Yɛ je lɛŋ hei srɔtoi lɛ, etɔɔ mɛi babaoo dani amɛnáa amɛdaaŋ ŋmaa​—ni shihilɛ nɛɛ miiya nɔ eewo wu be fɛɛ be.

•   Jeŋ fɛɛ amaniɛbɔɔ ko ni akɛhã nyɛsɛɛ nɛɛ tsɔɔ akɛ, a “nitsulɔi anyɔmɔwoo ni amɛnine shɛɔ nɔ daa nyɔŋ nɔ lɛ anɔ miigbɔ kwraa.” Ni amaniɛbɔɔ lɛ bɔ kɔkɔ akɛ, kɛ́ afeee nɔ ko yɛ shihilɛ nɛɛ he lɛ, “gbɛ ni kã ohiafoi kɛ niiatsɛmɛi ateŋ lɛ mli baada waa” ni “nitsulɔi babaoo kɛ amɛwekui náŋ shihilɛ lɛ mlɛo kwraa.”

 Ani nɔyelii lɛ baanyɛ atsu shika he naagbai ni mli miiya nɔ eewo wu nɛɛ he nii, aahu po ni amɛná naa tsabaa?

 Biblia lɛ tsɔɔ mli akɛ nɔyeli ko yɛ ni baanyɛ etsu shika naagbai kɛ gbɛ ni ebakã ohiafoi kɛ shikatsɛmɛi ateŋ lɛ ahe nii, ni ebaafee hu. Ekɛɛ, “Nyɔŋmɔ ni yɔɔ ŋwɛi lɛ baato maŋtsɛyeli ko . . . shishi,” eji nɔyeli kome ni baaye shikpɔŋ lɛ nɔ fɛɛ ni ekwɛ nibii anɔ jogbaŋŋ. (Daniel 2:44) Yɛ nakai jeŋ muu fɛɛ nɔyeli lɛ shishi lɛ, mɔ ko kwraa bɛ ni hiɛ baakpa enɔ loo abaakwa lɛ. (Lala 9:18) Nyɔŋmɔ Maŋtsɛyeli lɛ baakwɛ koni mɛi fɛɛ ni ji eshishibii lɛ aná nibii fɛɛ ni baahã amɛmii ashɛ amɛhe. Mɔ fɛɛ mɔ baaná deŋme ni egboɔ lɛ mli ŋɔɔmɔ.​—Yesaia 65:21, 22.