MƐI ni heɔ Triniti tsɔɔmɔ lɛ nɔ amɛyeɔ lɛ kɛɔ akɛ Nyɔŋmɔ ji mɛi etɛ—Tsɛ lɛ, Bi lɛ, kɛ Mumɔ Krɔŋkrɔŋ lɛ. Awieɔ gbɔmɛi etɛ nɛɛ ahe akɛ amɛyeɔ egbɔ, amɛji ofe, ni amɛbɛ shishijee. No hewɔ lɛ, taakɛ Triniti tsɔɔmɔ lɛ tsɔɔ lɛ, Tsɛ lɛ ji Nyɔŋmɔ, Bi lɛ ji Nyɔŋmɔ, ni Mumɔ Krɔŋkrɔŋ lɛ ji Nyɔŋmɔ, ni kɛlɛ Nyɔŋmɔ kome pɛ yɔɔ.

Mɛi babaoo ni heɔ Triniti tsɔɔmɔ lɛ nɔ amɛyeɔ lɛ kpɛlɛɔ nɔ akɛ amɛnyɛɛɛ amɛtsɔɔ tsɔɔmɔ nɛɛ mli jogbaŋŋ. Shi kɛlɛ, ekolɛ  amɛbaanu he akɛ tsɔɔmɔ nɛɛ yɛ Biblia lɛ mli. Eji nɔ ni sa kadimɔ akɛ wiemɔ ni ji “Triniti” lɛ ejeee kpo yɛ Biblia lɛ mli he ko he ko. Shi ani anaa susumɔ ko ni kɔɔ Triniti lɛ he yɛ Biblia lɛ mli? Kɛha sanebimɔ nɛɛ hetoo lɛ, ha wɔsusu ŋmalɛ ko ni mɛi kɛfɔɔ nitsumɔ kɛfiɔ Triniti lɛ sɛɛ lɛ he wɔkwɛ.

Yohane 1:1 lɛ kɛɔ akɛ: “Shishijee lɛŋ lɛ wiemɔ lɛ yɛ, ni wiemɔ lɛ kɛ Nyɔŋmɔ yɔɔ, ni wiemɔ lɛ Nyɔŋmɔ ni.” Sɛɛ mli yɛ nakai yitso lɛ nɔŋŋ mli lɛ, bɔfo Yohane tsɔɔ yɛ faŋŋ mli akɛ “Wiemɔ lɛ” ji Yesu. (Yohane 1:14) Shi kɛlɛ, akɛni atsɛɔ Wiemɔ lɛ akɛ Nyɔŋmɔ hewɔ lɛ, mɛi komɛi muɔ sane naa akɛ esa akɛ Bi lɛ kɛ Tsɛ lɛ afee Nyɔŋmɔ kome too lɛ nɔŋŋ.

Ha ehi ojwɛŋmɔ mli akɛ aŋma Biblia lɛ fã nɛɛ klɛŋklɛŋ kwraa yɛ Hela wiemɔ mli. Sɛɛ mli lɛ, shishitsɔɔlɔi tsɔɔ Hela niŋmaa lɛ shishi kɛtee wiemɔi krokomɛi amli. Shi kɛlɛ, Biblia shishitsɔɔlɔi babaoo kɛ wiemɔ kuku ni ji “wiemɔ lɛ Nyɔŋmɔ ni” lɛ tsuuu nii. Mɛni hewɔ amɛfee nakai? Akɛni nakai shishitsɔɔlɔi lɛ le Hela wiemɔ ni akɛtsu nii kɛŋma Biblia lɛ hewɔ lɛ, amɛmu sane naa akɛ esa ákɛ atsɔɔ wiemɔ kuku ni ji “wiemɔ lɛ Nyɔŋmɔ ni” lɛ shishi yɛ gbɛ kroko nɔ. Yɛ mɛɛ gbɛ nɔ? Naa nɔkwɛmɔnii fioo komɛi: “Logos [Wiemɔ] lɛ yɛ krɔŋkrɔŋ.” (A New Translation of the Bible) “Wiemɔ lɛ ji nyɔŋmɔ ko.” (The New Testament in an Improved Version) “Wiemɔ lɛ kɛ Nyɔŋmɔ yɔɔ ni ekɛ lɛ hiɛ su kome.” (The Translator’s New Testament) Shishitsɔɔmɔi nɛɛ fee lɛ faŋŋ akɛ, Wiemɔ lɛ jeee Nyɔŋmɔ diɛŋtsɛ. * Yɛ no najiaŋ lɛ, hegbɛ ni nɔ kwɔ ni Wiemɔ lɛ yɔɔ yɛ Yehowa adebɔɔ nibii ateŋ lɛ hewɔ ni awie ehe akɛ eji “nyɔŋmɔ ko” lɛ. Wiemɔ ni ji “nyɔŋmɔ” ni akɛtsu nii yɛ biɛ lɛ shishi ji “hewalɔ.”

Mɛi babaoo leee Hela wiemɔ ni akɛŋma Biblia lɛ. No hewɔ lɛ te ooofee tɛŋŋ ona nɔ pɔtɛɛ ni bɔfo Yohane tsɔɔ diɛŋtsɛ lɛ? Susumɔ nɔkwɛmɔnɔ nɛɛ he okwɛ: Skultsɔɔlɔ ko gbála sane ko  mli etsɔɔ enikaselɔi. Sɛɛ mli lɛ, nikaselɔi lɛ ná susumɔi srɔtoi yɛ niiamlitsɔɔmɔ lɛ he. Te nikaselɔi lɛ aaafee tɛŋŋ amɛtsu sane lɛ he nii? Amɛbaanyɛ amɛbi tsɔɔlɔ lɛ koni etsɔɔ amɛ saji babaoo efata he. Ŋwanejee ko bɛ he akɛ, anɔkwalei babaoo ni amɛaakase amɛfata he lɛ baaye abua amɛ koni amɛnu sane lɛ shishi jogbaŋŋ. Nakai nɔŋŋ eji yɛ Yohane 1:1 lɛ shishi ní ooonu lɛ he, obaanyɛ okane Yohane Sanekpakpa lɛ kɛha saji babaoo ni kɔɔ gbɛhe ni Yesu hiɛ lɛ he. Anɔkwalei krokomɛi ni kɔɔ sane nɛɛ he ni oookase ofata he lɛ baaye abua bo koni onyɛ omu sane naa yɛ gbɛ ni ja nɔ.

Ákɛ nɔkwɛmɔnɔ lɛ, susumɔ nɔ ni Yohane tee nɔ eŋma yɛ yitso 1 kuku 18 lɛ he okwɛ, nɔ ni kɛɔ akɛ: “Nyɔŋmɔ [Ofe] lɛ, mɔ ko enako lɛ pɛŋ.” Shi kɛlɛ, adesai ena Yesu ni ji Bi lɛ pɛŋ, ejaakɛ Yohane kɛɛ akɛ: “Wiemɔ lɛ [Yesu] tsɔ heloo, ni ebashi buu yɛ wɔteŋ, ni wɔna enunyam lɛ.” (Yohane 1:14) Belɛ, te aaafee tɛŋŋ ni Bi lɛ aaafee Nyɔŋmɔ Ofe lɛ fã ko lɛ? Yohane wie hu akɛ Wiemɔ lɛ kɛ “Nyɔŋmɔ yɔɔ.” Shi te aaafee tɛŋŋ ni mɔ aŋkro ko kɛ mɔ ko aaahi shi ni yɛ nakai beaŋ nɔŋŋ lɛ efee nakai mɔ lɛ nɔŋŋ lɛ? Kɛfata he lɛ, taakɛ aŋma yɛ Yohane 17:3 lɛ, Yesu ha ana srɔtofeemɔ agbo ni kã ekɛ eŋwɛi Tsɛ lɛ teŋ lɛ yɛ faŋŋ mli. Etsɛ́ e-Tsɛ lɛ akɛ “anɔkwa Nyɔŋmɔ kome lɛ.” Ni beni Yohane kɛ Sanekpakpa ni eŋma lɛ baa naagbee lɛ, emu saji lɛ fɛɛ naa akɛ: “Enɛɛmɛi lɛ aŋma, koni nyɛhé nyɛye akɛ Yesu ji Kristo, Nyɔŋmɔ bi lɛ.” (Yohane 20:31) Kadimɔ akɛ atsɛɛɛ Yesu akɛ Nyɔŋmɔ, shi moŋ atsɛ lɛ ákɛ Nyɔŋmɔ bi. Saji krokomɛi ni awie he yɛ Yohane Sanekpakpa lɛ mli lɛ tsɔɔ bɔ ni esa akɛ anu Yohane 1:1 lɛ shishi aha. Yesu ni ji Wiemɔ lɛ ji “nyɔŋmɔ ko,” kɛ shishinumɔ akɛ eyɛ gbɛhe ko ni nɔ kwɔ, shi jeee lɛ nɔŋŋ ji Nyɔŋmɔ Ofe lɛ.

Susumɔ nɔkwɛmɔnɔ ni kɔɔ skultsɔɔlɔ lɛ kɛ nikaselɔi lɛ ahe lɛ he ekoŋŋ okwɛ. Ŋɔɔ lɛ akɛ mɛi komɛi ayiŋ miifee amɛ kɔshikɔshi lolo yɛ sane lɛ he, yɛ be mli ni amɛnu niiamlitsɔɔmɔ ni tsɔɔlɔ lɛ kɛfata he lɛ fɛɛ sɛɛ. Mɛni amɛbaanyɛ amɛfee? Amɛbaanyɛ amɛya tsɔɔlɔ kroko ŋɔɔ kɛha sanemlitsɔɔmɔ babaoo yɛ sane lɛ nɔŋŋ he. Kɛ́ tsɔɔlɔ ni ji enyɔ lɛ ma niiamlitsɔɔmɔ ni akɛha klɛŋklɛŋ lɛ nɔ mi lɛ, ebaaha yiŋkɔshikɔshifeemɔ ni skulbii lɛ  ateŋ mɛi babaoo yɔɔ lɛ sɛɛ afo. Nakai nɔŋŋ kɛji akɛ obɛ nɔmimaa yɛ nɔ ni Biblia ŋmalɔ Yohane kɛɔ yɛ wekukpaa ni kã Yesu kɛ Nyɔŋmɔ Ofe lɛ teŋ lɛ he lɛ, obaanyɛ okane Biblia ŋmalɔ kroko sane ni eŋma lɛ kɛha saji babaoo lolo. Ákɛ nɔkwɛmɔnɔ lɛ, susumɔ nɔ ni Mateo ŋma lɛ he okwɛ. Beni ewieɔ nibii agbɛjianɔtoo nɛɛ naagbee lɛ he lɛ, etsɛ Yesu wiemɔi lɛ ayisɛɛ akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, ni bi lɛ tete leee, ja mitsɛ kome kɛkɛ.” (Mateo 24:36) Mɛɛ gbɛ nɔ wiemɔi nɛɛ maa nɔ mi akɛ Yesu jeee Nyɔŋmɔ Ofe lɛ?

Yesu kɛɛ akɛ Tsɛ lɛ le nibii babaoo fe bi lɛ. Shi kɛlɛ, eji Yesu ji Nyɔŋmɔ Ofe lɛ fã ko kulɛ ebaale anɔkwalei ni tamɔ nɔ ni Tsɛ lɛ le lɛ pɛpɛɛpɛ. Belɛ, bi lɛ kɛ Tsɛ lɛ nyɛŋ afee mɛi ni yeɔ egbɔ. Kɛlɛ, mɛi komɛi baakɛɛ akɛ: ‘Yesu hiɛ sui enyɔ. Ewie yɛ biɛ nɛɛ akɛ gbɔmɔ.’ Shi kɛji akɛ nakai ji sane lɛ po lɛ, mumɔ krɔŋkrɔŋ lɛ hu? Kɛji akɛ lɛ hu eji Nyɔŋmɔ fã taakɛ Tsɛ lɛ ji lɛ, mɛni hewɔ Yesu ekɛɛɛ akɛ mumɔ krɔŋkrɔŋ lɛ le nɔ ni Tsɛ lɛ le lɛ?

Beni oyaa nɔ okaseɔ Biblia lɛ, obaale Biblia lɛ mli saji babaoo ni kɔɔ sane nɛɛ he. Amɛmaa anɔkwa saji ni kɔɔ Tsɛ lɛ, Bi lɛ, kɛ mumɔ krɔŋkrɔŋ lɛ he lɛ anɔ mi.—Lala 90:2; Bɔfoi lɛ Asaji 7:55; Kolosebii 1:15.