɛ Mexico, ni eji yibɔ ni fa fe fɛɛ ni agbe nɛkɛ. Ni pɔlitis mli yiwalɛ nibii krokomɛi hu ni afee lɛ ehã mɛi anaa ekpɛ amɛhe aahu akɛ amɛyiŋ efee amɛ enyɔɔnyɔ yɛ Mexico afi 2023-2024 oshikifɔ̃ɔ lɛ he.
Pɔlitis mli yiwalɛ nifeemɔi srɔtoi pii etee nɔ waa yɛ Yuropa nyɛsɛɛ, ni emli eko ji be ni aju shi aka akɛ abaagbe Slovakia Maŋhiɛnyiɛlɔ lɛ yɛ May 15, 2024 lɛ.
Mɛi ni yɔɔ United States lɛ anaa ekpɛ amɛhe waa yɛ bɔ ni aju shi aka akɛ abaagbe tsutsu Amerika maŋhiɛnyiɛlɔ Donald Trump yɛ July 13, 2024 lɛ.
Mɛni hewɔ yiwalɛ nifeemɔi kɛ basabasafeemɔ efa waa yɛ pɔlitis mli nakai? Ani esɛɛ baafo gbi ko kɛ̃? Mɛni Biblia lɛ kɛɔ yɛ he?
Agba akɛ maŋkwramɔ susumɔi srɔtoi ni mɛi hiɛ lɛ baahã amɛmli agbala
Biblia lɛ gba efɔ̃ shi akɛ, yɛ wɔbei nɛɛ, ni atsɛ lɛ akɛ “naagbee gbii lɛ” amli lɛ, mɛi babaoo baajie yiwalɛ sui akpo, ni mɛi komɛi hu lɛ, anyɛŋ akɛ amɛ afee kpaŋmɔ.
“Shi ná enɛ ole akɛ naagbee gbii lɛ amli lɛ, bei krɛdɛi ni mli shihilɛ wa baaba. Ejaakɛ gbɔmɛi baatsɔmɔ . . . mɛi ni hiɛ esɔɔɔ nii, mɛi ni yeee anɔkwa, . . . mɛi ni anyɛɛɛ akɛ amɛ afee kpaŋmɔ, . . . mɛi ni hiɛ yɔɔ la, . . . mɛi ni jieɔ mɛi amɛhãa, kuɛŋtilɔi, mɛi ni naa amɛhe tsɔ.”—2 Timoteo 3:1-4.
Biblia lɛ gba hu akɛ, basabasafeemɔi tamɔ shi ni ateɔ awoɔ maŋ nɔyelɔi kɛ maŋkwramɔŋ béi baafa babaoo yɛ bei nɛɛ amli. (Luka 21:9, shishigbɛ niŋmaa) Kɛ̃lɛ, yiwalɛ nifeemɔi kɛ mligbalamɔi ni pɔlitis kɛbaa lɛ ehiŋ shi kɛyaŋ naanɔ.
Yiwalɛ nifeemɔi ni pɔlitis kɛbaa lɛ sɛɛ baafo
Biblia lɛ tsɔɔ mli akɛ, Nyɔŋmɔ kɛ lɛ diɛŋtsɛ enɔyeli ni eto shishi yɛ ŋwɛi lɛ baaye adesai anɔyelii fɛɛ najiaŋ.
“Nyɔŋmɔ ni yɔɔ ŋwɛi lɛ baato maŋtsɛyeli ko . . . shishi. Ni . . . ebaajwara maŋtsɛyelii [krokomɛi] nɛɛ fɛɛ ni ebaakpãtã amɛhiɛ, ni lɛ pɛ ebaadamɔ shi kɛya naanɔ.”—Daniel 2:44.
Nyɔŋmɔ Maŋtsɛyeli lɛ baafee adesai fɛɛ ekome, ni ebaahã toiŋjɔlɛ aba je lɛŋ he fɛɛ he.
Atsɛɔ Nyɔŋmɔ Maŋtsɛyeli lɛ Nɔyelɔ, ni ji Yesu Kristo lɛ, akɛ “Toiŋjɔlɛ Lumɔ,” ni ebaakwɛ ko ni ‘toiŋjɔlɛ akaba naagbee.’—Yesaia 9:6, 7.
Amrɔ nɛɛ po lɛ, mɛi ni Maŋtsɛyeli nɛɛ miiye amɛnɔ lɛ miikase bɔ ni ahiɔ shi yɛ toiŋjɔlɛ mli. No hewɔ lɛ, Biblia lɛ kɛɛ: “Amɛbaatswia amɛtawuu klantei kɛfee tsina kɔii anaa dadei, ni amɛbaatswia amɛkpɔlɔi hu kɛfee kaklai ni akɛsaa tsei ahe. Jeŋmaŋ ko wóŋ klante nɔ yɛ jeŋmaŋ ko nɔ, ni amɛkaseŋ tawuu hu dɔŋŋ.”—Yesaia 2:3, 4.
Kɛ́ ootao ole enɛ he saji krokomɛi lɛ, kanemɔ sane ni ji, “Mɛni Nyɔŋmɔ Maŋtsɛyeli Lɛ Baatsu?,” ni okwɛ vidio ni ji, Mɛni Ji Nyɔŋmɔ Maŋtsɛyeli Lɛ?