NƆ NI fe afii 10 eho kɛjɛ be mli ni Maŋtsɛ Nebukadnezar ŋɔ Israelbii ni le woloŋ fe fɛɛ lɛ fɛɛ kɛtee Babilon lɛ. Agbɛnɛ kwɛmɔ nɔ ni yaa nɔ! Aashã Yerusalem. Ni aaŋɔ Israelbii ní agbeee amɛ lɛ kɛmiiya Babilon akɛ nomii.

Kaimɔ akɛ, nɛkɛ ji bɔ ni Yehowa gbalɔi lɛ bɔ kɔkɔ akɛ ebaaba kɛji gbɔmɛi lɛ tsakeee amɛ gbɛi fɔji lɛ. Shi Israelbii lɛ booo gbalɔi lɛ atoi. Yɛ nɔ najiaŋ ni amɛaaja Yehowa lɛ, amɛtee nɔ lolo amɛja apasa nyɔŋmɔi. No hewɔ lɛ esa akɛ agbala gbɔmɛi lɛ atoi. Wɔle enɛ ejaakɛ Nyɔŋmɔ gbalɔ Ezekiel gbaa wɔ nibii gbohii ni Israelbii lɛ feɔ lɛ ahe saji.

Ani ole mɔ ni Ezekiel ji? Eji obalahii ni Maŋtsɛ Nebukadnezar loo kɛtee Babilon nɔ ni fe afii 10 dani nɛkɛ Yerusalem hiɛkpatamɔ kpeteŋkpele nɛɛ ba lɛ ateŋ mɔ kome. Aŋɔ Daniel kɛ enanemɛi etɛ lɛ, Shadrak, Meshak kɛ Abednego hu kɛtee Babilon yɛ nakai be lɛ nɔŋŋ mli.

Beni Ezekiel yɔɔ Babilon lolo lɛ, Yehowa kɛ nibii gbohii ni yaa nɔ yɛ Yerusalem yɛ sɔlemɔwe lɛ tsɔɔ lɛ. Yehowa fee enɛ kɛtsɔ naakpɛɛ nii ko nɔ. Eyɛ faŋŋ akɛ, Ezekiel yɛ Babilon lolo moŋ, shi Yehowa ha ena nɔ fɛɛ nɔ ni yaa nɔ yɛ sɔlemɔwe lɛ. Ni nɔ ni Ezekiel na lɛ haa mɔ naa kpɛɔ ehe waa!

Yehowa kɛɛ Ezekiel akɛ: ‘Kwɛmɔ nihii nii ni gbɔmɛi lɛ feɔ yɛ biɛ yɛ sɔlemɔwe lɛ. Kwɛ bɔ ni gbogboi lɛ ahe fɛɛ eyi obɔ kɛ onufui kɛ kooloi krokomɛi ahe mfonirii. Ni kwɛmɔ Israelbii lɛ ni amɛmiijá amɛ!’ Ezekiel nyɛ ena nɛkɛ nibii nɛɛ fɛɛ, ni eŋmala nɔ ni yaa nɔ yɛ jɛmɛ lɛ fɛɛ eshwie shi.

Yehowa bi Ezekiel akɛ: ‘Ani oona nɔ ni Israelbii ahiɛnyiɛlɔi lɛ feɔ yɛ teemɔŋ lɛ?’ Hɛɛ, eena enɛ hu. Hii 70 yɛ jɛmɛ, ni amɛ fɛɛ amɛmiijá apasa nyɔŋmɔi. Amɛmiikɛɛ akɛ: ‘Yehowa enaaa wɔ. Eshi shikpɔŋ lɛ.’

Agbɛnɛ Yehowa kɛ yei komɛi ni yɔɔ sɔlemɔwe lɛ kooyigbɛ agbó lɛ naa lɛ tsɔɔ Ezekiel. Amɛtara jɛmɛ ni amɛmiijá apasa nyɔŋmɔ ni ji Tamuz lɛ. Ni kwɛmɔ nakai hii ni yɔɔ Yehowa sɔlemɔwe lɛ agbó lɛ naa lɛ hu! Amɛyibɔ miihe ashɛ 25. Ezekiel miina amɛ. Amɛmiikoto shi amɛmiikwɛ bokagbɛ ni amɛmiijá hulu!

Yehowa kɛɛ akɛ: ‘Gbɔmɛi nɛɛ bɛ bulɛ ko kwraa kɛha mi. Jeee akɛ amɛfeɔ nibii gbohii kɛkɛ, shi moŋ amɛbaa misɔlemɔwe lɛ tɔ̃ɔ ni amɛbafeɔ!’ No hewɔ lɛ Yehowa wo shi akɛ: ‘Amɛbaana mimlifu lɛ hewalɛ lɛ. Ni kɛ aakpata amɛhiɛ lɛ minaŋ amɛ mɔbɔ.’

Aaafee afii etɛ pɛ yɛ be mli ni Yehowa kɛ nibii nɛɛ etsɔɔ Ezekiel sɛɛ lɛ, kɛkɛ ni Israelbii lɛ tse Maŋtsɛ Nebukadnezar hiɛ atua. No hewɔ lɛ etee koni ekɛ amɛ ayawu. Afi kɛ fã sɛɛ lɛ, Babilonbii lɛ kumɔ Yerusalem gbogboi lɛ ni amɛshã maŋ lɛ kwraa. Agbe gbɔmɛi lɛ ateŋ mɛi babaoo aloo amɔmɔ amɛ kɛtee Babilon akɛ nomii.

Mɛni hewɔ Yehowa ha hiɛkpatamɔ kpeteŋkpele nɛɛ ba Israelbii lɛ anɔ lɛ? Hɛɛ, ejaakɛ amɛbooo Yehowa toi ni amɛyeee emlai lɛ anɔ. Enɛ tsɔɔ bɔ ni ehe hiaa kɛha wɔ akɛ wɔɔfee nɔ ni Nyɔŋmɔ kɛɔ wɔ akɛ wɔfee lɛ daa.

Yɛ shishijee mli lɛ, aŋmɛ mɛi fioo pɛ gbɛ ni amɛhi Israel shikpɔŋ lɛ nɔ. Maŋtsɛ Nebukadnezar kɛ Yudanyo ko ni atsɛɔ lɛ Gedalia to amɛ nɔ akɛ ekwɛ gbɔmɛi lɛ anɔ. Shi Israelbii komɛi gbe Gedalia. Agbɛnɛ gbɔmɛi lɛ miishe gbeyei akɛ Babilonbii lɛ baaba abakpata amɛ fɛɛ amɛhiɛ akɛni nɛkɛ nɔ fɔŋ nɛɛ eba lɛ hewɔ. No hewɔ lɛ amɛnyɛ Yeremia nɔ ní ekɛ amɛ aya, ni amɛjo foi kɛtee Mizraim.

Enɛ ha ashi Israel shikpɔŋ lɛ afɔ̃ shi ni mɔ ko mɔ ko bɛ nɔ. Mɔ ko mɔ ko ehiii nɔ afii 70 sɔŋŋ. Eka shi efolo kwraa. Shi Yehowa wo shi akɛ ekɛ ewebii baaku sɛɛ kɛba shikpɔŋ lɛ nɔ ekoŋŋ yɛ afii 70 sɛɛ. Shi yɛ nɛkɛ be nɛɛ mli lɛ, mɛni baa Nyɔŋmɔ webii anɔ yɛ he ni akɛ amɛ etee yɛ Babilon shikpɔŋ lɛ nɔ lɛ? Ha wɔkwɛ.