BIBLIA lɛ etsɔɔɔ wɔ be ni afɔ́ Yesu. Shi kɛlɛ, ehaa wɔ yiŋtoo kpakpa ni wɔbaanyɛ wɔdamɔ nɔ wɔmu sane naa akɛ afɔɔɔ lɛ yɛ December mli.

Susumɔ kɔɔyɔŋ tsakemɔ ni baa yɛ afi lɛ mli nyɔŋ ni ji December lɛ mli yɛ Betlehem ni ji he ni afɔ́ Yesu yɛ lɛ he okwɛ. Yudafoi anyɔŋ ni ji Chislev (ni kɛ November kɛ December yeɔ egbɔ lɛ) ji nyɔŋ ko ni fɛ̃i yeɔ ni nugbɔ nɛɔ waa. Nyɔŋ ni nyiɛ no sɛɛ ji Tebeth (December kɛ January). Eji afi lɛ mli be ni jeŋ feɔ ŋanii fe fɛɛ, ni bei komɛi lɛ snoo nɛɔ yɛ gɔji lɛ anɔ. Ha wɔkwɛ nɔ ni Biblia lɛ kɛɔ wɔ yɛ kɔɔyɔŋ tsakemɔ shihilɛ ni yɔɔ nakai kpokpaa lɛ nɔ lɛ he.

Biblia ŋmalɔ ni ji Ezra lɛ tsɔɔ mli akɛ Chislev ji nyɔŋ ko ni ale jogbaŋŋ akɛ eji fɛ̃i kɛ nugbɔnɛmɔ be lɛɛlɛŋ. Beni Ezra wie akɛ asafo babaoo ko babua amɛhe naa yɛ Yerusalem “yɛ nyɔŋ ni ji nɛɛhu [Chislev] lɛ nɔ, yɛ nakai nyɔŋ lɛ nɔ gbi ni ji gbi nyɔŋmai enyɔ lɛ nɔ” lɛ sɛɛ lɛ, ebɔ amaniɛ akɛ mɛi bɔi ‘kpokpomɔ yɛ nugbɔ ní nɛɔ lɛ hewɔ.’ Mɛi ni ebabua amɛhe naa lɛ diɛŋtsɛ wie  kɛkɔ kɔɔyɔŋ tsakemɔ ni yɔɔ nakai be lɛ mli yɛ afi lɛ mli lɛ he akɛ: “Nugbɔnɛmɔ be nɛ, ni wɔnyɛɛɛ blohu lɛŋ wɔdamɔ.” (Ezra 10:9, 13; Yeremia 36:22) Ebɛ naakpɛɛ mɔ akɛ tookwɛlɔi ni yɔɔ Betlehem kpokpaai anɔ lɛ bɔɔ mɔdɛŋ koni amɛkɛ amɛtooi lɛ ahi tsũi amli gbɛkɛ yɛ December mli!

Shi Biblia lɛ bɔɔ amaniɛ akɛ, gbi gbɛkɛ ni afɔ́ Yesu lɛ, no mli lɛ tookwɛlɔi yɛ ŋa nɔ amɛmiikwɛ amɛtooi. Yɛ anɔkwale mli lɛ, Biblia ŋmalɔ Luka tsɔɔ mli akɛ yɛ nakai beaŋ lɛ, tookwɛlɔi “komɛi yɛ ŋa nɔ yɛ jɛi niiaŋ nɔŋŋ ni amɛmiishi kpe amɛmiibu amɛtooi ahe nyɔɔŋ” yɛ Betlehem masɛi. (Luka 2:8-12) Kadimɔ akɛ tookwɛlɔi lɛ yɛ ŋa nɔ diɛŋtsɛ, jeee ni amɛnyiɛ agbonaa kɛkɛ beni je nako. Amɛkɛ amɛtooi lɛ yɛ ŋa lɛ nɔ yɛ nyɔɔŋ. Ani ŋa lɛ nɔ ni amɛyɔɔ lɛ kɛ nugbɔnɛmɔ kɛ kɔɔyɔŋ tsakemɔ shihilɛ ni yɔɔ ŋanii yɛ Betlehem yɛ December mli lɛ kpãa gbee? Dabi, ekɛ lɛ kpãaa gbee. No hewɔ lɛ shihilɛi amli ni afɔ́ Yesu yɛ lɛ tsɔɔ akɛ afɔɔɔ lɛ yɛ December mli. *

Nyɔŋmɔ Wiemɔ lɛ tsɔɔ wɔ be pɔtɛɛ ni Yesu gbo, shi niiamlitsɔɔmɔ fioo ko pɛ ekɛhaa yɛ be ni afɔ́ lɛ lɛ he. Enɛ haa wɔkaiɔ Maŋtsɛ Salomo wiemɔi lɛ akɛ: “Gbɛi kpakpa hi fe mu kpakpa, ni gbele gbi hi fe fɔmɔ gbi.” (Jajelɔ 7:1) Belɛ, ebɛ naakpɛɛ mɔ akɛ Biblia lɛ wieɔ Yesu sɔɔmɔ nitsumɔ lɛ kɛ egbele lɛ he saji babaoo ni yɔɔ fitsofitso, shi nibii fioo ko pɛ he ewieɔ yɛ be ni afɔ lɛ lɛ he.