1-3. (a) Mɛɛ gbɛ nɔ Yesu tsɔ eshi ebɔfoi lɛ, ni mɛni hewɔ enɛ jeee shɛɛyeli ni dɔɔ mɔ loo ehaa mɔ nuɔ he akɛ efee shwɛm lɛ? (b) Mɛni hewɔ esa akɛ wɔle nibii ni etee nɔ yɛ Yesu shihilɛ mli kɛjɛ beni eku esɛɛ kɛtee ŋwɛi lɛ kɛbashi bianɛ lɛ?

 HII nyɔŋma kɛ ekome ebua amɛhe naa yɛ gɔŋ ko nɔ. Amɛkɛ miishɛɛ kpele miikwɛ mɔ ni gbe amɛyi feɔ 12 lɛ, ni amɛsumɔɔ mɔ nɛɛ waa. Mɔ nɛɛ tamɔ gbɔmɔ, shi yɛ anɔkwale mli lɛ, Yesu ni atee lɛ shi lɛ ni, shikome ekoŋŋ lɛ, ebatsɔ Yehowa mumɔŋ bii lɛ ateŋ mɔ ni he wa fe fɛɛ. Yesu kɛ ebɔfoi lɛ ekpe naagbee nɔ kwraa yɛ Mu Gɔŋ lɛ nɔ.

² Kidron Jɔɔ lɛ kã gɔŋ nɛɛ kɛ Yerusalem teŋ, ni ekã shi faŋŋ akɛ gɔŋ nɛɛ haa Yesu kaiɔ nibii babaoo. Betania, maŋ ni Yesu tee Lazaro shi yɛ mli lɛ, kã gɔŋ nɛɛ masɛi. Otsii fioo ni tsɔ gbi nɛɛ hiɛ lɛ, Yesu ta teji nɔ akɛ kunimyelɔ kɛjɛ Betfage ni bɛŋkɛ Yerusalem lɛ kɛtee Yerusalem. Eeenyɛ efee akɛ, Getsemane abɔɔ lɛ, ni ji he ni Yesu yashi kpe ŋmɛlɛtswai abɔ ni ehe jara lɛ yɛ dani amɔ lɛ lɛ, yɛ Mu Gɔŋ lɛ nɔ. Agbɛnɛ, Yesu kɛ enanemɛi ni bɛŋkɛ lɛ kpaakpa kɛ esɛɛnyiɛlɔi lɛ miiba abaye shɛɛ yɛ gɔŋ nɛɛ nɔŋŋ nɔ. Ekɛ amɛ ye shɛɛ kɛ mlihilɛ wiemɔi. Kɛkɛ ni ebɔi kwɔɔ kɛ ŋwɛi yaa kɛjɛ shikpɔŋ lɛ nɔ! Bɔfoi lɛ damɔ shi yɛ jɛmɛ ni ehiii amɛhe tsimɔ, ni amɛmiikwɛ amɛ-Nuŋtsɔ ni amɛsumɔɔ lɛ waa lɛ gãa ni eebote atatui lɛ amli. Naagbee lɛ atatui lɛ ha ehe ni amɛnaaa lɛ dɔŋŋ.​—Bɔfoi lɛ Asaji 1:6-12.

³ Ani enɛ tamɔ shɛɛyeli ni yɔɔ miishɛɛ kɛ awerɛho fɛɛ, nɔ ni dɔɔ mɔ loo ehaa mɔ nuɔ he akɛ efee shwɛm? Dabi kwraa. Yɛ anɔkwale mli lɛ, ŋwɛibɔfoi enyɔ kai Yesu bɔfoi lɛ yɛ nakai beaŋ akɛ Yesu he sane lɛ bako naagbee. (Bɔfoi lɛ Asaji 1:10, 11) Yɛ gbɛi babaoo anɔ lɛ, shi ni eshi kɛtee ŋwɛi lɛ ji shishijee kɛkɛ. Nyɔŋmɔ Wiemɔ lɛ shiii wɔ efolo yɛ nɔ  ni ba Yesu nɔ yɛ enɛ sɛɛ lɛ he. Ehe miihia akɛ wɔɔle nibii ni etee nɔ yɛ Yesu shihilɛ mli kɛjɛ beni eshi shikpɔŋ lɛ nɔ lɛ kɛbashi bianɛ. Mɛni hewɔ? Kaimɔ wiemɔi ni Yesu kɛ Petro wie lɛ, ekɛɛ lɛ akɛ: “Nyiɛmɔ misɛɛ!” (Yohane 21:19, 22) Esa akɛ wɔ fɛɛ wɔbo fãmɔ nɛɛ toi, jeee akɛ wɔbaafee nakai be kukuoo ko kɛkɛ, shi wɔwala gbii fɛɛ. Bɔni afee ni wɔfee nakai lɛ, esa akɛ wɔnu nɔ ni wɔ-Nuŋtsɔ lɛ feɔ amrɔ nɛɛ kɛ nitsumɔi ni akɛwo edɛŋ yɛ ŋwɛi lɛ ashishi.

4. Mɛɛ gbɛ nɔ Biblia lɛ tsɔ hiɛ etsɔɔ nɔ ni baaba yɛ ŋwɛi kɛ́ Yesu ku esɛɛ kɛtee jɛmɛ nɔŋŋ lɛ?

⁴ Ŋmalɛ lɛ ewieee bɔ ni ahere Yesu aha beni eyapue yɛ ŋwɛi lɛ, kɛ miishɛɛ ni ená beni ekɛ e-Tsɛ lɛ yafee ekome ekoŋŋ lɛ he nɔ ko. Shi, Biblia lɛ etsɔ hiɛ etsɔɔ nɔ ni baaba yɛ ŋwɛi kɛ́ Yesu ku esɛɛ kɛtee jɛmɛ nɔŋŋ lɛ. Ole nɔ ko, Yudafoi lɛ kɛ nɔ ni fa fe afii 1500 na nifeemɔ krɔŋkrɔŋ ko ni afɔɔ feemɔ yɛ sɔlemɔwe lɛ. Gbi kome yɛ daa afi mli lɛ, osɔfonukpa lɛ boteɔ He Krɔŋkrɔŋ Fe Fɛɛ lɛ koni ekɛ kooloi ni akɛshãa afɔlei yɛ Kpatamɔ Gbi lɛ nɔ lɛ alá ayashwã kpaŋmɔ adeka lɛ hiɛ. Yɛ nakai gbi lɛ nɔ lɛ, osɔfonukpa lɛ feɔ Mesia lɛ he mfoniri. Yesu ha nakai gbalɛ mli nifeemɔ lɛ ba mli shikome nyɔŋlo beni eku esɛɛ kɛtee ŋwɛi lɛ. Eyapue yɛ Yehowa anunyam lɛ hiɛ yɛ ŋwɛi​—he krɔŋkrɔŋ fe fɛɛ yɛ jeŋ muu lɛ fɛɛ mli lɛ​—ni eŋɔ ekpɔmɔ afɔleshãa lɛ jara lɛ eha e-Tsɛ lɛ. (Hebribii 9:11, 12, 24) Ani Yehowa kpɛlɛ nɔ?

5, 6. (a) Mɛɛ odaseyeli tsɔɔ akɛ Yehowa ekpɛlɛ Kristo kpɔmɔ afɔleshãa lɛ nɔ lɛ? (b) Namɛi náa kpɔmɔnɔ lɛ he sɛɛ, ni yɛ mɛɛ gbɛ nɔ?

⁵ Wɔbaana hetoo lɛ kɛ́ wɔsusu nɔ ni ba beni Yesu kwɔ kɛtee ŋwɛi lɛ sɛɛ gbii fioo lɛ he lɛ. No mli lɛ, Kristofoi akuu fioo ko, aaafee mɛi 120 ebua amɛhe naa yɛ ŋwɛitsu ko nɔ, kɛkɛ ni trukaa lɛ gbɛɛmɔ ko ni tamɔ ahum ni tswaa waa bayi he ni amɛtara lɛ fɛɛ obɔ̃. Ni lilɛii ni tamɔ lalilɛii batara amɛyiteaŋ, ni mumɔ krɔŋkrɔŋ bayimɔ amɛ fɛɛ amɛmli  obɔbɔ, ni amɛbɔi wiemɔi srɔtoisrɔtoi awiemɔ. (Bɔfoi lɛ Asaji 2:1-4) Nifeemɔ nɛɛ ji odaseyeli ni tsɔɔ akɛ ato maŋ hee ko, ni ji mumɔŋ Israel lɛ shishi, ni maŋ nɛɛ ji “weku” hee ni Nyɔŋmɔ ‘ehala’ kɛ “maŋtsɛmɛi ní yeɔ osɔfoi” koni amɛfee Nyɔŋmɔ suɔmɔnaa nii yɛ shikpɔŋ lɛ nɔ. (1 Petro 2:9) Ekã shi faŋŋ akɛ, Yehowa Nyɔŋmɔ ekpɛlɛ Kristo kpɔmɔ afɔleshãa lɛ nɔ, ni ená he miishɛɛ. Mumɔ krɔŋkrɔŋ ni afɔse nɛɛ fata klɛŋklɛŋ jɔɔmɔi ni jɛ kpɔmɔnɔ lɛ mli kɛba lɛ ahe.

⁶ Kɛjɛ nakai beaŋ kɛbaa nɛɛ, Kristo kpɔmɔnɔ lɛ he eba sɛɛnamɔ kɛha esɛɛnyiɛlɔi ni yɔɔ jeŋ fɛɛ lɛ. Kɛji wɔji “asafoku bibioo” ni afɔ amɛ mu ni kɛ Kristo baaye nɔ yɛ ŋwɛi lɛ mlibii jio, wɔfata “tooi krokomɛi” ni baahi enɔyeli lɛ shishi yɛ shikpɔŋ lɛ nɔ lɛ ahe jio, wɔ fɛɛ wɔnáa efɔleshãa lɛ he sɛɛ. (Luka 12:32; Yohane 10:16) Kpɔmɔnɔ lɛ hewɔ wɔyɔɔ hiɛnɔkamɔ lɛ, ni no hewɔ wɔnáa eshaifaa lɛ. Kɛ́ wɔtee nɔ wɔná hemɔkɛyeli yɛ kpɔmɔnɔ lɛ mli, ni wɔnyiɛ Yesu sɛɛ daa gbi lɛ, wɔbaaná henilee kpakpa kɛ hiɛnɔkamɔ ni yɔɔ miishɛɛ kɛha wɔsɛɛ.​—Yohane 3:16.

7. Mɛɛ hegbɛ aŋɔha Yesu beni eku esɛɛ kɛtee ŋwɛi lɛ, ni te ooofee tɛŋŋ ofi esɛɛ lɛ?

⁷ Mɛni Yesu feɔ yɛ ŋwɛi kɛjɛ beni eku esɛɛ etee jɛmɛ lɛ? Aŋɔ hegbɛ kpele aha lɛ. (Mateo 28:18) Yɛ anɔkwale mli lɛ, Yehowa ehala lɛ koni eye Kristofoi asafo lɛ nɔ, ni etee nɔ etsu nitsumɔ nɛɛ yɛ suɔmɔ mli kɛ jalɛ gbɛ nɔ. (Kolosebii 1:13) Taakɛ agba afɔ̃ shi lɛ, Yesu halaa hii ni sa koni amɛkwɛ etooku lɛ. (Efesobii 4:8) Ákɛ nɔkwɛmɔnɔ lɛ, ehala Paulo akɛ “jeŋmaji abɔfo” koni eshiɛ sanekpakpa lɛ yɛ maji babaoo anɔ. (Romabii 11:13; 1 Timoteo 2:7) Beni eshwɛ fioo ni klɛŋklɛŋ afii 100 lɛ baaba naagbee lɛ, Yesu kɛ shɛɛ saji ni kɔɔ yijiemɔ, ŋaawoo, kɛ jajemɔ he maje asafoi kpawo ni yɔɔ Asia, ni ji kpokpaa ni yɔɔ Roma nɔyeli lɛ shishi lɛ. (Kpojiemɔ, yitso 2 kɛyashi yitso 3) Ani okpɛlɛɔ Yesu nɔ akɛ Kristofoi asafo lɛ Yitso? (Efesobii 5:23) Kɛ́ ootao onyiɛ esɛɛ daa lɛ,  esa akɛ ofee toiboo ni okɛ asafo ni oyɔɔ mli lɛ mlibii lɛ afee ekome.

8, 9. Mɛɛ hegbɛ aŋɔha Yesu yɛ afi 1914 mli, ni te esa akɛ enɛ asa wɔyiŋkpɛi ahe eha tɛŋŋ?

⁸ Aŋɔ hegbɛ kroko hu aha Yesu yɛ afi 1914 lɛ mli. Yɛ nakai afi lɛ mli lɛ, awo lɛ Yehowa Mesia Maŋtsɛyeli lɛ nɔ Maŋtsɛ. Beni Yesu bɔi nɔyeli lɛ, “ta te shi yɛ ŋwɛi.” Mɛni jɛ mli kɛba? Ashɛrɛ Satan kɛ edaimonioi lɛ ashwie shikpɔŋ lɛ nɔ, ni no kɛ amanehulu babaoo ba shikpɔŋ lɛ nɔ kɛjɛ nakai beaŋ kɛbaa. Tai, awuiyelii, yiwalɛ nifeemɔi, helai, shikpɔŋhosomɔi, kɛ hɔji ni ehe shi babaoo ni adesai kɛkpeɔ ŋmɛnɛ lɛ haa wɔnaa akɛ Yesu miiye nɔ yɛ ŋwɛi amrɔ nɛɛ. Satan kã he eji “je nɛŋ lumɔ lɛ,” ni “be fioo kɛkɛ eyɔɔ.” (Kpojiemɔ 12:7-12; Yohane 12:31; Mateo 24:3-7; Luka 21:11) Shi kɛlɛ, Yesu kɛ hegbɛ miiha adesai ni yɔɔ je lɛŋ fɛɛ ni amɛkpɛlɛ E-nɔyeli lɛ nɔ.

⁹ Ehe miihia waa ni wɔkpɛ wɔyiŋ akɛ wɔbaafi Mesia Maŋtsɛ lɛ sɛɛ. Kɛ́ wɔmiikpɛ wɔyiŋ yɛ wɔdaa gbi nifeemɔi ahe lɛ, esa akɛ wɔyiŋkpɛi lɛ afee nɔ ni baasa ehiɛ, shi jeee jeŋ ni ekpɔtɔ nɛɛ hiɛ. Kɛ́ ‘maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ’ lɛ kwɛ adesai lɛ, nibii komɛi ni enaa lɛ haa emli fuɔ yɛ gbɛ ni ja nɔ, nakai beaŋ nɔŋŋ lɛ, nibii komɛi ni enaa lɛ hu haa enáa miishɛɛ waa. (Kpojiemɔ 19:16) Mɛni hewɔ?

10. Mɛɛ mɔ nɛkɛ Yesu ji, kɛlɛ, mɛɛ nibii haa wɔ-Nuŋtsɔ lɛ mli fuɔ yɛ jalɛ gbɛ nɔ?

¹⁰ Wɔ-Nuŋtsɔ lɛ yɛ miishɛɛ be fɛɛ be taakɛ e-Tsɛ lɛ ji lɛ. (1 Timoteo 1:11, NW) Beni Yesu yɔɔ shikpɔŋ lɛ nɔ lɛ, ejeee mɔ ni wieɔ nii ahe nyanyaanya loo mɔ ni sane wa. Kɛlɛ, nibii babaoo miiya nɔ yɛ shikpɔŋ lɛ nɔ ŋmɛnɛ ni haa emli fuɔ waa yɛ jalɛ gbɛ nɔ. Ekã shi faŋŋ akɛ, emli efu jamɔi srɔtoi fɛɛ ni kwaa amɛtsɛɔ amɛhe esɛɛnyiɛlɔi lɛ. Ewie lɛɛlɛŋ  akɛ: “Jeee mɔ fɛɛ mɔ ni kɛɔ mi akɛ: Nuŋtsɔ, Nuŋtsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: Nuŋtsɔ, Nuŋtsɔ! ani jeee bo ogbɛi lɛ mli . . . wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”​—Mateo 7:21-23.

11-13. Mɛni hewɔ mɛi komɛi ahiɛ baafee amɛ yaa yɛ wiemɔi ni wa ni Yesu wie eshi mɛi ni feɔ “hewalɛ nibii pii” yɛ egbɛ́i amli lɛ, ni kɛlɛ, mɛni hewɔ Yesu mli efu lɛ? Okɛ enɛ he nɔkwɛmɔnɔ aha.

¹¹ Ŋmɛnɛ lɛ, mɛi babaoo ni tsɛɔ amɛhe Kristofoi lɛ ahiɛ baafee amɛ yaa yɛ nakai wiemɔi lɛ ahewɔ. Mɛni hewɔ Yesu baawie wiemɔi ni wa nɛɛ eshi mɛi ni feɔ “hewalɛ nibii pii” yɛ egbɛ́i amli lɛ? Kristendom sɔlemɔi lɛ efi yelikɛbuamɔ kui asɛɛ, amɛye amɛbua ohiafoi, amɛmamɔ helatsamɔhei kɛ skul srɔtoi, ni amɛfee nibii krokomɛi babaoo hu. Bɔni afee ni wɔna nɔ hewɔ ni Yesu mli efu amɛ lɛ, nyɛhaa wɔsusua nɔkwɛmɔnɔ ko he wɔkwɛa.

¹² Nuu ko kɛ eŋa miifã gbɛ. Akɛni amɛnyɛŋ amɛkɛ amɛbii lɛ aya hewɔ lɛ, amɛbɔ mɔ ko apaa koni ekwɛ amɛbii lɛ eha amɛ. Amɛkɛ gbɛtsɔɔmɔ ni yɔɔ mlɛo nɛɛ ha mɔ lɛ akɛ: “Kwɛmɔ wɔbii lɛ. Ha amɛ niyenii, ju amɛhe, ni obu amɛhe.” Shi, beni fɔlɔi lɛ ku amɛsɛɛ amɛba ni amɛbana akɛ hɔmɔ miiye amɛbii lɛ waa lɛ, amɛnaa kpɛ amɛhe. Amɛbii lɛ ahe ewo muji, amɛhe miiye, ni amɛfee mɔbɔ mɔbɔ. Amɛmiifo koni mɔ ni kwɛɔ amɛ lɛ abakwɛ amɛ, shi efooo amɛdaaŋ. Mɛni hewɔ? No mli lɛ edamɔ aŋtswele nɔ eetsumɔ samfɛji lɛ ahe. Fɔlɔi lɛ kɛ mlifu bi lɛ sane. Eha amɛ hetoo akɛ: “Nyɛkwɛa nibii pii ni mitsu! Ani nyɛnaaa bɔ ni samfɛji lɛ ahe etse? Agbɛnɛ hu, misaa shĩa lɛ, mifee enɛɛmɛi fɛɛ miha nyɛ!” Ani enɛ baaha fɔlɔi lɛ aná miishɛɛ? Dabi kwraa! Jeee enɛ ji nɔ ni amɛkɛɛ lɛ akɛ etsu; nɔ ni amɛtaoɔ ni efee ji, ni ekwɛ amɛbii lɛ eha amɛ. Akɛni ebooo amɛgbɛtsɔɔmɔi lɛ atoi hewɔ lɛ, amɛmli fu lɛ waa.

 ¹³ Kristendom feɔ enii tamɔ gbekɛbii nɛɛ akwɛlɔ lɛ pɛpɛɛpɛ. Yesu kɛ gbɛtsɔɔmɔ ha enajiaŋdamɔlɔi lɛ koni amɛlɛ mɛi yɛ mumɔŋ kɛtsɔ Nyɔŋmɔ Wiemɔ lɛ mli anɔkwalei lɛ ni amɛaatsɔɔ amɛ, ni amɛye amɛbua amɛ ni amɛhe atse yɛ mumɔŋ lɛ nɔ. (Yohane 21:15-17) Kɛlɛ, Kristendom ekpoo egbɛtsɔɔmɔ lɛ kwraa. Amɛha mumɔŋ hɔmɔ miiye mɛi, ni tsɔɔ akɛ amɛha apasa tsɔɔmɔi efutu mɛi ayiŋ ni amɛleee Biblia mli shishijee anɔkwalei lɛ. (Yesaia 65:13; Amos 8:11) Enyɛŋ ekɛ mɔdɛŋ ni ebɔɔ akɛ ebaaha nibii ahi yɛ je lɛŋ lɛ ajie enaa yɛ toi ni eje gbɛ egbo lɛ he. Yɛ anɔkwale mli lɛ, je nɛɛ tamɔ tsũ ko ni ato akɛ abaakumɔ ashwie shi! Nyɔŋmɔ Wiemɔ lɛ feɔ lɛ faŋŋ akɛ, etsɛŋ ni abaakpata Satan je lɛ hiɛ.​—1 Yohane 2:15-17.

14. Mɛɛ nitsumɔ haa Yesu mii shɛɔ ehe ŋmɛnɛ, ni mɛni hewɔ?

¹⁴ Yɛ gbɛ kroko nɔ lɛ, kɛ́ Yesu jɛ ŋwɛi ena mɛi akpekpei abɔ ni miitsu kaselɔfeemɔ nitsumɔ ni ekɛwo esɛɛnyiɛlɔi lɛ adɛŋ dani eshi shikpɔŋ lɛ nɔ lɛ, enáa miishɛɛ naakpa. (Mateo 28:19, 20) Eji hegbɛ kpele ni wɔná akɛ wɔɔfata he kɛtsu nitsumɔ nɛɛ, ni wɔha Mesia Maŋtsɛ lɛ aná miishɛɛ! Nyɛhaa wɔtswaa wɔfai shi akɛ wɔbaaya nɔ wɔye wɔbua “tsulɔ anɔkwafo kɛ nilelɔ” lɛ. (Mateo 24:45) Ákɛ mɛi ni tamɔɔɔ Kristendom osɔfoi lɛ, kuu bibioo ni aná kɛjɛ nyɛmimɛi ni afɔ amɛ mu lɛ ateŋ nɛɛ etee nɔ amɛkɛ toiboo ekwɛ shiɛmɔ nitsumɔ lɛ nɔ, ni amɛlɛ Kristo tooi lɛ jogbaŋŋ.

15, 16. (a) Te Yesu nuɔ suɔmɔ ni mɛi ejieee lɛ kpo yɛ shikpɔŋ lɛ nɔ ŋmɛnɛ lɛ he ehaa tɛŋŋ, ni te wɔfeɔ tɛŋŋ wɔleɔ enɛ? (b) Mɛni hewɔ Yesu mli efu Kristendombii lɛ?

¹⁵ Wɔbaanyɛ wɔná nɔmimaa akɛ, Maŋtsɛ lɛ mli fuɔ waa kɛ́ ena bɔ ni mɛi ejieee suɔmɔ kpo kwraa yɛ shikpɔŋ lɛ nɔ ŋmɛnɛ lɛ. Ekolɛ wɔbaakai bɔ ni Farisifoi lɛ wie amɛshi Yesu beni etsa helai yɛ Hejɔɔmɔ Gbi lɛ nɔ lɛ. Amɛtsui wa waa, ni amɛkuɛŋ ti aahu akɛ amɛnyɛɛɛ amɛŋmɛɛ shishinumɔ ni ejaaa ni amɛhiɛ yɛ Mose Mla lɛ kɛ mlai ni akɛ naabu jaje lɛ he. Mɛi ná naakpɛɛ nii ni Yesu fee lɛ he sɛɛ babaoo! Shi  bɔ ni naakpɛɛ nii nɛɛ ha mɛi ná miishɛɛ, ni eha mɛi ahe jɔ amɛ, ni ewaje mɛi ahemɔkɛyeli lɛ shiii Farisifoi nɛɛ kpu po ni amɛtsake amɛjwɛŋmɔ. Te amɛnifeemɔ lɛ ha Yesu nu he eha tɛŋŋ? Be ko lɛ, ekwɛ “amɛhiɛaŋ kɛkpe kɛ mlifu, ejaakɛ edɔ lɛ akɛ amɛtsui wa nɛkɛ.”​—Marko 3:5.

¹⁶ Ŋmɛnɛ lɛ, Yesu naa nibii ni fe amɛnɔ lɛ, ni ‘edɔɔ lɛ’ waa. Kusum nifeemɔi kɛ tsɔɔmɔi ni damɔɔɔ Ŋmalɛ nɔ ni Kristendom hiɛnyiɛlɔi lɛ kɛ amɛhe kpɛtɛɔ he lɛ eshwila amɛ. Kɛfata he lɛ, Nyɔŋmɔ Maŋtsɛyeli lɛ he sanekpakpa lɛ ni ashiɛɔ lɛ hu woɔ amɛmli la. Yɛ je lɛŋ hei babaoo lɛ, osɔfoi lɛ woɔ mɛi ayiŋ koni amɛwa Kristofoi ni bɔɔ mɔdɛŋ akɛ amɛbaajɛ amɛtsuiŋ amɛshiɛ shɛɛ sane ni Yesu shiɛ lɛ ayi. (Yohane 16:2; Kpojiemɔ 18:4, 24) Yɛ nakai beaŋ nɔŋŋ lɛ, osɔfoi nɛɛ woɔ amɛwebii lɛ ahewalɛ koni amɛya ta ni amɛyagbe mɛi​—oookɛɛ nɔ ni nakai feemɔ baaha Yesu Kristo aná miishɛɛ!

17. Mɛɛ gbɛ nɔ Yesu anɔkwa sɛɛnyiɛlɔi lɛ haa etsui tɔɔ kɛ miishɛɛ?

¹⁷ Nɔ ni tamɔɔɔ nakai lɛ, Yesu anɔkwa sɛɛnyiɛlɔi lɛ bɔɔ mɔdɛŋ ni amɛjie suɔmɔ kpo amɛtsɔɔ amɛnaanyo gbɔmɔ. Taakɛ Yesu fee lɛ, amɛshiɛɔ sanekpakpa lɛ amɛtsɔɔ “gbɔmɛi fɛɛ” yɛ shiteekɛwoo ni amɛkɛkpeɔ lɛ fɛɛ sɛɛ. (1 Timoteo 2:4) Ni suɔmɔ ni amɛjieɔ lɛ kpo amɛtsɔɔ amɛhe lɛ nɔ bɛ; no ji nɔ titri ni kadiɔ amɛ. (Yohane 13:34, 35) Suɔmɔ, bulɛ, kɛ woo ni amɛjieɔ lɛ kpo amɛtsɔɔ amɛnyɛmimɛi Kristofoi lɛ tsɔɔ akɛ amɛnyiɛ Yesu sɛɛ lɛɛlɛŋ​—ni no haa Mesia Maŋtsɛ lɛ tsui tɔɔ kɛ miishɛɛ!

18. Mɛni haa wɔ-Nuŋtsɔ lɛ haoɔ, shi te wɔɔfee tɛŋŋ wɔha ená miishɛɛ lɛ?

¹⁸ Nyɛhaa ehia wɔjwɛŋmɔŋ hu akɛ, wɔ-Nuŋtsɔ lɛ haoɔ waa kɛ́ ena akɛ esɛɛnyiɛlɔi lɛ nyɛɛɛ amia amɛhiɛ kɛhiɛ suɔmɔ ni amɛyɔɔ kɛha Yehowa lɛ mli, ni no ha amɛkpa Yehowa sɔɔmɔ lɛ. (Kpojiemɔ 2:4, 5) Shi, Yesu náa mɛi ni hiɛɔ mli kɛyawulaa shi lɛ ahe miishɛɛ waa. (Mateo 24:13) Belɛ, bɔ fɛɛ bɔ ni fee lɛ, nyɛhaa Kristo famɔ akɛ: ‘Nyiɛmɔ misɛɛ!’ lɛ ahia  wɔjwɛŋmɔŋ be fɛɛ be. (Yohane 21:19) Nyɛhaa wɔsusua jɔɔmɔi ni Mesia Maŋtsɛ lɛ baaha mɛi ni hiɛɔ mli kɛyawulaa shi lɛ aná lɛ ateŋ ekomɛi ahe wɔkwɛa.

19, 20. (a) Kɛ́ wɔnyiɛ Yesu sɛɛ lɛ, mɛɛ jɔɔmɔi wɔbaaná bianɛ? (b) Mɛɛ gbɛ nɔ Kristo sɛɛ ni wɔɔnyiɛ lɛ baaha wɔná tsɛ ni he hiaa wɔ lɛ?

¹⁹ Kɛ́ wɔnyiɛ Yesu sɛɛ lɛ, wɔbaaná jɔɔmɔi pii bianɛ po. Kɛ́ wɔkpɛlɛ Kristo nɔ akɛ wɔ-Nuŋtsɔ, wɔkɛ egbɛtsɔɔmɔi lɛ tsu nii, ni wɔnyiɛ enɔkwɛmɔnɔ lɛ sɛɛ lɛ, wɔbaaná jɔɔmɔi ni mɛi ni yɔɔ je lɛŋ lɛ bɔɔ mɔdɛŋ akɛ amɛaaná, shi amɛnyɛŋ amɛná kɔkɔɔkɔ lɛ. Wɔbaatsu nitsumɔ ni sɛɛnamɔi yɔɔ he ni baaha wɔtsui anyɔ wɔmli yɛ shihilɛ mli, wɔbaafee Kristofoi aweku ni anɔkwa suɔmɔ ekpɛ amɛ ekome lɛ mlibii, wɔbaaná henilee kpakpa, ni wɔtoiŋ baajɔ wɔ. Yɛ kukufoo mli lɛ, wɔbaaná miishɛɛ babaoo ni wɔtsui baanyɔ wɔmli yɛ shihilɛ mli. Ni wɔbaaná jɔɔmɔi krokomɛi hu kɛfata he.

²⁰ Yehowa eŋɔ Yesu efee mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ ‘a-Naanɔ Tsɛ.’ Yesu miiye wɔ-klɛŋklɛŋ tsɛ ni ji Adam ni ha eshwiei ni ji adesai fɛɛ anine nyɛ shi yɛ gbɛ ni yɔɔ mɔbɔ nɔ lɛ najiaŋ. (Yesaia 9:5, 6) Kɛ́ wɔkpɛlɛ Yesu nɔ akɛ ‘wɔ-Naanɔ Tsɛ,’ ni wɔná hemɔkɛyeli yɛ emli lɛ, no baaha wɔná hiɛnɔkamɔ ni mli wa akɛ wɔbaahi shi kɛya naanɔ. Kɛfata he lɛ, no baaha wɔbɛŋkɛ Yehowa Nyɔŋmɔ kpaakpa. Taakɛ wɔkase kɛtsɔ hiɛ lɛ, mɔdɛŋ ni wɔbɔɔ akɛ wɔɔnyiɛ Yesu sɛɛ daa gbi lɛ ji gbɛ ni fe fɛɛ ni wɔɔtsɔ nɔ wɔbo Nyɔŋmɔ famɔ akɛ, “Nyɛfea nyɛhe mɛi ni kaseɔ Nyɔŋmɔ, akɛ bii ni asumɔɔ” lɛ toi.​—Efesobii 5:1, Ga Biblia hee.

21. Mɛɛ gbɛ nɔ Kristo sɛɛnyiɛlɔi lɛ haa la kpɛɔ yɛ jeŋ ni mli ewo duŋ mli?

²¹ Beni wɔyaa nɔ wɔkaseɔ Yesu kɛ e-Tsɛ Yehowa lɛ, no haa wɔfeɔ nɔ ko ni nɔ bɛ. Wɔhaa la ko kpɛɔ waa. Wɔyɛ jeŋ ni mli ewo duŋ kpii, ni Satan elaka mɛi akpekpe toi akpei  abɔ ní amɛkaseɔ esui lɛ mli, shi wɔ mɛi ni wɔnyiɛɔ Kristo sɛɛ lɛ haa la ko kpɛɔ waa kɛyaa shɔŋŋ​—la nɛɛ ji Ŋmalɛ mli anɔkwalei lɛ, Kristofoi ajeŋba kpakpai, anɔkwa miishɛɛ, anɔkwa toiŋjɔlɛ, kɛ suɔmɔ krɔŋŋ. Yɛ nakai beaŋ nɔŋŋ lɛ, wɔtsiɔ wɔbɛŋkɛɔ Yehowa kpaakpa, ni no ji oti ni he hiaa fe fɛɛ ni adesa loo ŋwɛibɔfo ko baasumɔ ni eshɛ he.

22, 23. (a) Mɛɛ jɔɔmɔi mɛi ni yaa nɔ amɛkɛ anɔkwayeli nyiɛɔ Yesu sɛɛ lɛ baaná wɔsɛɛ? (b) Mɛni esa akɛ wɔtswa wɔfai shi akɛ wɔbaafee?

²² Agbɛnɛ hu, susumɔ nɔ ni Yehowa sumɔɔ ni etsɔ e-Mesia Maŋtsɛ lɛ nɔ efee eha bo wɔsɛɛ lɛ he okwɛ. Etsɛŋ, Maŋtsɛ nɛɛ baafã jalɛ ta eshi Satan gbɛjianɔtoo fɔŋ lɛ. Bɔ fɛɛ bɔ ni fee lɛ, Yesu baaye kunim! (Kpojiemɔ 19:11-15) No sɛɛ lɛ,  Kristo baaje shishi eye shikpɔŋ lɛ nɔ afii akpe. Eŋwɛi nɔyeli lɛ baaha adesai anɔkwafoi fɛɛ aná kpɔmɔnɔ lɛ he sɛɛ, ni ebaaha amɛye emuu. Feemɔ ohe mfoniri akɛ oyɛ gbɔmɔtsoŋ hewalɛ kpakpa, oji oblanyo ni yɔɔ hewalɛ, ni ofata adesai aweku ni efee ekome lɛ he ni nyɛkɛ miishɛɛ miitsu nii koni nyɛha shikpɔŋ lɛ atsɔ paradeiso! Kɛ́ Yesu Afii Akpe Nɔyeli lɛ ba naagbee lɛ, ebaaŋɔ nɔyeli lɛ eha e-Tsɛ ekoŋŋ. (1 Korintobii 15:24) Kɛ́ otee nɔ okɛ anɔkwayeli nyiɛ Kristo sɛɛ lɛ, obaaná jɔɔmɔi ni nɔ bɛ ni ojwɛŋmɔ tete nyɛŋ ashɛ he​—no ji “Nyɔŋmɔ bii lɛ anunyam heyeli lɛ”! (Romabii 8:21) Hɛɛ, wɔbaaná jɔɔmɔi fɛɛ ni ŋmɛɛ Adam kɛ Hawa lɛ. Yehowa bihii kɛ biyei ni yɔɔ shikpɔŋ lɛ nɔ lɛ fɛɛ baaye amɛhe kwraa kɛjɛ Adam esha ni etsɔ tamɔ atswã yɛ amɛhe lɛ he kɛya naanɔ. Lɛɛlɛŋ, ‘gbele ehiŋ shi dɔŋŋ.’​—Kpojiemɔ 21:4.

²³ Kaimɔ nakai oblanyo niiatsɛ ni ji maŋ onukpa ni wɔsusu ehe yɛ Yitso 1 lɛ mli lɛ. Ekpoo Yesu ninefɔ̃ɔ akɛ, ‘ba ni obanyiɛ misɛɛ’ lɛ. (Marko 10:17-22) Kaaha eba lɛ nakai yɛ ogbɛfaŋ kɔkɔɔkɔ! Eba akɛ okɛ miishɛɛ kɛ ekãa baakpɛlɛ Yesu ninefɔ̃ɔ lɛ nɔ. Eba akɛ, obaatswa ofai shi akɛ obaahiɛ mli kɛyawula shi, ni obaaya nɔ onyiɛ Tookwɛlɔ Kpakpa lɛ sɛɛ daa kɛ daa, koni beni yi aaawula shi lɛ, ohi shi ni ona beni Yesu haa Yehowa yiŋtoi fɛɛ baa mli kɛmɔɔ shi lɛ!