AKƐNI amɛbuɔ amɛ Biblia mli nikasemɔ nitsumɔ lɛ akɛ ehe hiaa waa hewɔ lɛ, mɛi komɛi baasusu akɛ amɛbɛ je lɛŋ wolo-kasemɔ he miishɛɛ. Shi ejeee anɔkwale. Kɛ abaatsɔɔ mɛi krokomɛi anii lɛ, esa akɛ tsɔɔlɔ lɛ akase nii dã, ni enɛ biɔ tsɔsemɔ kɛ nitsɔɔmɔ kpakpa. No hewɔ lɛ kɛfata je lɛŋ skulyaa ni aaana he sɛɛ jogbaŋŋ lɛ he lɛ, Yehowa Odasefoi ena wolo-kasemɔ he  gbɛjianɔtoi sɔrɔtoi kɛ skul sɔrɔtoi ni Buu Mɔɔ Asafo lɛ feɔ lɛ ahe sɛɛ afii pii. Enɛɛmɛi eye ebua Odasefoi kɛ mɛi krokomɛi koni amɛhe asa yɛ jwɛŋmɔŋ, jeŋba mli, kɛ mumɔŋ.

Akɛ nɔkwɛmɔ nɔ lɛ, Odasefoi lɛ kɛ kaa krɛdɛɛ ko ekpe yɛ maji babaoo mli​—bɔ ni aaafee atsɔɔ mɛi ni na skulyaa tsɔsemɔ mli hegbɛ fioo ko pɛ loo amɛnaaa eko kwraa, ni no hewɔ lɛ amɛleee nikanemɔ loo niŋmaa lɛ anii. Bɔni afee ni atsu hiamɔ nɛɛ he nii lɛ, Buu Mɔɔ Asafo lɛ eto nikanemɔ kɛ niŋmaa kasemɔ he gbɛjianɔ.

Akɛ nɔkwɛmɔ nɔ lɛ, Yehowa Odasefoi eha wolo-kasemɔ he skul etee nɔ yɛ Nigeria, kɛjɛ 1949 kɛbaa. Kɛtsɔ skul srɔtoi nɛɛ anɔ lɛ, Nigeriabii akpei abɔ ekase nikanemɔ. Niiamlipɛimɔ ko ni afee lɛ tsɔɔ akɛ Nigeria Yehowa Odasefoi ni fa fe oha mlijaa 90 le nikanemɔ kɛ niŋmaa, kɛ́ akɛto maŋbii ni eshwɛ lɛ ateŋ mɛi oha mlijaa 50 lɛ he lɛ. Kɛjɛ 1946 tɔ̃ɔ ni akɛ nikanemɔ kɛ niŋmaa skul ni Yehowa Odasefoi to he gbɛjianɔ lɛ bɔi nitsumɔ yɛ Mexico. Yɛ afi pɛ mli lɛ, atsɔɔ mɛi ni fa fe 6,500 nikanemɔ kɛ niŋmaa. Yɛ anɔkwale mli lɛ, aye abua mɛi ni fa fe 100,000 ni amɛle nikanemɔ kɛ niŋmaa. Yɛ afii ni eho lɛ amli lɛ, ato nikanemɔ kɛ niŋmaa skul lɛ he gbɛjianɔ yɛ maji krokomɛi tamɔ, Bolivia, Cameroon, Nepal, kɛ Zambia anɔ. Yehowa Odasefoi ekala Kasemɔ Nikanemɔ kɛ Niŋmaa wolo lɛ nɔ ni fa fe akpekpei kpawo yɛ wiemɔi fe 100 mli.

Skul nikasemɔ mli onukpai lɛ ekpɛlɛ wolo-kasemɔ he gbɛjianɔtoi ni tamɔ nɛkɛ lɛ anɔ bei pii yɛ maji ni afeɔ yɛ mli lɛ amli. Akɛ nɔkwɛmɔ nɔ lɛ, nɔyeli lɛ nitsulɔ ko ni yɔɔ Mexico ŋma akɛ: “Mihiɛ esɔ ekome ni nyɛkɛ wɔ feɔ lɛ, ni miidamɔ nɔyeli lɛ najiaŋ kɛmiiha nyɛ aekoo yɛ anɔkwayeli fɛɛ mli, yɛ nyɛ nitsumɔ ni nɔ bɛ ni yaa hiɛ koni mɛi ana he sɛɛ, yɛ nilee he la ni kpɛɔ ni nyɛkɛbahaa mɛi ni leee woloŋ lɛ ahewɔ. . . . Miibi omanyeyeli miiha nyɛ yɛ nyɛ wolo-kasemɔ nitsumɔ nɛɛ mli.”

Akɛni amɛbuɔ amɛ Biblia kasemɔ nitsumɔ nɛɛ akɛ ehe hiaa waa hewɔ lɛ, Yehowa Odasefoi bɔɔ mɔdɛŋ koni amɛya hiɛ yɛ bɔ ni amɛnyɛɔ amɛtsɔɔ Biblia mli tsɔɔmɔi amli amɛhaa mɛi krokomɛi lɛ mli. Akɛ nɔkwɛmɔnɔ lɛ, yɛ asafoi ni fa fe 119,000 ni yɔɔ jeŋ fɛɛ lɛ eko fɛɛ eko mli lɛ, atsɔɔ asafoŋbii lɛ bɔ ni adamɔɔ mɛi ahiɛ akaneɔ nii kɛ bɔ ni awieɔ hu. Kɛ gbekɛbii bibii ni yɔɔ amɛteŋ lɛ po bale nikanemɔ nɔŋŋ pɛ lɛ, amɛbaanyɛ amɛha aŋmala amɛgbɛi koni amɛnine ashɛ tsɔsemɔ nɛɛ nɔ, ni ehe baa sɛɛnamɔ kɛhaa amɛ yɛ shihilɛi krokomɛi amli, kɛ amɛ skulyaa mli hu. Tsɔɔlɔi pii ewie akɛ Odasefoi ni yaa skul bɔɔ mɔdɛŋ jogbaŋŋ yɛ amɛ wiemɔi amli.

Kɛfata he lɛ, awoɔ Yehowa Odasefoi asafoi fɛɛ hewalɛ koni amɛna wojiatoo he ni Biblia kasemɔ he woji, wiemɔ komekomei ashishitsɔɔmɔ woji, kɛ woji  krokomɛi ni atsɛɔ saji asɛɛ kɛjɛɔ mli lɛ yɔɔ mli, yɛ amɛ diɛŋtsɛ amɛ Maŋtsɛyeli Asa nɔ, loo yɛ he ni amɛkpeɔ yɛ lɛ. Mɛi fɛɛ ni yaa kpee yɛ Maŋtsɛyeli Asa lɛ nɔ lɛ yɛ wojiatoo he nɛɛ mlikwɛmɔ he hegbɛ. Akɛ miishɛɛ woɔ nikanemɔ he hewalɛ yɛ amɛ asafoi lɛ amli, ni nakai nɔŋŋ awoɔ weku fɛɛ weku hewalɛ koni amɛna weku lɛ wojiatoo he, ni woji sɔrɔtoi pii ni baanyɛ atsu gbekɛbii kɛ onukpai ahiamɔ nii lɛ ahe nii yɔɔ mli.

Buu Mɔɔ Asafo lɛ hu feɔ skul sɔrɔtoi koni akɛtsɔse maŋsɛɛ sanekpakpa shiɛlɔi hii kɛ yei fɛɛ, kɛ skul sɔrɔtoi ni  akɛtsɔseɔ hii ni yɔɔ sɔɔmɔ he gbɛnaa nii yɛ amɛ asafoi lɛ amli lɛ hu. Nɛkɛ skul sɔrɔtoi nɛɛ ji odaseyeli babaoo ni fata he ni tsɔɔ akɛ Yehowa Odasefoi buɔ wolo-kasemɔ akɛ ehe hiaa waa diɛŋtsɛ.