Yɛ May 24, 2022 lɛ, oshãra ko ni yɔɔ gbeyei ba yɛ Uvalde, ni ji maŋ bibioo ko ni yɔɔ Texas, U.S.A lɛ. Adafitswaa wolo ni ji The New York Times lɛ bɔ amaniɛ akɛ, “nuu ko tswia tu kɛgbe skulbii 19 kɛ tsɔɔlɔi enyɔ . . . yɛ skul ko ni atsɛɔ lɛ Robb Elementary School lɛ.”

 Dɔlɛ sane ji akɛ, oshãrai ni yɔɔ gbeyei tamɔ nɛkɛ fɔɔ baa waa. Adafitswaa wolo ni ji USA Today lɛ bɔ amaniɛ akɛ yɛ United States pɛ lɛ, “nyɛsɛɛ afi lɛ, tui ni atswiaa kɛgbeɔ mɛi lɛ tee nɔ yɛ skul srɔtoi 249 amli​—ni enɛ fa kwraa fe nɔ ni ba yɛ afi fɛɛ afi mli kɛjɛ aaafee afi 1970 kɛbaa nɛɛ.”

 Mɛni hewɔ yiwalɛ nifeemɔi tamɔ nɛkɛ baa? Mɛni baawa wɔ ni wɔkpee yiwalɛ nifeemɔi nɛɛ anaa? Ani hiɛnɔkamɔ ko yɛ akɛ yiwalɛ nifeemɔi nɛɛ asɛɛ baafo? Biblia lɛ hãa sanebimɔi nɛɛ ahetoo.

•    Biblia lɛ tsɛɔ bei ni wɔyɔɔ mli nɛɛ akɛ “naagbee gbii lɛ,” ni etsɔɔ akɛ mɛi pii baatsɔmɔ “mɛi ni bɛ suɔmɔ kɛhã amɛweku mli bii” kɛ “mɛi ni hiɛ yɔɔ la,” ni tsɔɔ akɛ amɛbaafee yiwalɛ nibii ni yɔɔ gbeyei. Mɛi ni feɔ nibii fɔji nɛɛ “baawo wu yɛ efɔŋ mli.” (2 Timoteo 3:1-5, 13) Kɛ́ ootao ole enɛ he saji krokomɛi lɛ kanemɔ sane ni ji, “Did the Bible Predict the Way People Think and Act Today?”

 Mɛi pii biɔ akɛ, ‘Mɛni hewɔ Nyɔŋmɔ etsĩii oshãrai ni yɔɔ gbeyei tamɔ tui ni atswiaa yɛ skul lɛ anaa?’ Kɛ́ ootao ole hetoo ni Biblia lɛ kɛhãa lɛ, kanemɔ sane ni ji “Nibii Fɔji Baa Mɛi Kpakpai Anɔ​—Mɛni Hewɔ?”

•    “Nibii fɛɛ ni aŋma ato momo lɛ, aŋma koni etsɔɔ wɔ nii, koni . . . kɛtsɔ Ŋmalɛ lɛ mli miishɛjemɔ lɛ nɔ lɛ, wɔná hiɛnɔkamɔ.”​—Romabii 15:4.

 Biblia mli shishitoo mlai baanyɛ awa bo ni okpee yiwalɛ nifeemɔi ni yaa nɔ yɛ jeŋ fɔŋ nɛɛ mli lɛ anaa. Kɛ́ ootao ole enɛ he saji krokomɛi lɛ, kanemɔ Awake! magazin ni hiɛ saneyitso akɛ “Will Violence Ever End?” lɛ.

 Kɛ́ oji fɔlɔ ni ootao ŋaawoi ni obaanyɛ okɛye obua obii koni amɛkpee amaniɛbɔi ni fãa mɔ tsui lɛ anaa lɛ, kanemɔ sane ni ji “Ye Obua Obii Lɛ Koni Amɛye Adafitswai Amli Amaniɛbɔi Ni Woɔ Mɔ He Gbeyei Loo Amɛfãa Mɔ Tsui Lɛ Anɔ.”

•    “Ebaajie amɛ kɛje nɔnyɛɛ kɛ yiwalɛ mli.”​—Lala 72:14.

•    “Amɛbaatswia amɛtawuu klantei kɛfee tsina kɔii anaa dadei, ni amɛbaatswia amɛkpɔlɔi hu kɛfee kaklai ni akɛsaa tsei ahe. Jeŋmaŋ ko wóŋ klante nɔ yɛ jeŋmaŋ ko nɔ, ni amɛkaseŋ tawuu hu dɔŋŋ.”​—Mika 4:3.

 Nyɔŋmɔ baafee nɔ ni adesai nyɛŋ amɛfee kɔkɔɔkɔ lɛ. E-Maŋtsɛyeli ni eto shishi yɛ ŋwɛi lɛ baakpata tawuu nii fɛɛ ahiɛ ni ebaafo yiwalɛ nifeemɔi fɛɛ asɛɛ. Kɛ́ ootao ole nibii ni Nyɔŋmɔ Maŋtsɛyeli baafee lɛ he saji krokomɛi lɛ, kanemɔ sane ni ji, “Mɛni Nyɔŋmɔ Maŋtsɛyeli Lɛ Baatsu?” lɛ.