Jeŋ fɛɛ amaniɛbɔɔ a ko ni je kpo nyɛsɛɛ nɛɛ tsɔɔ akɛ, kɛ́ ohala mɛi aaafee ejwɛ lɛ, amɛteŋ mɔ kome he efee shoo.

•   “Mɔ fɛɛ mɔ lɛ, ekɔɔɔ he eko afii abɔ ni eye kɛ he ni eyɔɔ lɛ, ebaanyɛ enu he akɛ ehe efee shoo loo ebɛ mɔ ko ni ekɛbaagba sane.”​—Chido Mpemba, ni lɛ hu eji World Health Organization’s Commission on Social Connection lɛ sɛinɔtalɔ lɛ.

 Mɛi babaoo susuɔ akɛ mɛi ni edara loo mɛi ni amɛkome too amɛyɔɔ he ko lɛ pɛ baanyɛ anu he akɛ amɛhe efee shoo, shi oblahii kɛ oblayei, mɛi ni yɔɔ gbɔmɔtsoŋ hewalɛ, niiatsɛmɛi, kɛ mɛi ni ebote gbalashihilɛ mli po ahe baanyɛ afee shoo. Kɛ́ mɔ ko tse ehe loo eenu shoofeemɔ he lɛ, ebaanyɛ esa egbɔmɔtsoŋ hewalɛnamɔ he waa, ni ebaanyɛ ená jwɛŋmɔŋ naagba hu.

•   Dr. Vivek Murthy, ni eji opresheŋfeelɔ nukpa yɛ U.S. lɛ kɛɛ akɛ, “Shoofeemɔ jeee henumɔ gbonyo kɛkɛ ni anáa, eyaa shɔŋŋ fe nakai.” Ekɛfata he akɛ: “Bɔ ni mɛi ni shɛreɔ zigareti 15 yɛ gbi kome mli lɛ baanyɛ agboi oya lɛ, nakai nɔŋŋ shoofeemɔ baanyɛ agbe mɛi oya.”

 Wɔ-Bɔlɔ lɛ sumɔɔɔ ni wɔtse wɔhe yɛ mɛi ahe. Kɛjɛ shishijee tɔ̃ɔ lɛ, Nyɔŋmɔ yiŋtoo ji akɛ adesai afee ekome kɛhi shi yɛ miishɛɛ mli.

•   Biblia mli shishitoo mla: “Nyɔŋmɔ kɛɛ: ‘Ehiii akɛ nuu lɛ kome yaa nɔ ehiɔ shi.’”​—1 Mose 2:18.

 Nyɔŋmɔ miisumɔ ni wɔkɛ lɛ abɔ naanyo. Ewo shi akɛ ebaatsi ebɛŋkɛ wɔ kɛ́ wɔbɔ mɔdɛŋ wɔtsi wɔbɛŋkɛ lɛ.​—Yakobo 4:8.

•   Biblia mli shishitoo mla: “Mɛi ni le akɛ Nyɔŋmɔ he miihia amɛ lɛ yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ.”​—Mateo 5:3.

 Nyɔŋmɔ miisumɔ ni wɔkɛ mɛi krokomɛi afee ekome kɛjá lɛ. Kɛ́ wɔfee nakai lɛ, eyeɔ ebuaa wɔ ni wɔnáa miishɛɛ.

•   Biblia mli shishitoo mla: “Nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔteŋ mɔ fɛɛ mɔ akanya enyɛmi koni wɔjie suɔmɔ kpo ni wɔtsu nitsumɔi kpakpai, ni wɔkakpa kpe ni wɔkpeɔ kutuu lɛ, . . . shi moŋ wɔteŋ mɔ fɛɛ mɔ awo enyɛmi hewalɛ.”​—Hebribii 10:24, 25.

 Kɛ́ ootao ole nɔ hewɔ ni ehe miihia ni wɔfee nibii ni hãŋ wɔhe afee shoo lɛ he saji krokomɛi lɛ, kanemɔ sane ni ji “Loneliness in a World of Mass Connection.”