Sohaa, February 24, 2023 kadiɔ be ko ni yɔɔ musuŋshãa waa​—ebafeɔ afi kome nɛ ni ta ni yaa nɔ yɛ Ukraine lɛ je shishi. Amaniɛbɔi komɛi tsɔɔ akɛ Ukraine kɛ Russia asraafoi aafee 300,000 egboi loo amɛpila, ni mɛi aaafee 30,000 ni jeee asraafoi egboi yɛ ta lɛ hewɔ. Kɛ̃lɛ, eeenyɛ efee akɛ mɛi ni egboi kɛ mɛi ni epila lɛ fa kwraa fe yibɔi nɛɛ.

 Mɔbɔ sane ji akɛ, nɔ ko etsɔɔɔ akɛ ta nɛɛ baaba naagbee bianɛ.

•   “Aaafee afi nɛ ni Russia asraafoi yatutua Ukraine, ni kɛbashi bianɛ lɛ, nɔ ko bɛ ni tsɔɔ akɛ ta nɛɛ baaba naagbee nɔŋŋ. Nɔ ko hu etsɔɔɔ akɛ fãi enyɔ nɛɛ ateŋ mɔ ko baaye kunim yɛ ta lɛ mli, ni etamɔ nɔ ni fãi enyɔ lɛ fɛɛ ekpɛko amɛyiŋ akɛ amɛbaaŋmɛɛ saji ahe kɛsaa koni amɛba gbeekpamɔ kɛfo ta lɛ sɛɛ.”​—NPR (National Public Radio), February 19, 2023.

 Bɔ ni ta nɛɛ kɛ tai krokomɛi ni yaa nɔ yɛ je lɛŋ hei krokomɛi lɛ ehã mɛi ni efeko nɔ ko lɛ miipiŋ, ni amɛmiina nɔ yɛ je lɛŋ hei srɔtoi lɛ hewɔ lɛ, mɛi babaoo ehao waa, ni amɛsane ja. Mɛɛ hiɛnɔkamɔ Biblia lɛ kɛhãa? Ani tai asɛɛ baafo gbi ko kɛ̃?

 Biblia lɛ wieɔ ta ko he; ta nɛɛ baabaa adesai ayi, egbeŋ amɛ. Atsɛɔ ta nɛɛ akɛ Harmagedon, ni atsɔɔ mli akɛ eji “Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:14, 16) Nyɔŋmɔ baatsɔ nakai ta lɛ nɔ efo adesai anɔyelii fɛɛ asɛɛ, ejaakɛ amɛ amɛkɛ tai babaoo ni kpãtãa mɛi ahiɛ lɛ baa. Kɛ́ ootao ole bɔ ni Harmagedon baahã adesai ahi shi yɛ toiŋjɔlɛ mli kɛya naanɔ lɛ, kanemɔ saji ni nyiɛ sɛɛ nɛɛ:

•   “Mɛni Ji Harmagedon Ta Lɛ?”

•   “Wɔkɛ Miishɛɛ Miikpa Harmagedon Ta Lɛ Gbɛ!”