ANI ole klɛŋklɛŋ nii ni Noa fee beni ekɛ eweku lɛ je kpo kɛjɛ adeka lɛ mli lɛ? Eshã afɔle loo ekɛ nikeenii ha Nyɔŋmɔ. Obaana ni eefee enɛ yɛ mfoniri ni yɔɔ shishigbɛ nɛɛ mli. Noa kɛ kooloi nɛɛ shã afɔle eha Nyɔŋmɔ ekɛda lɛ shi yɛ eweku lɛ ni ebaa amɛyi kɛjɛ nu afua kpeteŋkpele lɛ mli lɛ hewɔ.

Ani osusuɔ akɛ Yehowa hiɛ sɔ nikeenii lɛ? Hɛɛ, ehiɛ sɔ. No hewɔ lɛ, ewo Noa shi akɛ ekɛ nu afua fiteŋ je lɛ dɔŋŋ.

Etsɛɛɛ ni shikpɔŋ lɛ nɔ he fɛɛ he gbi, kɛkɛ ni Noa kɛ eweku lɛ je shihilɛ hee shishi beni amɛje adeka lɛ mli lɛ. Nyɔŋmɔ jɔɔ amɛ ni ekɛɛ amɛ akɛ: ‘Nyɛfɔa bii babaoo. Nyɛyi afaa aahu kɛyashi be mli ni gbɔmɛi aaayi shikpɔŋ lɛ fɛɛ nɔ obɔ.’

Shi yɛ sɛɛ mli lɛ, kɛ gbɔmɛi nu nu afua kpeteŋkpele lɛ he lɛ, amɛbaashe gbeyei akɛ ekolɛ nu afua ko ni tamɔ nakai baaba ekoŋŋ. No hewɔ lɛ Nyɔŋmɔ kɛ nɔ ko ha gbɔmɛi ni baakai amɛ akɛ ewo shi akɛ ekɛ nu afua fiteŋ je lɛ dɔŋŋ. Ani ole nɔ ni ekɛha amɛ koni ekai amɛ lɛ? No ji kwaabuɛtɛ.

Afɔɔ kwaabuɛtɛ namɔ yɛ atatuiaŋ kɛ́ nugbɔ nɛ ni hulu tso kɛtsɔ mli yɛ no sɛɛ. Kwaabuɛtɛ yɛ fɛo diɛŋtsɛ ni amɛhiɛ sui srɔtoi pii. Ani ona eko pɛŋ? Ani oona nɔ ni yɔɔ mfoniri nɛɛ mli lɛ?

Nɔ ni Nyɔŋmɔ kɛɛ nɛ: ‘Miiwo shi akɛ mikɛ nu afua kpataŋ gbɔmɛi kɛ kooloi fɛɛ hiɛ dɔŋŋ. Mikɛ mikwaabuɛtɛ etsotsoro shi yɛ ŋwɛi. Ni kɛ kwaabuɛtɛ lɛ pue lɛ, mana, ni makai mishiwoo lɛ.’

No hewɔ lɛ kɛ ona kwaabuɛtɛ yɛ be ko mli lɛ, mɛni esa akɛ no akai bo? Hɛɛ, Nyɔŋmɔ shiwoo akɛ ekɛ nu afua kpeteŋkpele kpataŋ je lɛ hiɛ dɔŋŋ lɛ.