NYƐYAA NƆ NYƐBUA!
Hɔmɔ Ni Eba Yɛ Jeŋ Fɛɛ Lɛ Mli Ewo Wu Yɛ Ta Kɛ Kɔɔyɔɔŋ Tsakemɔ Hewɔ—Mɛni Biblia Lɛ Kɛɔ Yɛ He?
Ta ni yaa nɔ yɛ Ukraine lɛ kɛ naagbai ni kɔɔyɔɔŋ tsakemɔ kɛbaa lɛ ehã amrɔ nɛɛ, anáaa lɛ mlɛo akɛ akɛ niyenii baaya maji komɛi anɔ. Mɛi ni shihilɛ nɛɛ miiye amɛ awui waa ji maji ni amɛnáko hiɛyaa tsɔ lɛ, ejaakɛ etɔɔ amɛ dani amɛnáa niyenii.
“Tai, kɔɔyɔɔŋ tsakemɔ, pɛtro kɛ ehenɔi lɛ ajara ni ewa, kɛ nibii krokomɛi ehã ebawa waa akɛ abaaye okwaa koni aná niyenii ahã mɛi.”—António Guterres, Jeŋmaji ekomefeemɔ lɛ sɛinɔtalɔ, July 17, 2023.
“Mɛi komɛi ekɛɛ akɛ, akɛni Russia ejie ehe kɛje kpaŋmɔ ni afee koni anyɛ akɛ abele, omɔ, kɛ amɛhenɔi lɛ ajɛ Ukraine kɛya maji krokomɛi anɔ lɛ hewɔ lɛ, niyenii ajara baaya ŋwɛi waa yɛ maji ni bɛ nɔ ko tsɔ lɛ amli, titri lɛ, maji ni yɔɔ North Africa kɛ Middle East lɛ.”—Atalayar.com, July 23, 2023.
Susumɔ nɔ ni Biblia lɛ kɛɔ yɛ hɔmɔ kɛ bɔ ni shihilɛ lɛ baaji wɔsɛɛ lɛ he okwɛ.
Biblia lɛ gba akɛ hɔmɔ baaba
Yesu gba akɛ: “Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔmɔ . . . baaba.”—Mateo 24:7.
Biblia wolo ni ji Kpojiemɔ lɛ wie mfonirifeemɔŋ okpɔŋɔnɔtaralɔi ejwɛ komɛi ahe. Okpɔŋɔnɔtaralɔi ejwɛ nɛɛ ateŋ mɔ kome damɔ shi kɛhã ta. Okpɔŋɔnɔtalɔ ni nyiɛ esɛɛ lɛ damɔ shi kɛhã hɔmɔ, ni ji be ni ebaawa dani abaaná niyenii fioo aye, ni ejara hu baawa waa. “Mina okpɔŋɔ diŋ ko, ni mɔ ni ta enɔ lɛ hiɛ nsɛnii yɛ edɛŋ. Minu nɔ ko ni tamɔ gbee ko . . . Ekɛɛ: “Wiiti susumɔnɔ kome lɛ, okɛ gbi kome nyɔmɔwoo baahe! Barle susumɔnii etɛ lɛ, no hu okɛ gbi kome nyɔmɔwoo baahe!.”—Kpojiemɔ 6:5, 6, Contemporary English Version.
Biblia gbalɛi nɛɛ miiba mli bianɛ, yɛ be ni Biblia lɛ tsɛ lɛ akɛ “naagbee gbii lɛ” amli lɛ. (2 Timoteo 3:1) Kɛ́ ootao ole “naagbee gbii lɛ” kɛ okpɔŋɔnɔtaralɔi ejwɛ ni Biblia wolo ni ji Kpojiemɔ lɛ wie amɛhe lɛ ahe saji krokomɛi lɛ, kwɛmɔ vidio ni ji Je Lɛŋ Shihilɛ Etsake Kwraa Kɛjɛ Afi 1914 Kɛbaa lɛ, koni okane sane ni ji “Okpɔŋɔnɔtaralɔi Ejwɛ Lɛ—Namɛi Ni?” lɛ.
Bɔ ni Biblia lɛ baanyɛ aye abua
Ŋaawoi kpakpai yɛ Biblia lɛ mli ni baanyɛ aye abua wɔ koni wɔnyɛ wɔkpee shihilɛi ni mli wawai, tamɔ niyenii ajara ni yaa ŋwɛi loo niyenii ni anáaa lɛ anaa. Obaana ŋaawoi kpakpai nɛɛ ekomɛi yɛ sane ni ji “Bɔ Ni Obaafee Ohi Shi Kɛ́ Shika Ni Onáa Lɛ Faaa Po” lɛ mli.
Biblia lɛ hãa wɔ hiɛnɔkamɔ hu akɛ nibii baahi. Ewo shi akɛ, be ko baaba ni “shikpɔŋ lɛ nɔ baayi kɛ ŋmaa,” ni mɔ fɛɛ mɔ baaná niyenii babaoo eye. (Lala 72:16) Kɛ́ ootao ole hiɛnɔkamɔ kɛhã wɔsɛɛ nɛɛ he saji krokomɛi, kɛ nɔ hewɔ ni obaanyɛ ohe oye akɛ ebaaba mli lɛ, kanemɔ sane ni ji “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ” lɛ.
Ekolɛ Obaasumɔ Enɛ Hu
NYƐYAA NƆ NYƐBUA!
Ukraine Ta Lɛ Ehã Niyenii Ni Anáaa Lɛ Mli Ewo Wu Yɛ Jeŋ Fɛɛ—Mɛni Biblia Lɛ Kɛɔ Yɛ He?
Biblia lɛ gba akɛ hɔmɔ baaba yɛ jeŋ fɛɛ, shi ehãa wɔ hiɛnɔkamɔ kɛ ŋaawoi kpakpai ni baawa wɔ ni wɔkpee naa bianɛ.
NYƐYAA NƆ NYƐBUA!
Nu Hɔmɔ Ni Naa Wa—Mɛni Biblia Lɛ Kɛɔ Yɛ He?
Ani abaanyɛ aná naagba ni miiya nɔ yɛ jeŋ fɛɛ nɛɛ naa tsabaa? Ani hiɛnɔkamɔ ko yɛ kɛhã wɔsɛɛ?
SANEBIMƆI NI BIBLIA LƐ EHÃ HETOO
Mɛni Ji “Naagbee Gbii Lɛ” Ahe Okadi Lɛ?
Biblia lɛ gba nibii babaoo ni baaya nɔ yɛ be kome too mli ni baafee naagbee gbii lɛ he okadi.
ESSENTIAL BIBLE TEACHINGS
Mɛni Hewɔ Nyɔŋmɔ Ŋmɛɔ Piŋmɔ Gbɛ?
Biblia lɛ kɛ hetoo ni shɛjeɔ mɔmii ni hãa mɔ tsui nyɔɔ emli hãa.
