BENI Israelbii lɛ toɔ gbɛjianɔ koni amɛya Shiwoo Shikpɔŋ lɛ nɔ lɛ, Mose kɛɛ Nyɔŋmɔ bɔ ni eshweɔ waa koni eyana jɛmɛ lɛ akɛ: “Miikpao fai, ha ni mi hu mafo mli kɛya, ní mayana shikpɔŋ kpakpa ni yɔɔ Yordan sɛɛ lɛ, nɛkɛ gɔŋ fɛfɛo nɛɛ kɛ Lebanon lɛ!”—5 Mose 3:25.

Mose bɛ hegbɛ akɛ eeena jɛmɛ, shi ekwɔ gɔŋ ko ni hiɛ kwɛɔ Yeriko lɛ ni ena shikpɔŋ lɛ—‘Gilead kɛyashi Dan kɛ Yuda shikpɔŋ lɛ kɛyashi anaigbɛ ŋshɔ lɛ naa kɛ Wuoyigbɛ kɛ Yordan jɔɔ lɛ.’ (5 Mose 3:27; 34:1-4) Ani ónu nakai gbɛii lɛ pɛŋ? Ani ole hei ni amɛyɔɔ?

Yehowa webii lɛ ateŋ mɛi fioo ko pɛ baanyɛ ayasara hei babaoo ni amɛkaneɔ he sane yɛ Biblia lɛ mli lɛ ŋmɛnɛ. Amɛnyɛɛɛ amɛfee nɔ ni Nyɔŋmɔ kɛɛ ebaaha Abraham afee koni efã gbɛ kɛya Shiwoo Shikpɔŋ lɛ nɔ hei srɔtoi fɛɛ lɛ. (1 Mose 13:14-17) Ni kɛlɛ, anɔkwa Kristofoi miisumɔ waa koni amɛle Biblia shikpɔji lɛ ahe sane ni amɛna bɔ ni shikpɔji lɛ eko fɛɛ eko gbalaa jwɛŋmɔ kɛyaa ekroko nɔ ehaa lɛ.

‘Kwɛmɔ Shikpɔŋ Kpakpa Lɛ’ ji dɛŋdade ko ni obaanyɛ okɛtsu nii koni okɛha Ŋmalɛi lɛ ahe shishinumɔ ni oyɔɔ lɛ aya hiɛ. Ehiɛ shikpɔji lɛ diɛŋtsɛ ahe mfonirii, tamɔ Gilead, ni jeɔ kpo yɛ wolo lɛ sɛɛgbɛ lɛ. Nɔ ni tsɔɔ mɔ nii babaoo po ji shikpɔŋ he mfonirii lɛ ni baanyɛ aha Biblia shikpɔji lɛ ahe shishinumɔ ni oyɔɔ lɛ mli akwɔ waa lɛ.

Shikpɔŋ he mfoniri ni yɔɔ baafai 2 kɛ 3 lɛ gbalaa jwɛŋmɔ kɛyaa shikpɔji wuji loo kpokpai wuji anɔ. Ákɛ nɔkwɛmɔnɔ lɛ, kɛ́ okwɛ he ni Ashur kɛ Mizraim yɔɔ kɛ́ akɛto he ni Shiwoo Shikpɔŋ lɛ yɔɔ lɛ he lɛ, obaanyɛ onu gbalɛi ni tsĩɔ nakai shikpɔji lɛ atã lɛ shishi jogbaŋŋ. (Yes 7:18; 27:13; Hosh 11:11; Mika 7:12) Shikpɔŋ bloblo bibioo ni atsɛɔ lɛ Shiwoo Shikpɔŋ lɛ ji he ni blema gbɛjegbɛi babaoo batsɔɔ, ni maji krokomɛi tao koni amɛná ŋmãa ŋmɔji, weintsei ŋmɔji, kɛ mutsei atromi ni yɔɔ nɔ lɛ anɔ hewalɛ.—5 Mose 8:8; Koj 15:5.

Bei komɛi lɛ obaasumɔ ni okɛ shikpɔŋ he mfoniri ko ato ekrokomɛi ahe koni ole srɔtofeemɔi ni yɔɔ amɛteŋ. Ákɛ nɔkwɛmɔnɔ lɛ, akɛ nitsumɔ wo Yona dɛŋ koni eya Ashur maŋtiase lɛ mli, shi eta lɛlɛ mli kɛtee Tarshish. (Yona 1:1-3) Ani oona nɛkɛ hei nɛɛ yɛ nakai klɛŋklɛŋ shikpɔŋ he mfoniri lɛ nɔ? Shi esaaa akɛ asusuɔ akɛ Tarshish ji Tarso, he ni afɔ bɔfo Paulo yɛ lɛ. Obaana Tarso kɛ maŋtiasei krokomɛi ni sa kadimɔ lɛ yɛ shikpɔŋ he mfoniri ni yɔɔ biɛ lɛ nɔ.

Susumɔ gbɛ jɛkɛmɔ ni Abraham fã lɛ he okwɛ beni okwɛɔ Ur, Haran, kɛ Yerusalem lɛ. Beni Yehowa tsɛ́ lɛ kɛjɛ Ur lɛ, eyahi Haran, kɛkɛ ni efã kɛtee Shiwoo Shikpɔŋ lɛ nɔ. (5 Mose 11:28–12:1; Bɔf 7:2-5) Obaaná Abraham gbɛfaa lɛ he miishɛɛ jogbaŋŋ yɛ be mli ni okaseɔ “Blematsɛmɛi Aje Lɛ” he nii lɛ yɛ baafa 6 kɛyashi 7 lɛ.

Klɛŋklɛŋ shikpɔŋ he mfoniri lɛ kɛ nɔ ni yɔɔ biɛ lɛ kɔɔɔ be pɔtɛɛ ko he. Yɛ enyɔ nɛɛ asɛɛ lɛ, ato shikpɔŋ he mfonirii krokomɛi ni nyiɛ sɛɛ lɛ anaa taakɛ eba mli yɛ yinɔsane mli lɛ. Shikpɔŋ he mfoniri lɛ nɔ maŋtiasei loo ehe saji fitsofitso lɛ kɔɔ nifeemɔi ni ba yɛ be pɔtɛɛ ko mli lɛ he. Eyɛ mli akɛ jeee hei srɔtoi fɛɛ ni atsĩ tã yɛ shikpɔŋ he mfonirii lɛ anɔ lɛ yɔɔ Saji Ataomɔhe (baafa 34-35) lɛ mli moŋ, shi bei pii lɛ, ebaanyɛ eye ebua bo koni ona shikpɔŋ he mfonirii ni kɔɔ sane oti ni otaoɔ emli saji amli amrɔmrɔ nɛɛ lɛ he lɛ.

Shiwoo Shikpɔŋ lɛ nɔ maji kɛ maŋtiasei ni fa babaoo lɛ yɛ shikpɔŋ he mfoniri ni yɔɔ teŋgbɛ baafai enyɔ (baafa 18-19) lɛ nɔ lɛ nɔ. Shikpɔŋ He Mfoniri  Mlitsɔɔmɔ lɛ baaye ebua bo koni ona Levibii amaŋtiasei kɛ abobaa maji ekpaa lɛ, kɛ agbɛnɛ bɔni afee ni ole kɛji atsĩ he ko tã yɛ Hebri Ŋmalɛi lɛ amli, Hela Ŋmalɛi lɛ amli, loo enyɔ lɛ fɛɛ mli.

Aleee hei ni Biblia shikpɔji komɛi yɔɔ lɛ bianɛ, no hewɔ lɛ, nakai gbɛii lɛ ateŋ babaoo bɛ nakai shikpɔŋ he mfoniri ni yɔɔ teŋgbɛ lɛ nɔ. Agbɛnɛ hu, anyɛɛɛ akɛ maŋtiasei kɛ maji srɔtoi fɛɛ, tamɔ eko fɛɛ eko ni yɔɔ akutsei lɛ anaa husui ni ato naa lɛ nɔ awo nɔ. (Yosh yitso 15-19) Ni kɛlɛ, bei pii lɛ, maŋtiasei ni bɛŋkɛ lɛ yɛ nakai shikpɔŋ he mfoniri lɛ nɔ, ni no hewɔ lɛ, ebaaha ole he ni eyɔɔ lɛ jogbaŋŋ. Akadi shikpɔji anɔ nibii komɛi (gɔji, faai, kɛ nujɔɔi), ni akɛ sui srɔtoi etsɔɔ gɔŋ kɛ shikpɔŋ lɛ shikamɔ. Nɛkɛ saji ni yɔɔ fitsofitso nɛɛ baanyɛ aye abua bo koni ofee Biblia mli nifeemɔi lɛ fãi srɔtoi lɛ ahe mfoniri yɛ ojwɛŋmɔŋ.

Biblia shikpɔji lɛ ahe saji babaoo yɛ ɛnsaiklopidia ni ji Insight on the Scriptures, ni yɔɔ wiemɔi babaoo amli lɛ mli. a Yɛ be mli ni okɛ no kɛ Biblia kasemɔ he woji loo nibii krokomɛi tsuɔ nii lɛ, ha ‘Kwɛmɔ Shikpɔŋ Kpakpa Lɛ’ ahi omasɛi be fɛɛ be. Kwɛmɔ mli yɛ be mli ni okaseɔ Ŋmalɛi lɛ fɛɛ, ni he yɔɔ sɛɛnamɔ yɛ oshihilɛ mli lɛ.—2 Tim 3:16, 17.

[Shishigbɛ niŋmaa]

[Shikpɔŋ he mfoniri ni yɔɔ baafa 4, 5]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Biblia Shikpɔji kɛ Maŋtiasei Titrii

A1 ITALIA

A2 ROMA

A3 SICILY

A3 MELITA

D2 MAKEDONIA

D2 Filipi

D2 HELA

D3 ATEENE

D3 Korinto

D3 KRETA

D4 LIBIA

E3 Antiokia (ni Yɔɔ Pisidia)

E3 Efeso

E3 PATMO

E3 RODO

E4 MEMFIS

E5 MIZRAIM

Ɛ2 ASIA BIBIOO

Ɛ3 Tarso

Ɛ2 Antiokia (ni Yɔɔ Siria)

Ɛ3 KIPRO

Ɛ4 Zidon

Ɛ4 Damasko

Ɛ4 Tiro

Ɛ4 Kaisarea

Ɛ4 SHIWOO SHIKPƆŊ

Ɛ4 YERUSALEM

Ɛ4 MOAB

Ɛ4 Kadesh

Ɛ4 EDOM

F3 Eden Trom?

F3 ASHUR

F3 Haran

F3 SIRIA

F5 ARABIA

G3 NINIVE

G4 BABILON

G4 KALDEA

G4 Shushan

G4 Ur

H3 MEDIA

[Gɔji]

Ɛ5 Sinai Gɔŋ

G2 ARARAT GƆJI

[Nui]

D3 Mediterranean Ŋshɔ (Ŋshɔ Wulu)

Ɛ1 Ŋshɔ Diŋ

Ɛ5 Ŋshɔ Tsuru

H2 Caspian Ŋshɔ

H5 Persia Ŋshɔnine

[Fai]

E5 Nilo Faa

F3 Eufrate Faa

G3 Tigris Faa