BENI gbɔmɛi ayi bɔi famɔ yɛ shikpɔŋ lɛ nɔ lɛ, amɛteŋ mɛi pii fee nibii fɔji tamɔ Kain. Shi esoro amɛteŋ mɔ kome. Lɛ ji nuu ni atsɛɔ lɛ Henok lɛ. Henok ji nuu ekãalɔ. Gbɔmɛi ni eyɔɔ amɛteŋ lɛ fɛɛ miifee nibii gbohii, shi Henok tee nɔ esɔmɔ Nyɔŋmɔ.

Ani ole nɔ hewɔ ni nakai blema bii lɛ fee nibii fɔji babaoo lɛ? Bo lɛ susumɔ enɛ he okwɛ, Namɔ haaa Adam kɛ Hawa abo Nyɔŋmɔ toi, ni eha amɛye tso yibii ni Nyɔŋmɔ kɛɛ amɛkaye lɛ? Hɛɛ, ŋwɛibɔfo fɔŋ ko fee nakai. Biblia lɛ tsɛɔ lɛ Satan. Ni eebɔ mɔdɛŋ ni eha mɔ fɛɛ mɔ afee efɔŋ.

Gbi ko lɛ Yehowa Nyɔŋmɔ hã Henok kɛɛ gbɔmɛi lɛ nɔ ko ni amɛsumɔɔɔ ni amɛboɔ toi. No ji enɛ: ‘Gbi ko baaba ni Nyɔŋmɔ baakpata gbɔmɛi fɔji fɛɛ ahiɛ.’ Ekolɛ beni gbɔmɛi lɛ nu enɛ lɛ, amɛmli fu waa. Ebaanyɛ eba akɛ amɛbɔ mɔdɛŋ ni amɛgbe Henok po. No hewɔ lɛ, ehe miihia ni Henok afee ekãalɔ diɛŋtsɛ koni enyɛ ekɛɛ gbɔmɛi lɛ nɔ ni Nyɔŋmɔ baafee.

Nyɔŋmɔ haaa Henok ahi wala mli yɛ be kakadaŋŋ mli yɛ nakai gbɔmɛi fɔji lɛ ateŋ. Henok ye afii 365 pɛ. Mɛni hewɔ wɔkɛɔ akɛ “afii 365 pɛ” lɛ? Ejaakɛ gbɔmɛi ni hi shi yɛ nakai gbii lɛ amli lɛ ahe wa fe wɔ, ni amɛtsɛɔ. Nɔ ni tsɔɔ nakai ji, Henok bi Metusela hi shi ni eye afii 969!

Yɛ Henok gbele sɛɛ lɛ, gbɔmɛi lɛ anɔ fɔŋ feemɔ lɛ mli bawa waa. Biblia lɛ kɛɔ akɛ ‘nɔ fɛɛ nɔ ni amɛjwɛŋɔ he lɛ ji efɔŋ be fɛɛ be,’ ni ‘yiwalɛ yi shikpɔŋ lɛ nɔ obɔ.’

Ani ole nɔ hewɔ ni haomɔi pii yɔɔ shikpɔŋ nɔ yɛ nakai gbii lɛ amli lɛ eko? No ji akɛ Satan ná gbɛ hee ko ni etsɔɔ nɔ ehaa gbɔmɛi feɔ efɔŋ. Wɔbaakase enɛ he nii agbɛnɛ.