ANI oona nɔ ni Abraham feɔ yɛ biɛ lɛ? Ehiɛ kakla, ni etamɔ nɔ ni ebaagbe ebi lɛ. Mɛni hewɔ kwraa esa akɛ efee nakai? Klɛŋklɛŋ lɛ, nyɛhaa wɔkwɛa bɔ ni fee ni Abraham kɛ Sara fɔ amɛbinuu lɛ.

Kaimɔ akɛ, Nyɔŋmɔ wo amɛ shi akɛ amɛbaafɔ binuu. Shi etamɔ nɔ ni enyɛŋ eba mli, ejaakɛ Abraham kɛ Sara egbɔ tsɔ̃. Shi, Abraham hé eye akɛ Nyɔŋmɔ baanyɛ afee nɔ ko ni anyɛŋ afee. No hewɔ lɛ mɛni ba?

Afi muu ho yɛ Nyɔŋmɔ shiwoo lɛ sɛɛ. Kɛkɛ ni beni Abraham eye afii 100 ni Sara hu eye afii 90 lɛ, amɛfɔ binuu ni awo lɛ gbɛi akɛ Isak. Nyɔŋmɔ eye eshiwoo lɛ nɔ!

Shi beni Isak da saŋŋ lɛ, Yehowa ka Abraham hemɔkɛyeli ekwɛ. Etsɛ lɛ akɛ: ‘Abraham!’ Ni Abraham here nɔ akɛ: ‘Naa mi!’ Kɛkɛ ni Nyɔŋmɔ kɛɛ: ‘Ŋɔɔ obinuu lɛ, obi koome Isak, ni oya gɔŋ ni matsɔɔ bo lɛ nɔ. Gbee obi lɛ yɛ jɛmɛ ni okɛ lɛ ashã afɔle.’

Nakai wiemɔi lɛ ha Abraham werɛ ho ehe, ejaakɛ Abraham sumɔɔ ebinuu lɛ jogbaŋŋ. Ni kaimɔ akɛ, Nyɔŋmɔ ewo shi akɛ Abraham bii lɛ baahi Kanaan shikpɔŋ lɛ nɔ. Shi te baafee tɛŋŋ ni enɛ baaba mli kɛji Isak egbo lɛ? Abraham nuuu shishi, shi kɛlɛ ebo Nyɔŋmɔ toi.

Beni amɛshɛ gɔŋ lɛ nɔ lɛ, Abraham fimɔ Isak ni ekɛ lɛ fɔ afɔleshãa latɛ ni ema lɛ nɔ. Kɛkɛ ni ejie kakla lɛ koni ekɛgbe ebi lɛ. Shi amrɔ nɔŋŋ pɛ kɛkɛ ni Nyɔŋmɔ bɔfo tsɛ lɛ: ‘Abraham, Abraham!’ Ni Abraham here nɔ akɛ: ‘Naa mi!’

Nyɔŋmɔ kɛɛ lɛ akɛ: ‘Kaafee gbekɛ lɛ efɔŋ ko. Kpaako miná mile akɛ oheɔ mi oyeɔ, ejaakɛ okamaaa mi obinuu, ni ji obi kome too lɛ.’

Mɛɛ hemɔkɛyeli kpeteŋkpele Abraham yɔɔ yɛ Nyɔŋmɔ mli nɛkɛ! Ehe eye akɛ nɔ ko nɔ ko bɛ ni Yehowa nyɛŋ afee, ni ákɛ, Yehowa baanyɛ atee Isak shi kɛjɛ gbohii ateŋ po. Shi jeee Nyɔŋmɔ suɔmɔnaa nii diɛŋtsɛ ji ni Abraham agbe Isak. No hewɔ lɛ, Nyɔŋmɔ ha too ko ka jwɛi komɛi ni yɔɔ jɛmɛ lɛ mli, ni ekɛɛ Abraham ni ekɛ too lɛ moŋ ashã afɔle shi jeee ebi lɛ.