KWƐMƆ Yoshua. Eekɛɛ akɛ: ‘Hulu, wa odamɔ shi!’ Ni hulu lɛ wa edamɔ shi. Ewa edamɔ shi yɛ he kome gbi muu lɛ fɛɛ. Yehowa ji mɔ ni ha efee nakai! Shi nyɛhaa wɔkwɛa nɔ hewɔ ni Yoshua sumɔɔ ni hulu lɛ akpɛ́ aahu kɛtsa nɔ lɛ.

Beni maŋtsɛmɛi fɔji enumɔ ni yɔɔ Kanaan shikpɔŋ lɛ nɔ lɛ kɛ Gibeonbii lɛ bɔi tawuu lɛ, Gibeonbii lɛ tsu nuu ko kɛtee Yoshua ŋɔɔ koni eyakɛɛ lɛ ni ebaye ebua amɛ. Ekɛɛ akɛ: ‘Ba oya!’ Baahere wɔ! Maŋtsɛmɛi ni yɔɔ gɔŋ nɔ shikpɔŋ nɔ lɛ fɛɛ ete shi amɛkɛ otsuji miiwu ta.’

Amrɔ nɔŋŋ kɛkɛ ni Yoshua kɛ etabilɔi lɛ fɛɛ tee. Amɛnyiɛ jenamɔ fɛɛ. Beni amɛbashɛ Gibeon lɛ, maŋtsɛmɛi enumɔ lɛ asraafoi lɛ atsui fã waa ni amɛbɔi foijee. Kɛkɛ ni Yehowa ha nyɔŋmɔŋtɛi agboi nɛ̃ kɛjɛ ŋwɛi kɛshwie shi, ni egbe asraafoi lɛ ateŋ mɛi pii fe mɛi abɔ ni Yoshua tabilɔi lɛ gbe amɛ lɛ.

Yoshua na akɛ etsɛŋ ni hulu lɛ baanyɔ shi. Duŋ baawo, ni maŋtsɛmɛi fɔji enumɔ lɛ asraafoi lɛ ateŋ mɛi pii baajo foi. No hewɔ ni Yoshua sɔle eha Yehowa ni ekɛɛ akɛ: ‘Hulu, wa odamɔ shi!’ lɛ. Ni akɛni hulu lɛ tee nɔ ekpɛ́ aahu hewɔ lɛ, Israelbii lɛ nyɛ amɛgbe kunim ni amɛyeɔ yɛ ta lɛ mli lɛ naa.

Maŋtsɛmɛi fɔji babaoo yɛ Kanaan lolo ni amɛsumɔɔɔ Nyɔŋmɔ webii asane. Yoshua kɛ etabilɔi lɛ kɛ aaafee afii ekpaa ye shikpɔŋ lɛ nɔ maŋtsɛmɛi 31 nɔ kunim. Beni amɛfee enɛ amɛgbe naa lɛ, Yoshua kwɛ koni aja Kanaan shikpɔŋ lɛ aha akutsei ni shikpɔŋ he hiaa amɛ lɛ.

Afii babaoo baho, ni yɛ naagbee lɛ Yoshua gbo beni eye afii 110. Yɛ be mli ni ekɛ enanemɛi lɛ yɔɔ wala mli lɛ, gbɔmɛi lɛ boɔ Yehowa toi. Shi beni gbɔmɛi kpakpai nɛɛ gboi lɛ, gbɔmɛi lɛ bɔi nibii gbohii afeemɔ ekoŋŋ ni amɛbote haomɔ mli. Nɛkɛ be nɛɛ mli Nyɔŋmɔ dɛŋ yelikɛbuamɔ he hiaa amɛ lɛɛlɛŋ.