1, 2. Mɛɛ saji mɛi babaoo biɔ?

DAA gbi lɛ, abɔɔ awerɛho saji ni miiya nɔ yɛ jeŋ fɛɛ lɛ ahe amaniɛ. Akɛ nɔkwɛmɔnɔ lɛ, wɔnuɔ akɛ ŋshɔ eke kɛba akrowa ko mli ni ebakpãtã akrowa lɛ hiɛ. Mɔ ko eyatswa mɛi komɛi ni etee sɔlemɔ tu ni epila ni egbe amɛteŋ mɛi komɛi. Kansa ehã yoofɔyoo ko egbo eshi ebii enumɔ.

² Kɛ́ awerɛho saji loo osharai ni tamɔ nɛkɛ ba lɛ, mɛi babaoo biɔ akɛ, “Mɛɛba?” Mɛi pii hu biɔ akɛ, “Mɛni hewɔ hetsɛ̃ kɛ amanehulu eyi je lɛŋ nɛkɛ?” Ani bo diɛŋtsɛ hu obi ohe nakai pɛŋ?

3, 4. (a) Mɛɛ saji Habakuk bi? (b) Te Yehowa hã lɛ hetoo tɛŋŋ?

³ Biblia lɛ hãa wɔnaa akɛ hii komɛi ni heɔ Nyɔŋmɔ nɔ amɛyeɔ waa lɛ hu bi saji ni tamɔ nɛkɛ. Akɛ nɔkwɛmɔnɔ lɛ, gbalɔ Habakuk bi Yehowa akɛ: “Mɛni hewɔ ohãa minaa nɔfɔŋfeemɔ? Ni mɛni hewɔ oŋmɛɔ gbɛ ni yiwaa yaa nɔ? Mɛni hewɔ hiɛkpatamɔ kɛ yiwalɛ yɔɔ mihiɛ? Ni mɛni hewɔ béi kɛ naataamɔ efa nɛkɛ?”​—Habakuk 1:3.

⁴ Yɛ Habakuk 2:2, 3 lɛ, Nyɔŋmɔ hã Habakuk sanebimɔi lɛ ahetoo, ni ewo lɛ shi akɛ ebaahã nibii ahi. Yehowa sumɔɔ gbɔmɛi waa. Biblia lɛ kɛɔ akɛ: ‘Ejwɛŋɔ wɔhe.’ (1 Petro 5:7) Anɔkwa, amanehulu ni mɛi naa lɛ dɔɔ Nyɔŋmɔ kwraa fe wɔ. (Yesaia 55:8, 9) No hewɔ lɛ, hã wɔsusu sanebimɔ ni nyiɛ sɛɛ nɛɛ he, no ji, Mɛni hewɔ mɛi naa amanehulu nɛkɛ?

5. Mɛni jamɔŋ hiɛnyiɛlɔi babaoo wieɔ yɛ amanehulu he? Mɛni Biblia lɛ hãa wɔleɔ?

⁵ Bei pii lɛ, osɔfoi kɛ jamɔŋ hiɛnyiɛlɔi lɛ kɛɔ akɛ Nyɔŋmɔ sumɔɔ akɛ mɛi ana amanehulu. Amɛteŋ mɛi komɛi kɛɔ akɛ, awerɛho saji kɛ osharai krokomɛi ni baa mɛi anɔ lɛ ji nibii ni Nyɔŋmɔ eto akɛ ebaaba nakai mɛi lɛ anɔ, ni wɔnyɛŋ wɔnu nɔ hewɔ ni efee nakai lɛ shishi kɔkɔɔkɔ. Mɛi komɛi hu kɛɔ po akɛ, Nyɔŋmɔ hãa mɛi ni gbekɛbii hu fata he lɛ gboiɔ koni amɛbafata ehe yɛ ŋwɛi. Shi enɛ jeee anɔkwale. Yehowa hãaa nibii fɔji aba mɛi anɔ. Biblia lɛ kɛɔ akɛ: “Ebaŋ lɛ kɔkɔɔkɔ akɛ anɔkwa Nyɔŋmɔ lɛ baafee nɔ fɔŋ, aloo akɛ Ofe lɛ baafee nɔ ni ejaaa!”​—Hiob 34:10.

6. Mɛni hewɔ mɛi babaoo shwaa Nyɔŋmɔ yɛ amanehulu ni mɛi naa yɛ je lɛ mli lɛ he lɛ?

⁶ Mɛi babaoo shwaa Nyɔŋmɔ yɛ amanehulu ni mɛi naa yɛ je lɛ mli lɛ he ejaakɛ amɛsusuɔ akɛ Nyɔŋmɔ ji mɔ ni yeɔ je lɛ nɔ. Shi tamɔ bɔ ni wɔkase yɛ Yitso 3 lɛ mli lɛ, mɔ diɛŋtsɛ ni yeɔ je lɛ nɔ ji Satan Abonsam.

7, 8. Mɛni hewɔ amanehulu efa babaoo yɛ je lɛ mli lɛ?

⁷ Biblia lɛ hãa wɔleɔ akɛ “jeŋ muu lɛ fɛɛ kã mɔ fɔŋ lɛ hewalɛ mli.” (1 Yohane 5:19) Satan, ni ji je lɛ nɔyelɔ lɛ yitsoŋ wa waa. ‘Eelaka shikpɔŋ muu lɛ fɛɛ.’ (Kpojiemɔ 12:9) Mɛi babaoo feɔ amɛnii tamɔ Satan Abonsam. Ni no ji nɔ kome hewɔ ni amale, kɛ hetsɛ̃, kɛ yiwalɛ efa babaoo yɛ je lɛ mli lɛ.

⁸ Nibii krokomɛi hu ahewɔ amanehulu efa babaoo yɛ je lɛ mli lɛ. Akɛni Adam kɛ Hawa gbo Nyɔŋmɔ nɔ toi hewɔ lɛ, be ni amɛfɔ amɛbii lɛ, esha yɛ amɛbii lɛ ahe. Akɛni esha yɛ gbɔmɛi ahe hewɔ lɛ, amɛfeɔ nibii ni hãa gbɔmɛi krokomɛi naa amanehulu. Bei pii lɛ, akɛni  amɛsumɔɔ ni ana akɛ amɛhe hiaa fe mɛi krokomɛi hewɔ lɛ, amɛnɔɔ, ni amɛwuɔ tai, ni amɛwaa mɛi krokomɛi ayi. (Jajelɔ 4:1; 8:9) Bei komɛi lɛ, mɛi naa amanehulu yɛ “nibii ni baa yɛ be ni akpaaa gbɛ mli lɛ” hewɔ. (Jajelɔ 9:11) Osharai kɛ nibii gbohii ninaa mɛi akɛni amɛyaje he ni esaaa yɛ be ni esaaa mli lɛ hewɔ.

9. Mɛni hewɔ wɔbaanyɛ wɔná nɔmimaa akɛ Yehowa yɛ yiŋtoo pɔtɛɛ ko hewɔ ni efoko amanehulu sɛɛ lɛ?

⁹ Jeee Yehowa ni hãa mɛi naa amanehulu. Esaaa akɛ wɔshwaa lɛ yɛ tai, kɛ awuiyeli, kɛ yiwaa ni yaa nɔ lɛ ahe. Jeee Nyɔŋmɔ ni hãa nibii tamɔ shikpɔŋhosomɔi, kɛ kɔɔyɔɔ ni naa wa ni tswaa, kɛ nu afuai baa. Shi ekolɛ obaabi akɛ, ‘Bɛ Yehowa yɛ hewalɛ fe mɔ fɛɛ mɔ yɛ je lɛ mli, no hewɔ lɛ, mɛni hewɔ efooo nibii gbohii nɛɛ asɛɛ lɛ?’ Wɔle akɛ Nyɔŋmɔ jwɛŋɔ wɔhe waa, no hewɔ lɛ, eyɛ yiŋtoo pɔtɛɛ ko hewɔ ni efoko amanehulu sɛɛ lɛ.​—1 Yohane 4:8.

10. Mɛni Satan wie eshi Yehowa?

¹⁰ Abonsam hã Adam kɛ Hawa ná Nyɔŋmɔ he jwɛŋmɔ ni ejaaa yɛ Eden abɔɔ lɛ mli. Satan kɛɛ Nyɔŋmɔ jeee Nɔyelɔ kpakpa. Ekɛɛ Nyɔŋmɔ kɛ nɔ ko kpakpa miitee Adam kɛ Hawa. No mli lɛ, Satan miitao ni amɛhe amɛye akɛ eji nɔyelɔ kpakpa fe Yehowa, ni ehe ehiaaa ni amɛkɛ amɛhiɛ fɔ̃ɔ Nyɔŋmɔ nɔ.​—1 Mose 3:2-5; kwɛmɔ Wiemɔi Komɛi Amligbalamɔ 27.

11. Mɛɛ sanebimɔ esa akɛ wɔsusu he?

¹¹ Adam kɛ Hawa gbo Yehowa nɔ toi ni amɛtse ehiɛ atua. Amɛsusu akɛ amɛyɛ hegbɛ ni amɛ diɛŋtsɛ amɛtsɔɔ nɔ ni hi kɛ nɔ ni ehiii. Te Yehowa aaafee tɛŋŋ ehã ana akɛ atuatselɔi nɛɛ nyɛŋ afee nakai, shi moŋ lɛ ji mɔ ni le nɔ ni hi kɛhã wɔ lɛ?

12, 13. (a) Be ni Adam kɛ Hawa fee esha lɛ, mɛni hewɔ Yehowa kpãtãaa amɛhiɛ amrɔ nɔŋŋ lɛ? (b) Mɛni hewɔ Yehowa eŋmɛ Satan gbɛ koni eye je lɛ nɔ lɛ? Mɛni hewɔ Yehowa eŋmɛ adesai agbɛ koni amɛ diɛŋtsɛ amɛto nɔyelii srɔtoi ni amɛsumɔɔ lɛ?

 ¹² Be ni Adam kɛ Hawa fee esha lɛ, Yehowa kpãtãaa amɛhiɛ amrɔ nɔŋŋ. Yehowa fee nakai koni amɛfɔ, ni no ahã yiŋ ni eto akɛ ebaahã gbɔmɛi ni eye emuu ahi shikpɔŋ lɛ nɔ lɛ aba mli wɔsɛɛ. Yehowa hã Adam kɛ Hawa bii lɛ hegbɛ koni amɛhala mɔ ni amɛsumɔɔ ni eye amɛnɔ. Yɛ nɔ ni Abonsam fee lɛ fɛɛ sɛɛ lɛ, Yehowa yiŋtoo akɛ ebaahã gbɔmɛi ni eye emuu ahi shikpɔŋ lɛ nɔ lɛ baaba mli kɛ̃.​—1 Mose 1:28; Yesaia 55:10, 11.

¹³ Be ni Satan wie eshi Yehowa lɛ, ŋwɛibɔfoi akpekpei abɔ na. (Hiob 38:7; Daniel 7:10) No hewɔ lɛ, Yehowa hã Satan be koni ekɛtsɔɔ kɛji nɔ ni ewie lɛ ji anɔkwale. Nyɔŋmɔ hã adesai hu be koni amɛ diɛŋtsɛ amɛto nɔyelii srɔtoi ni amɛsumɔɔ yɛ Satan kudɔmɔ shishi koni akwɛ akɛ, kɛ́ Nyɔŋmɔ yeee ebuaaa amɛ be ni amɛfeɔ nakai lɛ, amɛhe baajɔ amɛ lo.

14. Mɛɛ anɔkwa sane efee faŋŋ?

¹⁴ Afii akpei abɔ ni eho nɛ lɛ, adesai eto nɔyelii srɔtoi, shi eko eko yeko omanye. Enɛ tsɔɔ faŋŋ akɛ Satan ji amalelɔ. Anɔkwa sane lɛ ji akɛ, kɛ́ Nyɔŋmɔ yeee ebuaaa adesai lɛ, nɔ ko nɔ ko ehiŋ ehãŋ amɛ. Nɔ ni gbalɔ Yeremia wie lɛ ja, ekɛɛ akɛ: “Ao Yehowa, mile akɛ gbɔmɔ gbɛ bɛ lɛ diɛŋtsɛ edɛŋ. Bɔ ni gbɔmɔ ni nyiɛ lɛ baakudɔ lɛ diɛŋtsɛ enajifaamɔi ehã po lɛ, ebɛ edɛŋ.”​—Yeremia 10:23.

15, 16. (a) Mɛni hewɔ Yehowa ehã amanehulu etee nɔ be kplaŋŋ lɛ? (b) Mɛni hewɔ Yehowa efoko nibii gbohii ni Satan ehã eba lɛ asɛɛ lɛ?

¹⁵ Mɛni hewɔ Yehowa ehã amanehulu etee nɔ be kplaŋŋ lɛ? Mɛni hewɔ efooo nibii gbohii asɛɛ lɛ? Ehe  bahia ni ahã be ashwie mli koni efee faŋŋ akɛ Satan nɔyeli lɛ ehiii. Adesai eto nɔyelii srɔtoi, shi eko eko yeko omanye. Eyɛ mli akɛ sainsi loo jeŋ shikpamɔ ehã adesai etee hiɛ yɛ nilee mli moŋ, shi efɔŋfeemɔ, ohia, mlatɔmɔ, kɛ tai efa fe bei fɛɛ ni eho. Enɛ tsɔɔ faŋŋ akɛ, ja Nyɔŋmɔ eye ebua adesai dani amɛbaaye omanye.

¹⁶ Shi Yehowa efoko nibii gbohii ni Satan ehã eba lɛ asɛɛ. Kɛ́ efee nakai lɛ, no baatsɔɔ akɛ eyɛ Satan nɔyeli lɛ he miishɛɛ. Yehowa efeŋ nɔ ko ni tamɔ nakai kɔkɔɔkɔ. Agbɛnɛ hu, kɛ́ efee nakai lɛ, adesai baasusu akɛ nɔyelii srɔtoi ni amɛto lɛ hi. Shi ejeee anɔkwale, ni Yehowa náaa amale nɛɛ he miishɛɛ. Ni emaleee hu.​—Hebribii 6:18.

17, 18. Mɛni Yehowa baafee yɛ nibii fɛɛ ni Satan efite lɛ he?

¹⁷ Ani Yehowa baanyɛ asaa nibii fɛɛ ni efite yɛ Satan kɛ adesai atuatsemɔ lɛ hewɔ lɛ? Hɛɛ. Nyɔŋmɔ nyɛɔ nii fɛɛ efeɔ. Yehowa le be ni ebaahe ni akɛbaana saji ni Satan tee lɛ shi lɛ fɛɛ naa jogbaŋŋ. Kɛkɛ lɛ, tamɔ bɔ ni eto eyiŋ momo lɛ, ebaahã shikpɔŋ lɛ atsɔ paradeiso. Abaatee mɛi fɛɛ ni yɔɔ “gbohii abui lɛ” amli lɛ ashi. (Yohane 5:28, 29) Yɛ nakai beiaŋ lɛ, hela mɔŋ mɛi, ni mɛi gboiŋ hu. Yesu baasaa nibii fɛɛ ni Satan efite lɛ. Yehowa baahã Yesu ‘afite Abonsam nitsumɔi lɛ.’ (1 Yohane 3:8) Wɔmiida Yehowa shi ejaakɛ eto etsui shi ehã wɔ koni wɔle lɛ ni wɔnyɛ wɔkpɛ wɔyiŋ kɛji wɔbaasumɔ ni eye wɔnɔ. (Kanemɔ 2 Petro 3:9, 10.) Kɛ́ wɔkɛ shihilɛ ni mli wa miikpe po lɛ, Nyɔŋmɔ yeɔ ebuaa wɔ koni wɔfi shi.​—Yohane 4:23; kanemɔ 1 Korintobii 10:13.

¹⁸ Yehowa enyɛɛɛ wɔnɔ koni wɔhã eye wɔnɔ. Ehã gbɔmɛi hegbɛ koni amɛhala nɔ ni amɛsumɔɔ. Hã wɔsusu bɔ ni esa akɛ wɔkɛ hegbɛ ni nɔ bɛ nɛɛ atsu nii ahã lɛ he.

19. Mɛɛ hegbɛ ni nɔ bɛ Yehowa kɛdro wɔ? Mɛni hewɔ esa akɛ wɔda Yehowa shi yɛ hegbɛ ni ekɛdro wɔ koni wɔhala nɔ ni wɔsumɔɔ lɛ he lɛ?

¹⁹ Hegbɛ ni nɔ bɛ ni Yehowa kɛdro wɔ koni wɔhala nɔ ni wɔsumɔɔ lɛ hãa esoroɔ wɔ kwraa yɛ kooloi ahe. Nɔ titri ni tsirɛɔ kooloi koni amɛfee nɔ ko ji bɔ ni amɛnuɔ he amɛhãa yɛ amɛfɔmɔ su naa, shi wɔ lɛ wɔbaanyɛ wɔhala bɔ ni wɔsumɔɔ wɔhi shi wɔhã, ni wɔkpɛ wɔyiŋ kɛji wɔbaafee nɔ ni Yehowa sumɔɔ loo wɔfeee. (Abɛi 30:24, shishigbɛ niŋmaa) Agbɛnɛ hu lɛ, wɔtamɔɔɔ tsɔji ni feɔ nɔ pɛ ni afee amɛ akɛ amɛfee lɛ. Wɔbaanyɛ wɔhala nɔ gbɔmɛi ni wɔbaasumɔ ni wɔtsɔmɔ, mɛi ni wɔbaasumɔ ni wɔkɛbɔ nanemɛi, kɛ nɔ ni wɔbaasumɔ ni wɔkɛ wɔwala afee. Yehowa miisumɔ ni wɔná miishɛɛ.

20, 21. Mɛni ji nɔ ni hi fe fɛɛ ni obaanyɛ ofee bianɛ?

²⁰ Yehowa miisumɔ ni wɔsumɔ lɛ. (Mateo 22:37, 38) Etamɔ tsɛ ko ni náa miishɛɛ kɛ́ ebi jɛ etsui mli ekɛɛ lɛ akɛ, “Misumɔɔ osane,” jeee ni anyɛ enɔ ni ekɛɛ nakai lɛ hewɔ. Yehowa ehã wɔ hegbɛ koni wɔhala kɛji wɔbaasɔmɔ lɛ loo wɔfeŋ nakai. Satan, kɛ Adam, kɛ Hawa hala akɛ amɛsɔmɔɔɔ Yehowa. Te okɛ hegbɛ ni Nyɔŋmɔ kɛdro bo koni ohala nɔ ni osumɔɔ lɛ baatsu nii ohã tɛŋŋ?

²¹ Ehi akɛ obaahala akɛ obaasɔmɔ Yehowa. Mɛi akpekpei abɔ ehala akɛ amɛbaafee nɔ ni Nyɔŋmɔ sumɔɔ, ni amɛbooo Satan toi. (Abɛi 27:11) Mɛni esa akɛ ofee bianɛ koni ohi jeŋ hee lɛ mli, he ni Nyɔŋmɔ baafo amanehului fɛɛ sɛɛ yɛ lɛ? Abaahã sanebimɔ nɛɛ hetoo yɛ yitso ni nyiɛ sɛɛ lɛ mli.