NETHERLANDNYO nilelɔ Spinoza ŋma akɛ: “Mibɔ mɔdɛŋ koni mikaŋmɔ gbɔmɛi anifeemɔi, ní mikafó yɛ nomɛi ahewɔ, ni asaŋ mikanyɛ amɛ hu, shi moŋ ni manu amɛ shishi.” Akɛ tsɔselɔ lɛ, okɛ nikaselɔi ni okwɛɔ amɛnɔ lɛ, ni Yehowa Odasefoi abii ni yaa skul fata he lɛ asusumɔi, shihilɛi sɔrɔtoi ni amɛjɛ mli, kɛ nibii ni amɛheɔ amɛyeɔ lɛ ni obɔɔ mɔdɛŋ akɛ ooonu shishi lɛ he kaa kpeɔ. Bei komɛi lɛ, nikaselɔi ni tamɔ nɛkɛ lɛ baakɔ shidaamɔ ko ni tamɔ nɔ ni yɔɔ sɔrɔto kwraa yɛ saji komɛi ahe. Shi kɛ nifeemɔi nɛɛ jɛ nii ni nikaselɔ lɛ ehe eye yɛ jamɔ kɛ jeŋba mli yɛ faŋŋ mli lɛ, no lɛ esa akɛ okwɛ mli. Watch Tower Bible and Tract Society (Yehowa Odasefoi anitsumɔ he ni kalaa woji lɛ) fee wolo bibioo nɛɛ, ni ato he gbɛjianɔ koni eye ebua bo ni onu nikaselɔi ni ji Odasefoi lɛ ashishi jogbaŋŋ. Wɔhiɛ ka nɔ akɛ obaatao be koni okane lɛ jogbaŋŋ.

Mɔ kroko jamɔŋ hemɔkɛyelii ni ooonu shishi lɛ biii ni okpɛlɛ nɔ loo onyiɛ nomɛi asɛɛ, ni ehe saji ni aaale lɛ etsɔɔɔ akɛ aatsake mɔ awo jamɔ kroko mli. Wolo bibioo nɛɛ taooo akɛ enyɛ onɔ ni ohe Odasefoi ajamɔŋ susumɔi oye loo eha onikaselɔi krokomɛi ahe no aye. Nɔ ni wɔsumɔɔ pɛ ji ni wɔha ole shishitoo mlai kɛ hemɔkɛyelii ni nikaselɔi ni otsɔɔ amɛ nii lɛ ateŋ mɛi komɛi afɔlɔi tsɔɔ amɛ, bɔni afee ni ekawa kɛmiiha bo akɛ ooonu Odasefoi abii lɛ ashishi, kɛ okɛ amɛ kɛ gbeekpamɔ hu. Taakɛ eji lɛ, nɔ ni atsɔɔ gbekɛbii lɛ kɛ nɔ ni amɛfeɔ lɛ kpaŋ gbee be fɛɛ be, akɛni gbekɛ fɛɛ gbekɛ miikase nii koni ekɛtsɔse lɛ diɛŋtsɛ ehenilee hewɔ.

Taakɛ eji yɛ fɔlɔi pii ahe lɛ, Yehowa Odasefoi miisumɔ ni amɛbii ana amɛ skulyaa lɛ he sɛɛ jogbaŋŋ. Yɛ enɛ hewɔ lɛ, amɛtsɔɔ amɛ bii lɛ koni amɛkɛ amɛ tsɔɔlɔi lɛ afee ekome. Nakai nɔŋŋ hu fɔlɔi Odasefoi kɛ amɛbii ahiɛ sɔɔ kɛ́ tsɔɔlɔi kɛ amɛ ye yɛ shishinumɔ kɛ bulɛ naa.

Yehowa Odasefoi ji Kristofoi ni ale amɛ yɛ jeŋ fɛɛ. Shi kɛlɛ, anuuu amɛ shishi yɛ bei komɛi amli. No hewɔ lɛ, wɔ hiɛnɔkamɔ ji akɛ, wolo bibioo nɛɛ baaye ebua bo koni onu Odasefoi abii ni okwɛɔ amɛnɔ lɛ shishi jogbaŋŋ. Titri lɛ, wɔhiɛ ka nɔ akɛ, obaana nɔ hewɔ ni yɛ shihilɛi pɔtɛɛ komɛi amli lɛ, amɛbaasumɔ ni amɛkɛ hegbɛ ni amɛyɔɔ akɛ amɛaafee sɔrɔto lɛ atsu nii lɛ.