KWƐMƆ Mose ni miijo foi kɛmiijɛ Mizraim. Ani oona hii ni nyiɛ esɛɛ lɛ? Ani ole nɔ hewɔ ni amɛtaoɔ ni amɛgbe Mose lɛ? Ha wɔkwɛ akɛ wɔbaanyɛ wɔle lo.

Mose da yɛ Farao, Mizraim nɔyelɔ lɛ shia. Ebatsɔ nilelɔ kɛ nuu ni ehe gbɛi. Mose le akɛ jeee Mizraimnyo ji lɛ, shi efɔlɔi diɛŋtsɛ ji Israelbii ni amɛtsɔmɔ nyɔji.

Gbi ko, beni eye afii 40 lɛ, Mose to eyiŋ akɛ ebaaya ni eyakwɛ bɔ ni ewebii lɛ yaa nɔ amɛhaa. Nɔ ni afeɔ amɛ lɛ yɛ mɔbɔ waa. Ena Mizraimnyo ko ni miiyi Israel nyɔŋ ko. Mose kwɛ ehe kɛkpe, ni beni ena akɛ mɔ ko kwɛɛɛ lɛ lɛ, etswa Mizraimnyo lɛ nɔ̃, ni Mizraimnyo lɛ gbo. Kɛkɛ ni Mose fu egbonyo lɛ yɛ shia lɛ mli.

Enɔ jetsɛremɔ lɛ, Mose tee koni eyasara ewebii lɛ ekoŋŋ. Esusu akɛ ebaanyɛ eye ebua amɛ koni amɛkatsɔmɔ nyɔji dɔŋŋ. Shi ena Israelbii enyɔ ni miinɔ, no hewɔ lɛ Mose kɛɛ mɔ ni sane ejaaa lɛ akɛ: ‘Mɛni hewɔ oyiɔ onyɛmi lɛ?’

Nuu nɛɛ kɛɛ lɛ akɛ: ‘Namɔ fee bo wɔ nɔyelɔ kɛ kojolɔ? Ani obaagbe mi tamɔ bɔ ni ogbe nakai Mizraimnyo lɛ?’

Agbɛnɛ Mose she gbeyei. Ele akɛ gbɔmɛi ele nɔ ni efee nakai Mizraimnyo lɛ. Farao po nu he, ni etsu mɛi koni amɛyagbe Mose. Enɛ hewɔ ni Mose jo foi kɛjɛ Mizraim lɛ.

Beni Mose shi Mizraim lɛ, etee Midian shikpɔŋ ni yɔɔ shɔŋŋ lɛ nɔ. Kɛkɛ ni ekɛ Yetro weku lɛ yakpe yɛ jɛmɛ, ni ekɛ ebiyei lɛ ateŋ mɔ kome ni atsɛɔ lɛ Zipora lɛ hi shi. Mose batsɔ tookwɛlɔ, ni ekwɛɔ Yetro tooi lɛ anɔ. Ehi Midian shikpɔŋ lɛ nɔ afii 40. Agbɛnɛ eye afii 80. Kɛkɛ ni gbi ko beni Mose kwɛɔ Yetro tooi lɛ, naakpɛɛ nii ko ba ni tsake Mose shihilɛ fɛɛ. Gbelemɔ baafa ni nyiɛ sɛɛ lɛ, ni wɔkwɛ nɔ ni naakpɛɛ nii nɛɛ ji.