U.S. NATIONAL Institute of Mental Health ŋma nɔ ni ana kɛjɛ niiamlitaomɔ ni afee yɛ fɔlɔi ni abuɔ akɛ amɛye omanye lɛ ahe​—amɛteŋ mɛi ni amɛbii, eye fe afii 21 lɛ, “fɛɛ ji onukpai ni he yɔɔ sɛɛnamɔ ní enyɛ amɛmiile gbɔmɛi ni yɔɔ wɔteŋ lɛ kɛ shihilɛ.” Abi fɔlɔi nɛɛ akɛ: ‘Yɛ nyɛ diɛŋtsɛ nyɛ niiashikpamɔ naa lɛ, mɛni ji ŋaawoo ni hi fe fɛɛ ni nyɛbaanyɛ  nyɛkɛha fɔlɔi krokomɛi?’ Hetooi ni akɛha yɛ bei pii amli ji enɛɛmɛi: ‘Suɔmɔ babaoo,’ ‘tsɔsemɔ kpakpa,’ ‘nyɛtsua nii kutuu,’ ‘tsɔɔmɔ obii lɛ nɔ ni hi kɛ nɔ ni ehiii,’ ‘nyɛnaa bulɛ nyɛhaa nyɛhe,’ ‘bo amɛ toi jogbaŋŋ,’ ‘okɛ gbɛtsɔɔmɔ aha fe wiemɔ,’ kɛ agbɛnɛ ‘tsɔɔmɔ sane mli faŋŋ.’

Shi, jeee fɔlɔi pɛ tsuɔ nii koni amɛna onukpai ni ŋmɛɔ pɛpɛɛpɛ. Tsɔɔlɔi hu tsuɔ gbɛfaŋnɔ wulu ko he nii yɛ enɛ mli. Skulyaa he ŋaawolɔ ko ni yɔɔ niiashikpamɔ kɛɛ: “Yiŋtoo titri ni yɔɔ skul nikasemɔ he ji ni akɛye abua fɔlɔi koni amɛna onukpai ni tsuɔ gbɛnaa nii ahe nii, ní edara jogbaŋŋ yɛ jwɛŋmɔŋ, gbɔmɔtsoŋ, kɛ henumɔŋ.”

No hewɔ lɛ fɔlɔi kɛ tsɔɔlɔi hiɛ oti kome lɛ nɔŋŋ​—koni amɛna obalahii kɛ obalayei bibii ni wɔsɛɛ ko lɛ, amɛbaatsɔmɔ onukpai ni edara yɛ jwɛŋmɔŋ, ni ŋmɛɔ pɛpɛɛpɛ, ni naa wala mli ŋɔɔmɔ, ni nyɛɔ amɛnaa gbɛfaŋnɔ ni sa yɛ gbɔmɛi ni amɛhiɔ amɛteŋ lɛ ateŋ.

Shi kɛlɛ, naagbai baa kɛ fɔlɔi kɛ tsɔɔlɔi efeee ekome. Akɛ nɔkwɛmɔ nɔ lɛ, fɔlɔi komɛi yɛ ni amɛbii askul nikasemɔ jeee amɛhe sane ko kwraa; mɛi krokomɛi bɔɔ mɔdɛŋ ni amɛkɛ tsɔɔlɔi ashi akaŋ. Beni egbaa shihilɛ nɛɛ he sane lɛ, French wolo ko kɛɛ: “Tsɔɔlɔ lɛ pɛ jeee onukpa ni kwɛɔ mɛi anɔ dɔŋŋ. Fɔlɔi ni omanye ni amɛbii aaaye ehe amɛyitso lɛ, tsɛrɛɔ skul woji amli, amɛkojoɔ ni amɛwieɔ amɛshiɔ nitsɔɔmɔ gbɛi, ni amɛkɛ oyaiyeli tsuɔ amɛbii ni ebɔɔɔ mɔdɛŋ yɛ kaa ni afee klɛŋklɛŋ lɛ mli lɛ he nii.” Nifeemɔi ni tamɔ nɛkɛ lɛ baanyɛ ate shi ashi tsɔɔlɔi ahegbɛi.

Yehowa Odasefoi nuɔ he akɛ, kɛ fɔlɔi kɛ tsɔɔlɔi fee ekome, ni amɛna amɛbii lɛ askul nikasemɔ lɛ he miishɛɛ waa lɛ, eyeɔ ebuaa amɛbii lɛ jogbaŋŋ. Amɛheɔ amɛyeɔ akɛ, ekomefeemɔ ni tamɔ nɛkɛ he miihia waa diɛŋtsɛ, ejaakɛ onitsumɔ akɛ tsɔɔlɔ lɛ, ebatsɔ nitsumɔ ni wa waa diɛŋtsɛ be fɛɛ be.

Akɛni adesai ashihilɛ mli nifeemɔi naa amɛnɔ hewalɛ hewɔ lɛ, skul sɔrɔtoi lɛ yeko amɛhe kɛjɛko naagbai ni yaa nɔ yɛ shihilɛ mli lɛ ahe. Shihilɛ mli naagbai etee hiɛ yɛ oyaiyeli mli, beni afii lɛ hoɔ yaa lɛ. Beni ewieɔ shihilɛi ni yaa nɔ yɛ skul ko ni yɔɔ United States lɛ mli lɛ he lɛ, The New York Times lɛ bɔ amaniɛ akɛ: “Nikaselɔi wɔɔ yɛ klas-tsu mli, amɛwoɔ amɛteŋ mɔ fɛɛ mɔ he gbeyei yɛ tsɔmɔ hei, ní atɛŋ mfonirii ni aŋmala nii hu yɛ gbogboi lɛ ahe lɛ, ni amɛbuuu nikaselɔi ni bɔɔ mɔdɛŋ lɛ. . . . Etamɔ nɔ ni nikaselɔi lɛ fɛɛ miidamɔ naagbai tamɔ abifabii anɔkwɛmɔ, fɔlɔi ni awo amɛ tsuŋ ni amɛkɛshãrãa lɛ kɛ awuiyelɔi akuu ni amɛje amɛdɛŋ lɛ naa. Aaafee amɛteŋ mɔ kome yɛ mɛi enumɔ mli baaa skul yɛ gbi pɔtɛɛ ko nɔ.”

Nɔ ni fãa mɔ tsui titri ji majimaji ateŋ awuiyeli he naagba ni yaa nɔ yɛ  skul sɔrɔtoi fɛɛ mli lɛ. Tui ni atswaa kɛ kaklai ni akɛtsurɔɔ mɛi daa lɛ eye nɔmɔi ni yaa nɔ be kɛ bei amli ni mɛi atsimɔ kɛ amɛmiamɔ fata he lɛ anajiaŋ. Mɔgbee dadei efa babaoo, atutuaa mɛi ekãa naa, ni gbekɛbii kɛ amɛhe woɔ awuiyeli mli mra beni amɛdarako kwraa.

Ŋwanejee ko bɛ he akɛ, jeee maŋ fɛɛ maŋ kɛ shihilɛi ni yɔɔ gbeyei ni tamɔ nɛkɛ kpeɔ. Shi kɛlɛ, tsɔɔlɔi pii ni yɔɔ je lɛŋ he fɛɛ he lɛ kɛ shihilɛ ni atsi ta yɛ French Le Point ni baa daa otsi lɛ mli lɛ kpeɔ: “Abuuu tsɔɔlɔ lɛ dɔŋŋ; ebɛ hegbɛ ko kwraa.”

Bulɛ ni tamɔ nɛkɛ ni abɛ kɛha nɔyeli hegbɛ lɛ kɛ oshara diɛŋtsɛ bafɔɔ gbekɛbii fɛɛ nɔ. No hewɔ lɛ, Yehowa Odasefoi bɔɔ mɔdɛŋ akɛ amɛaatɛo heshibaa kɛ bulɛ kɛha nɔyeli hegbɛ, sui ni bei pii lɛ akɛtsuuu nii yɛ skul shihilɛ mli ŋmɛnɛ lɛ, amɛwo amɛbii amli.