Leebi maŋkpa, yɛ February 24, 2022 lɛ, Russia asraafoi lɛ bɔi Ukraine tutuamɔ, no mli lɛ je lɛŋ hiɛnyiɛlɔi lɛ ebɔ mɔdɛŋ akɛ amɛbatsĩ naa shi eyahiii. Te asraafoi abei nɛɛ baasa je lɛ he ehã tɛŋŋ? Gbii fioo komɛi ni eho nɛɛ, António Guterres, ni eji Jeŋmaji Ekomefeemɔ lɛ hiɛnyiɛlɔ lɛ wie akɛ: “Tutuamɔ nɛɛ baafite nii babaoo, ebaahã mɛi ana nɔ waa diɛŋtsɛ, ni ebaasa maji ni yɔɔ Yuropa lɛ kɛ je lɛŋ maji krokomɛi lɛ fɛɛ ashweshweeshwefeemɔ he waa.”

•   Yesu gba akɛ be ko baashɛ ni “jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli.” (Mateo 24:7) Kanemɔ sane ni ji “Mɛni Ji ‘Naagbee Gbii Lɛ’ Ahe Okadi Lɛ?” koni ona bɔ ni Biblia lɛ hãa wɔnaa akɛ tai ni yaa nɔ ŋmɛnɛ lɛ ji Yesu gbalɛ lɛ mlibaa.

•   Biblia wolo ni ji Kpojiemɔ lɛ feɔ tawuu he mfoniri akɛ eta “okpɔŋɔ kroko ni tsuɔ tamɔ lalilɛi” nɔ, ni ‘ejieɔ toiŋjɔlɛ kɛjeɔ shikpɔŋ lɛ nɔ.’ (Kpojiemɔ 6:4) Kanemɔ sane ni ji “Okpɔŋɔnɔtaralɔi Ejwɛ Lɛ—Namɛi Ni?” lɛ koni ona bɔ ni gbalɛ nɛɛ kɔɔ tawuu he ŋmɛnɛ.

•   Daniel wolo lɛ gba mpleshii ko ni baaya nɔ yɛ “kooyigbɛ maŋtsɛ lɛ” kɛ “wuoyigbɛ maŋtsɛ lɛ” teŋ. (Daniel 11:25-45) Kwɛmɔ vidio ni ji Gbalɛ Lɛ Eba Mli—Daniel Yitso 11 lɛ koni ole nɔ hewɔ ni abaanyɛ akɛɛ akɛ Russia kɛ maji ni ekɛfee ekome lɛ ji kooyigbɛ maŋtsɛ lɛ. a

•   Kpojiemɔ wolo lɛ hu wieɔ “Nyɔŋmɔ Ofe lɛ gbi wulu lɛ nɔ ta lɛ” he. (Kpojiemɔ 16:14, 16) Shi enɛ jeee ta ni baaya nɔ yɛ jeŋmaŋ kɛ jeŋmaŋ ko teŋ tamɔ wɔnaa amrɔ nɛɛ. Kanemɔ sane ni ji “Mɛni Ji Harmagedon Ta Lɛ?” lɛ koni ole ta nɛɛ ni abaawu wɔsɛɛ lɛ he saji krokomɛi.

•   Biblia lɛ kɛɛ, Nyɔŋmɔ ‘baafo tai asɛɛ yɛ shikpɔŋ lɛ nɔ fɛɛ.’ (Lala 46:9) Kanemɔ sane ni ji “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ” lɛ koni ole wɔsɛɛ be kpakpa ni Nyɔŋmɔ ewo he shi lɛ he saji krokomɛi.

•   Yesu tsɔɔ esɛɛnyiɛlɔi koni amɛsɔle ni Nyɔŋmɔ Maŋtsɛyeli lɛ aba. (Mateo 6:9, 10) Nakai Maŋtsɛyeli lɛ ji ŋwɛi nɔyeli ni baahã bɔ ni Nyɔŋmɔ sumɔɔ ni shikpɔŋ lɛ afee lɛ aba amli, ni toiŋjɔlɛ ni baaba yɛ je lɛŋ fɛɛ hu fata he. Kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ? koni ole bɔ ni obaanyɛ oná Maŋtsɛyeli nɛɛ he sɛɛ.

 Yehowa Odasefoi ni fa fe 129,000 yɛ Ukraine. Taakɛ Odasefoi ni yɔɔ maji krokomɛi anɔ lɛ feɔ lɛ, nakai pɛpɛɛpɛ Yehowa Odasefoi ni yɔɔ Ukraine hu feɔ, amɛkaseɔ Yesu, no ji amɛfiii afã ko sɛɛ yɛ pɔlitis mli, ni amɛkɛ amɛhe wooo tawuu mli. (Yohane 18:36) Yehowa Odasefoi kã he amɛmiishiɛ “Maŋtsɛyeli lɛ he sane kpakpa” lɛ akɛ no ji adesai anaagbai fɛɛ, ni tawuu fata he lɛ, anaa tsabaa. (Mateo 24:14) Wɔmiibi ni otao wɔsɛɛ gbɛ koni ole Biblia mli saji ni hãa mɔ hiɛnɔkamɔ he nii babaoo.