ANI ole yoo ni yɔɔ mfoniri nɛɛ mli lɛ? Egbɛi ji Rebeka. Ni nuu ni ekɛ lɛ yaakpe lɛ ji Isak. Ebaatsɔ eŋa. Te fee tɛŋŋ ni enɛ ba lɛ nakai hu?

Isak papa Abraham miitao ni ená ŋa kpakpa eha ebinuu lɛ. Esumɔɔɔ ni Isak kɛ Kanaan yei lɛ eko ahi shi akɛ eŋa, ejaakɛ amɛjaa apasa nyɔŋmɔi. No hewɔ lɛ Abraham tsɛ etsulɔ lɛ ni ekɛɛ lɛ akɛ: ‘Miisumɔ ni oya Haran yɛ he ni miwekumɛi lɛ yɔɔ lɛ, koni oyatao ŋa oha mibinuu Isak.’

Oya nɔŋŋ kɛkɛ ni Abraham tsulɔ lɛ ŋɔ yomai nyɔŋma ni efã gbɛ kakadaŋŋ lɛ. Beni ebɛŋkɛ he ni Abraham wekumɛi lɛ yɔɔ lɛ, ewa yɛ nu bu ko he. No mli lɛ hulu miiya ayanyɔ shi, ni maŋ lɛ mli yei lɛ baaba ni amɛbashá nu yɛ nubu lɛ mli. No hewɔ lɛ Abraham tsulɔ lɛ sɔle eha Yehowa akɛ: ‘Eba akɛ yoo ni aaashá nu aha mi kɛ yomai lɛ afee yoo ni ooohala lɛ akɛ efee Isak ŋa lɛ.’

Etsɛɛɛ kɛkɛ ni Rebeka ba ni ebaashá nu. Beni tsulɔ lɛ bi lɛ nu lɛ, eha lɛ eko. Ni eyɛ nu babaoo eha eyomai ni kumai yeɔ amɛ lɛ fɛɛ hu. Eji nitsumɔ ni wa waa ejaakɛ yomai nuɔ nu pii diɛŋtsɛ.

Beni Rebeka gbe naa lɛ, Abraham tsulɔ lɛ bi lɛ epapa gbɛi. Ni ebi lɛ hu akɛ ani ebaanyɛ ewɔ amɛshia nakai gbɛkɛ lɛ lo. Eha hetoo akɛ: ‘Mipapa gbɛi ji Betuel, ni obaaná wɔɔhe hu.’ Abraham tsulɔ lɛ le akɛ Abraham nyɛmi Nahor binuu ji Betuel. No hewɔ lɛ, ekula shi ni eda Yehowa shi akɛ enyiɛ ehiɛ kɛtee Abraham wekumɛi lɛ aŋɔɔ.

Nakai gbɛkɛ lɛ, Abraham tsulɔ lɛ kɛɛ Betuel kɛ Rebeka nyɛmi nuu Laban nɔ hewɔ ni eba jɛmɛ lɛ. Amɛ fɛɛ amɛkpɛlɛ nɔ akɛ Rebeka baanyɛ ekɛ lɛ aya ni ekɛ Isak ayabote gbalashihilɛ mli. Mɛni Rebeka kɛɛ beni abi lɛ lɛ? Ekpɛlɛ nɔ akɛ, ‘Hɛɛ,’ eesumɔ ni eya. Enɔ jetsɛremɔ pɛ ni amɛtara yomai lɛ anɔ ni amɛje gbɛfãa kakadaŋŋ lɛ shishi kɛku sɛɛ kɛtee Kanaan.

Beni amɛyashɛ lɛ, no mli lɛ je ena. Kɛkɛ ni Rebeka na nuu ko ni nyiɛ ŋa lɛ nɔ. Isak ni. Beni ena Rebeka lɛ eŋɔɔ enaa waa. No mli lɛ, emami Sara egbo aaafee afii etɛ, ni eeye awerɛho yɛ enɛ he lolo. Shi agbɛnɛ Isak basumɔ Rebeka waa diɛŋtsɛ, ni ena miishɛɛ ekoŋŋ.