Suɔlɔ Nikanelɔ:

‘Ba ni obanyiɛ misɛɛ.’ (Marko 10:21) Eyɛ mli akɛ mɔ aŋkro ko Yesu Kristo kɛwie wiemɔi nɛɛ moŋ, shi ninefɔ̃ɔ nɛɛ kɔɔ wɔ hu wɔhe. Ani oohere eninefɔ̃ɔ lɛ nɔ? Kɛ́ ofee nakai lɛ, ebaaná oshihilɛ nɔ hewalɛ yɛ gbɛ kpakpa nɔ. Mɛni hewɔ?

Yehowa tsu e-Bi koome lɛ kɛba shikpɔŋ lɛ nɔ koni ekɛ ewala abaha akɛ kpɔ̃mɔnɔ. (Yohane 3:16) Kɛfata gbo ni Bi lɛ bagbo yɛ wɔhewɔ lɛ he lɛ, etsɔɔ wɔ bɔ ni esa akɛ wɔhi shi wɔha. Etee nɔ eye anɔkwa yɛ nɔ fɛɛ nɔ ni efee lɛ mli, ni no ha e-Tsɛ lɛ tsui nyɔ emli. Agbɛnɛ hu, Yesu tsɔɔ wɔ bɔ ni wɔɔfee wɔtamɔ e-Tsɛ lɛ. Bi lɛ tsɔ ewiemɔi kɛ enifeemɔi anɔ eha ale Tsɛ lɛ gbɛi kɛ esuɔmɔnaa nii jogbaŋŋ kɛmɔ shi.​—Yohane 14:9.

Biblia lɛ kɛɔ akɛ, Yesu ji ‘nɔkwɛmɔnɔ kɛha wɔ, koni wɔnyiɛ enanemaahei lɛ asɛɛ.’ (1 Petro 2:21, Ga Biblia hee) Kɛ́ wɔmiisumɔ ni wɔbɛŋkɛ Yehowa kpaakpa, kɛ́ wɔmiisumɔ ni wɔtsui anyɔ wɔmli diɛŋtsɛ yɛ shihilɛ mli amrɔ nɛɛ, ni agbɛnɛ hu, kɛ́ wɔmiisumɔ ni wɔya nɔ wɔnyiɛ gbɛ ni kɛ mɔ yaa naanɔ wala mli lɛ nɔ lɛ, no lɛ esa akɛ wɔnyiɛ Kristo nanemaahei lɛ asɛɛ kpaakpa.

Bɔni afee ni wɔnyɛ wɔje gbɛfãa nɛɛ shishi lɛ, esa akɛ wɔle Yesu shikpɔŋ lɛ nɔ shihilɛ lɛ he saji. No hewɔ lɛ, esa akɛ wɔkase Yesu he saji ni yɔɔ Biblia lɛ mli lɛ jogbaŋŋ. Kɛ́ wɔjwɛŋ nibii ni Yesu wie kɛ nibii ni efee lɛ anɔ, ni wɔsusu bɔ ni wɔɔfee wɔkase lɛ yɛ wɔwiemɔi kɛ wɔnifeemɔi amli lɛ he lɛ, ebaaye ebua wɔ koni wɔnyɛ wɔnyiɛ esɛɛ jogbaŋŋ.

Eba akɛ wolo nɛɛ baaye abua bo koni suɔmɔ ni oyɔɔ kɛha Yesu kɛ Yehowa lɛ mli awa waa. Ni eba akɛ suɔmɔ nɛɛ baatsirɛ bo koni oya nɔ onyiɛ Yesu nanemaahei lɛ asɛɛ kpaakpa bɔni afee ni no aha Yehowa tsui anyɔ emli amrɔ nɛɛ kɛ agbɛnɛ hu kɛya naanɔ.