1, 2. Mɛni ji ninefɔ̃ɔ ni hi fe fɛɛ ni adesai anine baanyɛ ashɛ nɔ, ni mɛɛ sane wɔbaanyɛ wɔbi wɔhe?

 MƐƐ ninefɔ̃ɔ ko oná he miishɛɛ fe fɛɛ beni onine shɛ nɔ lɛ? Ekolɛ nɔ ni baaba ojwɛŋmɔŋ ji beni afɔ̃ bo nine kɛtee nifeemɔ krɛdɛɛ ko shishi, loo beni mɛi enyɔ komɛi ni osumɔɔ amɛsane waa lɛ boteɔ gbalashihilɛ mli lɛ. Aloo ekolɛ obaakai gbi ni afɔ̃ bo nine ni obatsu nitsumɔ krɛdɛɛ ko lɛ. Kɛ́ onine eshɛ ninefɔ̃ɔ ni tamɔ nɛkɛ nɔ pɛŋ lɛ, ŋwanejee ko bɛ he akɛ oná miishɛɛ waa, ni onu he po akɛ eji hegbɛ kpele ni oná. Shi, anɔkwa sane ji akɛ, onine eshɛ ninefɔ̃ɔ ko ni hi kwraa fe enɛɛmɛi anɔ. Wɔteŋ mɔ fɛɛ mɔ nine eshɛ nakai ninefɔ̃ɔ lɛ nɔ. Ni bɔ ni wɔhereɔ ninefɔ̃ɔ nɛɛ nɔ wɔhaa lɛ náa wɔnɔ hewalɛ waa diɛŋtsɛ. No ji yiŋ ni he hiaa fe fɛɛ ni wɔbaanyɛ wɔkpɛ yɛ shihilɛ mli.

² Mɛni ji nakai ninefɔ̃ɔ lɛ? Eji ninefɔ̃ɔ ni jɛ Yesu Kristo, ni ji Yehowa Nyɔŋmɔ Ofe lɛ Bi koome lɛ ŋɔɔ, ni anaa enɛ yɛ Biblia lɛ mli. Yɛ Marko 10:21 lɛ, Yesu wie akɛ: ‘Ba ni obanyiɛ misɛɛ.’ Eyɛ mli akɛ mɔ aŋkro ko Yesu kɛwie lɛ moŋ, shi ninefɔ̃ɔ nɛɛ kɔɔ wɔteŋ mɔ fɛɛ mɔ he. Ehi jogbaŋŋ akɛ wɔɔbi wɔhe akɛ, ‘Te mafee minii yɛ he maha tɛŋŋ?’ Ekolɛ obaabi akɛ: Namɔ baakpoo ninefɔ̃ɔ ni tamɔ nɛkɛ? Naakpɛɛ sane ji akɛ, mɛi babaoo kpoɔ. Mɛni hewɔ?

3, 4. (a) Mɛɛ nibii komɛi nuu ni yabi Yesu naanɔ wala he sane lɛ yɔɔ ni ekolɛ mɛi shweɔ waa ni amɛná eko? (b) Mɛɛ sui kpakpai ekolɛ Yesu na yɛ oblanyo niiatsɛ ni ji maŋ onukpa lɛ he?

³ Ákɛ nɔkwɛmɔnɔ lɛ, susumɔ nuu ko ni Yesu diɛŋtsɛ fɔ̃ lɛ nine aaafee afii 2,000 ni eho nɛ lɛ he okwɛ. Eji nuu ko ni  abuɔ lɛ waa. Kɛ hooo kwraa lɛ, eyɛ nibii etɛ ni adesai buɔ waa, ni amɛshweɔ po ni amɛná eko​—eji oblanyo, eyɛ nii babaoo, ni eyɛ hegbɛ. Biblia lɛ wie ehe akɛ eji “oblanyo,” “eyɛ nii babaoo” ni eji maŋ “onukpa.” (Mateo 19:20; Luka 18:18, 23) Shi kɛlɛ, oblanyo nɛɛ yɛ su ko ni he hiaa waa. No mli lɛ, enu Yesu ni ji Tsɔɔlɔ Kpele lɛ he, ni enya nibii ni enu yɛ ehe lɛ ahe waa.

⁴ Maŋ onukpai ni hi shi yɛ nakai beaŋ lɛ ateŋ mɛi babaoo ejieee bulɛ kpo amɛtsɔɔɔ Yesu. (Yohane 7:48; 12:42) Shi maŋ onukpa nɛɛ efeee nakai. Biblia lɛ kɛɔ wɔ akɛ: “Beni [Yesu je] kpo eyaa gbɛ lɛ nɔ lɛ, mɔ ko hiɛ foi kɛbanina lɛ ni ebakula ehiɛ, ni ebi lɛ akɛ: Tsɔɔlɔ kpakpa, mɛni mafee ni maná naanɔ wala?” (Marko 10:17) Kadimɔ bɔ ni nuu nɛɛ taoɔ waa ni ekɛ Yesu awie lɛ, ehiɛ foi kɛnyiɛ mɛi lɛ ateŋ kɛyanina Yesu tamɔ bɔ ni ekolɛ ohiafoi loo mɛi ni baa shi lɛ ateŋ mɔ ko baafee lɛ. Kɛfata he lɛ, ekɛ bulɛ kula shi yɛ Kristo hiɛ. Enɛ tsɔɔ akɛ, ebaa ehe shi ni esusuɔ emumɔŋ hiamɔ nii ahe. Yesu nya sui kpakpai ni tamɔ nɛkɛ lɛ ahe waa. (Mateo 5:3; 18:4) Belɛ, ebɛ naakpɛɛ mɔ akɛ “Yesu kwɛ lɛ ni esumɔ lɛ.” (Marko 10:21) Te Yesu ha oblanyo lɛ sanebimɔ lɛ hetoo eha tɛŋŋ?

5. Te Yesu ha oblanyo niiatsɛ lɛ hetoo eha tɛŋŋ, ni te wɔfeɔ tɛŋŋ wɔleɔ akɛ jeee ohiafo ni nuu lɛ baatsɔ lɛ ji “nɔ kome” ni eshwɛ lɛ lɛ? (Kwɛmɔ shishigbɛ niŋmaa lɛ hu.)

⁵ Yesu tsɔɔ akɛ, e-Tsɛ lɛ etsɔ hiɛ ekɛ saji babaoo eha yɛ sanebimɔ ni he hiaa waa ni kɔɔ bɔ ni aaafee aná naanɔ wala lɛ he lɛ he. Etsɛ Ŋmalɛi lɛ ayisɛɛ, ni oblanyo lɛ ma nɔ mi akɛ eyeɔ Mose Mla lɛ fɛɛ nɔ jogbaŋŋ. Shi, Yesu kɛ enilee ni fe adesai anɔ lɛ tsu nii kɛna nɔ ni yɔɔ nuu lɛ tsuiŋ tɔ̃ɔ. (Yohane 2:25) Ena akɛ maŋ onukpa nɛɛ yɛ naagba ko ni yɔɔ hiɛdɔɔ, ni no esa ekɛ Nyɔŋmɔ teŋ wekukpãa lɛ he. No hewɔ lɛ, Yesu kɛɛ lɛ akɛ: “Eshwɛo nɔ kome.” Mɛni ji nakai “nɔ kome” lɛ? Yesu kɛɛ lɛ akɛ: “Yaa ni oyahɔɔ nii fɛɛ ni oyɔɔ, ni  oŋɔha ohiafoi.” (Marko 10:21) Ani Yesu miitsɔɔ akɛ esa akɛ mɔ ko aye ohia futaa dani enyɛ esɔmɔ Nyɔŋmɔ? Dabi. a No mli lɛ, Kristo miiwie nɔ ko ni he hiaa waa he.

6. Mɛɛ hegbɛ Yesu kɛfɔ̃ oblanyo niiatsɛ ni ji maŋ onukpa lɛ hiɛ, ni mɛni enifeemɔ lɛ ha ana yɛ etsui mli?

⁶ Bɔni afee ni Yesu atsɔɔ nuu lɛ nɔ ni shwɛɔ lɛ lɛ, ekɛ hegbɛ ni nɔ bɛ nɛɛ fɔ̃ ehiɛ akɛ: ‘Ba ni obanyiɛ misɛɛ.’ Bo lɛ susumɔ he okwɛ​—Nyɔŋmɔ Ofe lɛ Bi lɛ fɔ̃ nuu nɛɛ nine hiɛ-kɛ-hiɛ akɛ ebanyiɛ esɛɛ! Agbɛnɛ hu, Yesu wo lɛ shi akɛ ebaaná jɔɔmɔ ni nɔ bɛ. Yesu kɛɛ lɛ akɛ: “Oooná jwetri yɛ ŋwɛi.” Ani oblanyo niiatsɛ ni ji maŋ onukpa nɛɛ kpɛlɛ ninefɔ̃ɔ ni yɔɔ nyam nɛɛ nɔ? Amaniɛbɔɔ lɛ kɛɔ akɛ: “Efee yɔɔ yɛ nakai wiemɔ lɛ hewɔ, ni eyiŋ etee kɛ dɔlɛ, ejaakɛ eyɛ nii babaoo.” (Marko 10:21, 22) No hewɔ lɛ, nɔ ni Yesu wie ni nuu lɛ nyaaa he lɛ ha ana akɛ eyɛ naagba ko yɛ etsuiŋ. Edɔɔ nibii ni eyɔɔ lɛ, kɛ hegbɛ kɛ bulɛ ni nibii nɛɛ eha ená lɛ ahe waa. Dɔlɛ sane ji akɛ, esumɔɔ nibii nɛɛ kwraa fe Kristo. Belɛ, “nɔ kome” ni eshwɛ nuu lɛ ji, suɔmɔ ni pɛsɛmkunya bɛ mli ni jɛ tsui muu fɛɛ mli ni ebaaná eha Yesu kɛ Yehowa. Akɛni oblanyo lɛ bɛ suɔmɔ ni tamɔ nɛkɛ hewɔ lɛ, ekpoo ninefɔ̃ɔ ni nɔ bɛ nɛɛ! Shi te enɛ kɔɔ ohe ehaa tɛŋŋ?

7. Mɛni hewɔ wɔbaanyɛ wɔwie kɛ nɔmimaa akɛ Yesu ninefɔ̃ɔ lɛ kɔɔ wɔhe ŋmɛnɛ lɛ?

⁷ Yesu ninefɔ̃ɔ lɛ kɔɔɔ nuu nɛɛ loo mɛi fioo komɛi pɛ ahe. Yesu kɛɛ akɛ: ‘Kɛji mɔ ko miisumɔ akɛ enyiɛ misɛɛ lɛ, ha enyiɛ misɛɛ daa.’ (Luka 9:23) Kadimɔ akɛ, wiemɔ “mɔ ko” ni Yesu kɛtsu nii yɛ ŋmalɛ nɛɛ mli lɛ tsɔɔ akɛ, mɔ fɛɛ mɔ ni “miisumɔ” lɛɛlɛŋ akɛ etsɔ Kristo sɛɛnyiɛlɔ lɛ baanyɛ afee  nakai. Nyɔŋmɔ gbalaa mɛi ni hiɛ tsui kpakpa ni tamɔ nɛkɛ lɛ kɛbaa e-Bi lɛ ŋɔɔ. (Yohane 6:44) Jeee niiatsɛmɛi, ohiafoi, mɛi ni hiɛ hewolonɔ su pɔtɛɛ ko loo mɛi ni jɛ maŋ pɔtɛɛ ko nɔ, kɛ agbɛnɛ hu mɛi ni hi shi yɛ nakai beaŋ lɛ pɛ Yesu kɛ hegbɛ nɛɛ ha, shi moŋ wɔ fɛɛ wɔyɛ hegbɛ akɛ wɔkpɛlɛɔ Yesu ninefɔ̃ɔ lɛ nɔ. No hewɔ lɛ, Yesu wiemɔ akɛ, ‘Ba ni obanyiɛ misɛɛ’ lɛ kɔɔ ohe diɛŋtsɛ. Mɛni hewɔ esa akɛ onyiɛ Kristo sɛɛ lɛ? Ni mɛni Kristo sɛɛ ni obaanyiɛ lɛ tsɔɔ?

8. Mɛni he hiaa adesai fɛɛ, ni mɛni hewɔ?

⁸ Anɔkwa sane ko yɛ ni esa akɛ wɔkpɛlɛ nɔ: Hiɛnyiɛlɔ kpakpa he miihia wɔ fɛɛ. Jeee adesai fɛɛ kpɛlɛɔ nɔ nakai, shi nakai eji. Yehowa kɛ emumɔ lɛ tsirɛ egbalɔ Yeremia ni eŋma anɔkwa sane ni tsakeee nɛɛ, akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Adesai bɛ nyɛmɔ ni amɛkɛaaye amɛhe nɔ, ni asaŋ amɛbɛ hegbɛ hu akɛ amɛfeɔ nakai. Yɛ anɔkwale mli lɛ, adesai ayinɔsane mli fɛɛ eyi kɛ hiɛnyiɛlɔi ni nyɛɛɛ adesai ahiamɔ nii ahe nii amɛtsu. (Jajelɔ 8:9) Hiɛnyiɛlɔi ni hi shi yɛ Yesu gbii lɛ amli lɛ wa mɛi ayi, amɛfee amɛ niseniianii, ni amɛlaka amɛ. Yesu na shihilɛ ni mɛi foji lɛ yɔɔ mli lɛ, ni ewie he yɛ gbɛ ni ja nɔ akɛ, “amɛtamɔ tooi ni bɛ kwɛlɔ.” (Marko 6:34) Adesai yɛ nakai shihilɛ nɔŋŋ mli ŋmɛnɛ. Hiɛnyiɛlɔ kpakpa ni wɔbaanyɛ wɔbu lɛ ni wɔmu wɔfɔ̃ enɔ hu he miihia wɔ fɛɛ akɛ kuu, kɛ agbɛnɛ akɛ aŋkroaŋkroi. Ani Yesu shɛɔ taomɔ nii nɛɛ ahe? Nyɛhaa wɔsusua yiŋtoi komɛi ahewɔ ni wɔbaanyɛ wɔha hetoo akɛ hɛɛ lɛ he wɔkwɛa.

9. Mɛni haa esoroɔ Yesu yɛ hiɛnyiɛlɔi krokomɛi fɛɛ ahe lɛ?

⁹ Klɛŋklɛŋ lɛ, Yehowa Nyɔŋmɔ diɛŋtsɛ hala Yesu. Adesai ni yeee emuu ni bei pii lɛ alakaa amɛ, ni amɛsusuɔ nii ahe yɛ gbɛ ni ejaaa nɔ lɛ ji mɛi ni halaa adesai ahiɛnyiɛlɔi lɛ ateŋ mɛi babaoo. Yesu ji hiɛnyiɛlɔ ni esoro lɛ kwraa. Sabla ni akɛtsɛɔ  lɛ lɛ po tsɔɔ nakai. Wiemɔ “Kristo” loo “Mesia” lɛ shishi ji “Mɔ ni Afɔ lɛ Mu.” Hɛɛ, jeŋ muu fɛɛ Maŋtsɛ lɛ diɛŋtsɛ ji mɔ ni fɔ Yesu mu loo eŋɔ hegbɛ krɔŋŋ nɛɛ eha lɛ. Yehowa Nyɔŋmɔ wie e-Bi lɛ he akɛ: “Naa, mitsulɔ ní mihala lɛ, misuɔlɔ ní misusuma náa ehe tsui lɛ; mikɛ mimumɔ lɛ aaato enɔ.” (Mateo 12:18) Mɔ ko bɛ ni le hiɛnyiɛlɔ ni sa wɔ fe wɔ-Bɔlɔ lɛ. Yehowa nilee lɛ bɛ naagbee, no hewɔ lɛ wɔyɛ yiŋtoo kpakpa ni wɔɔdamɔ nɔ wɔmu wɔfɔ̃ mɔ ni ehala lɛ lɛ nɔ.​—Abɛi 3:5, 6.

10. Mɛni hewɔ Yesu nɔkwɛmɔnɔ lɛ ji nɔ ni hi fe fɛɛ ni esa akɛ adesai akase lɛ?

¹⁰ Nɔ ni ji enyɔ lɛ, Yesu fee nɔkwɛmɔnɔ ni hi kɛwula shi ni kanyaa mɔ eha wɔ. Mɔ ni ji hiɛnyiɛlɔ kpakpa lɛ yɛ sui ni eshishibii lɛ baanyɛ asumɔ waa ni amɛkase. Ehiɔ shi yɛ nibii ni ewieɔ lɛ anaa, ni ekanyaa mɛi ni amɛtsɔmɔ mɛi kpakpai fe bɔ ni amɛyɔɔ tsutsu lɛ. Mɛni ji sui komɛi ni obaanya he waa yɛ hiɛnyiɛlɔ ko he? Ekãa? Nilee? Musuŋtsɔlɛ? Ni hiɛ ni amiaa kɛdamɔɔ shihilɛ ni mli wa naa hu? Kɛ́ otee nɔ okase Yesu shihilɛ yɛ shikpɔŋ lɛ nɔ lɛ he saji lɛ, obaana akɛ eyɛ sui nɛɛ kɛ sui krokomɛi babaoo. Akɛni Yesu tamɔ eŋwɛi Tsɛ lɛ pɛpɛɛpɛ hewɔ lɛ, eyɛ Nyɔŋmɔ sui lɛ fɛɛ eko yɛ gbɛ ni yeɔ emuu nɔ. Eji adesa ni eye emuu lɛɛlɛŋ. No hewɔ lɛ, wɔbaanyɛ wɔkase nɔ ko ni sa jogbaŋŋ yɛ enifeemɔi fɛɛ, ewiemɔi fɛɛ, kɛ bɔ ni enuɔ nii ahe ehaa lɛ amli. Biblia lɛ kɛɔ akɛ, eto “okadi efɔ̃ shi eha nyɛ, koni nyɛnyiɛ enanemaahei lɛ asɛɛ.”​—1 Petro 2:21.

11. Mɛɛ gbɛ nɔ Yesu tsɔɔ akɛ eji “tookwɛlɔ kpakpa”?

¹¹ Nɔ ni ji etɛ lɛ, Kristo hi shi yɛ ewiemɔ akɛ: “Miji tookwɛlɔ kpakpa lɛ” naa. (Yohane 10:14) Mɛi ni hi shi yɛ Biblia beaŋ lɛ nu Yesu wiemɔi nɛɛ ashishi jogbaŋŋ. Tookwɛlɔi tsuɔ nii waa kɛkwɛɔ amɛtooi lɛ. “Tookwɛlɔ kpakpa” lɛ kɛ ewala tete shãa afɔle kɛbuɔ etooku lɛ ahe koni amɛfee shweshweeshwe. Ákɛ nɔkwɛmɔnɔ lɛ, beni Yesu blematsɛ David ji oblanyo lɛ, no mli lɛ tookwɛlɔ ji lɛ, ni ekɛ ewala wo oshara  mli shii abɔ kɛwu eshi kooloi awuiyelɔi ni taoɔ akpata etooi lɛ ahiɛ lɛ. (1 Samuel 17:34-36) Yesu fee nɔ ni fe nakai po yɛ esɛɛnyiɛlɔi ni ji adesai lɛ ahewɔ. Ekɛ ewala ŋmɛ shi eha amɛ. (Yohane 10:15) Hiɛnyiɛlɔi ni yɔɔ lɛ ateŋ mɛi enyiɛ yɔɔ hekɛafɔleshãa mumɔ ni tamɔ nɛkɛ?

12, 13. (a) Kɛ́ akɛɛ tookwɛlɔ ko le etooi lɛ, te atsɔɔ tɛŋŋ, ni mɛɛ gbɛ nɔ etooi lɛ hu le lɛ? (b) Mɛni hewɔ osumɔɔ ni ohi Tookwɛlɔ Kpakpa lɛ kwɛmɔ shishi lɛ?

¹² Yesu ji “tookwɛlɔ kpakpa lɛ” yɛ gbɛ kroko nɔ. Ekɛɛ akɛ: “Mile mi diɛŋtsɛ mitoi lɛ, ni mitoi lɛ hu le mi.” (Yohane 10:14, Ga Biblia hee) Susumɔ nɔkwɛmɔnɔ ni Yesu kɛtsu nii lɛ he okwɛ. Kɛ́ mɔ ko ni jeee tookwɛlɔ lɛ na tooku ko bua shi lɛ, esusuŋ akɛ amɛteŋ eko fɛɛ eko yɛ ehiamɔ nii. Shi kɛlɛ, tookwɛlɔ le etooi lɛ ateŋ eko fɛɛ eko hiamɔ nii. Ele too yei lɛ ateŋ nɔ ni etsɛŋ ni amɛbaafɔ́ ni esa akɛ eye ebua amɛ, ele toobii lɛ ateŋ nɔ ni esa akɛ ehiɛ amɛ yɛ ekpɔkɔiaŋ akɛni amɛnajiaŋ wako loo amɛdarako tsɔ bɔ ni amɛ diɛŋtsɛ amɛbaanyɛ amɛnyiɛ kɛya shɔŋŋ, kɛ tooi lɛ ateŋ mɛi ni hela emɔmɔ amɛ loo amɛpila lɛ. Tooi lɛ hu le amɛkwɛlɔ lɛ jogbaŋŋ. Amɛle egbee, ni amɛbuŋ tookwɛlɔ kroko gbee akɛ egbee kɔkɔɔkɔ. Kɛ́ amɛkwɛlɔ lɛ wo egbee nɔ kɛtsɔɔ akɛ oshara ko miiba lɛ, amɛboɔ lɛ toi oya. He fɛɛ he ni enyiɛɔ amɛhiɛ kɛyaa lɛ, amɛnyiɛɔ esɛɛ. Ni ele he ni esa akɛ ekɛ amɛ aya. Ele he ni jwɛi frɔ̃frɔ̃ yɔɔ, he ni nu kpakpa ni mli tse yɔɔ, kɛ he ni yɔɔ shweshweeshwe. Beni ekwɛɔ etooi lɛ anɔ lɛ, amɛnuɔ he akɛ amɛyɛ shweshweeshwe.​—Lala 23.

¹³ Ekã shi faŋŋ akɛ, obaasumɔ ni oná hiɛnyiɛlɔ ni tamɔ nɛkɛ, aloo jeee nakai? Tookwɛlɔ Kpakpa lɛ kɛ esɛɛnyiɛlɔi lɛ yeɔ yɛ gbɛ ni tamɔ nakai pɛpɛɛpɛ nɔ, ni mɔ ko bɛ ni abaanyɛ akɛ lɛ ato ehe yɛ enɛ gbɛfaŋ. Ewo shi akɛ ebaatsɔɔ bo gbɛ ni baaha oná miishɛɛ ni otsui anyɔ omli amrɔ nɛɛ kɛ agbɛnɛ hu kɛya naanɔ! (Yohane 10:10, 11; Kpojiemɔ 7:16, 17) Belɛ, ehe miihia ni wɔle nɔ tuuntu ni Kristo sɛɛ ni aaanyiɛ lɛ tsɔɔ.

14, 15. Bɔni afee ni wɔtsɔmɔ Kristo sɛɛnyiɛlɔi lɛ, mɛni hewɔ ebiɔ babaoo fe kɛɛmɔ ni wɔɔkɛɛ kɛkɛ akɛ Kristofoi ji wɔ loo wɔdɔɔ Yesu he lɛ?

¹⁴ Ŋmɛnɛ lɛ, mɛi akpei ohai abɔ susuɔ akɛ amɛhere Kristo ninefɔ̃ɔ lɛ nɔ. Yɛ anɔkwale mli lɛ, amɛtsɛɔ amɛhe Kristofoi po. Ekolɛ amɛji sɔlemɔ ni amɛfɔlɔi ha abaptisi amɛ yɛ mli lɛ mlibii. Aloo ekolɛ amɛkɛɔ akɛ amɛdɔɔ Yesu he ni amɛkpɛlɛɔ enɔ akɛ amɛ-Yiwalaherelɔ. Shi ani no feɔ amɛ Kristo sɛɛnyiɛlɔi? Ani no ji nɔ ni yɔɔ Yesu jwɛŋmɔ mli beni efɔ̃ wɔ nine ni wɔbanyiɛ esɛɛ lɛ? Ebiɔ babaoo fe nakai.

¹⁵ Susumɔ Kristendom maji, ni ji maji ni emlibii lɛ ateŋ mɛi fã kpotoo tsɛɔ amɛhe Kristo sɛɛnyiɛlɔi lɛ ahe okwɛ. Ani Kristendombii lɛ hiɔ shi yɛ Yesu Kristo tsɔɔmɔi lɛ anaa? Aloo yɛ no najiaŋ lɛ, wɔnaa nibii tamɔ hetsɛ̃, yiwalɛ, awuiyeli, kɛ jalɛsane ni ayeee yɛ maji nɛɛ anɔ tamɔ bɔ ni wɔnaa yɛ maji krokomɛi fɛɛ ni yɔɔ je lɛŋ ni jeee Kristendom maji lɛ amli lɛ? Be ko lɛ, Hindubii ahiɛnyiɛlɔ ni abuɔ lɛ waa ni atsɛɔ lɛ Mohandas Gandhi lɛ kɛɛ akɛ: “Mileee mɔ ko ni efee nibii kpakpai babaoo eha adesai aweku lɛ tamɔ Yesu. Yɛ anɔkwale mli lɛ, tɔmɔ ko kwraa bɛ Kristojamɔ he.” Ekɛfata he akɛ: “Nyɛ, ni ji Kristofoi lɛ ahe naagba lɛ yɔɔ. Nyɛhiii shi yɛ nyɛ diɛŋtsɛ nyɛtsɔɔmɔi lɛ anaa.”

16, 17. Bei pii lɛ, mɛni shwɛɔ mɛi ni tsɛɔ amɛhe Kristofoi lɛ, ni mɛni tsɔɔ akɛ mɔ ko ji Kristo anɔkwa sɛɛnyiɛlɔ?

¹⁶ Yesu kɛɛ akɛ nɔ titri ni baakadi enɔkwa sɛɛnyiɛlɔi lɛ ji amɛnifeemɔi, shi jeee amɛwiemɔi loo gbɛ́i ni amɛkɛtsɛɔ amɛhe. Ákɛ nɔkwɛmɔnɔ lɛ, ekɛɛ akɛ: “Jeee mɔ fɛɛ mɔ ni kɛɔ mi akɛ: Nuŋtsɔ, Nuŋtsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.” (Mateo 7:21) Mɛni hewɔ mɛi ni kɛɔ akɛ Yesu ji amɛ-Nuŋtsɔ lɛ ateŋ mɛi babaoo efeee e-Tsɛ lɛ suɔmɔnaa nii lɛ? Kaimɔ oblanyo niiatsɛ ni ji maŋ onukpa lɛ. Bei pii lɛ, ‘eshwɛɔ’ mɛi ni tsɛɔ amɛhe Kristofoi lɛ “nɔ kome”​—no ji susuma muu  fɛɛ mli ni aaajɛ asumɔ Yesu kɛ Mɔ ni tsu lɛ kɛba shikpɔŋ lɛ nɔ lɛ.

¹⁷ Mɛɛ gbɛ nɔ abaatsɔ afee enɛ? Mɛi akpekpei abɔ ni tsɛɔ amɛhe Kristofoi lɛ kɛɔ akɛ amɛsumɔɔ Yesu, aloo jeee nakai? Hɛɛ, nakai ni. Shi suɔmɔ kɛha Yesu kɛ Yehowa biɔ babaoo fe kɛɛmɔ ni aaakɛɛ kɛkɛ akɛ asumɔɔ amɛ. Yesu kɛɛ akɛ: “Kɛji mɔ ko miisumɔ mi lɛ, eeeye miwiemɔ lɛ nɔ.” (Yohane 14:23) Agbɛnɛ hu, beni Yesu wieɔ ehe akɛ tookwɛlɔ lɛ, ekɛɛ akɛ: “Mitooi lɛ nuɔ migbee, ni mile amɛ, ni amɛnyiɛɔ misɛɛ.” (Yohane 10:27) Hɛɛ, anaa nɔ diɛŋtsɛ ni tsɔɔ akɛ wɔsumɔɔ Kristo yɛ wɔnifeemɔi amli titri, shi jeee yɛ wɔwiemɔi loo wɔhenumɔi akpojiemɔ mli kɛkɛ.

18, 19. (a) Te esa akɛ Yesu he nii ni wɔkaseɔ lɛ aná wɔnɔ hewalɛ eha tɛŋŋ? (b) Mɛɛ yiŋtoo hewɔ afee wolo nɛɛ, ni mɛɛ gbɛ nɔ ebaaye ebua mɛi ni be kplaŋŋ ni eho nɛ lɛ amɛsusuɔ akɛ amɛnyiɛ Kristo sɛɛ lɛ?

¹⁸ Shi, wɔnifeemɔi tsɔɔ nɔ̃ gbɔmɛi ni wɔji diɛŋtsɛ yɛ wɔmligbɛ. No hewɔ lɛ, esa akɛ wɔtsu bɔ ni wɔji yɛ mligbɛ lɛ he nii. Yesu kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Kɛ́ wɔkase Yesu he anɔkwa nilee, ni wɔjwɛŋ nɔ ni wɔkase lɛ nɔ lɛ, ebaaná wɔtsui lɛ nɔ hewalɛ. Ebaaha suɔmɔ ni wɔyɔɔ kɛha Yesu lɛ mli awa daa, ni ebaaha shwelɛ ni wɔyɔɔ akɛ wɔbaanyiɛ esɛɛ daa gbi lɛ mli aya nɔ awa.

¹⁹ Enɛ ji yiŋtoo hewɔ ni afee wolo nɛɛ. Afee wolo nɛɛ ni eye ebua wɔ ni wɔna bɔ ni wɔɔfee wɔnyiɛ Yesu sɛɛ jogbaŋŋ, shi jeee ni akɛbɔ Yesu shihilɛ kɛ esɔɔmɔ nitsumɔ lɛ he amaniɛ kuku. b Afee koni eye ebua wɔ ni wɔkɛ Ŋmalɛ lɛ atsu nii tamɔ ashwishwɛ kɛpɛi wɔmli ni wɔbi wɔhe akɛ, ‘Ani miinyiɛ Yesu sɛɛ lɛɛlɛŋ?’ (Yakobo 1:23-25) Ekolɛ be kplaŋŋ ni eho nɛ lɛ, efeɔ bo akɛ oŋmɛɔ Tookwɛlɔ Kpakpa lɛ gbɛ ni  etsɔɔ bo gbɛ. Shi be fɛɛ be lɛ wɔbaanyɛ wɔtao gbɛi anɔ ni wɔɔtsɔ ni wɔya wɔhiɛ, aloo jeee nakai? Biblia lɛ woɔ wɔ hewalɛ akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo? Nyɛtaoɔ nyɛ diɛŋtsɛ nyɛmli nyɛkwɛa.” (2 Korintobii 13:5, Ga Biblia hee) Ekã shi faŋŋ akɛ, sɛɛnamɔ yɛ he akɛ wɔɔpɛi wɔmli wɔkwɛ kɛji wɔmiiha Yesu, Tookwɛlɔ Kpakpa ni yɔɔ suɔmɔ, ni ji mɔ ni Yehowa diɛŋtsɛ ehala lɛ akɛ enyiɛ wɔhiɛ lɛ miitsɔɔ wɔ gbɛ.

20. Mɛni he wɔbaasusu yɛ yitso ni nyiɛ sɛɛ lɛ mli?

²⁰ Eba akɛ wolo nɛɛ ni okaseɔ lɛ baaye abua bo ni owaje suɔmɔ ni oyɔɔ kɛha Yesu kɛ Yehowa lɛ. Kɛ́ oha suɔmɔ ni tamɔ nɛkɛ lɛ tsɔɔ bo gbɛ yɛ oshihilɛ mli lɛ, obaaná toiŋjɔlɛ babaoo ni otsui baanyɔ omli waa yɛ jeŋ fɔŋ nɛɛ mli po, ni obaahi shi koni ojie Yehowa yi kɛya naanɔ yɛ Tookwɛlɔ Kpakpa lɛ ni eŋɔha wɔ lɛ hewɔ. Yɛ anɔkwale mli lɛ, esa akɛ Kristo he nii ni wɔkaseɔ lɛ adamɔ shishitoo kpakpa nɔ. Belɛ, esa jogbaŋŋ akɛ wɔɔsusu gbɛfaŋnɔ ni Yesu tsuɔ yɛ Yehowa yiŋtoo mli lɛ he yɛ Yitso 2 lɛ mli.