BENI Yesu fãa gbɛ kɛkpaa maŋ lɛ mli fɛɛ lɛ, etsa mɛi ni he yeɔ lɛ. Nɛkɛ naakpɛɛ nibii nɛɛ ahe amaniɛbɔɔ yashɛ akrowai kɛ maji ni ebɔle jɛmɛ lɛ fɛɛ mli. No hewɔ lɛ gbɔmɛi kɛ obubuafoi kɛ shwilafoi kɛ toimulɔi, kɛ helatsɛmɛi krokomɛi pii ba. Ni Yesu tsa amɛ fɛɛ.

Nɔ ni fe afii etɛ eho kɛjɛ be mli ni Yohane baptisi Yesu lɛ. Ni Yesu kɛɛ ebɔfoi lɛ akɛ etsɛŋ ni ebaaya Yerusalem, ni abaagbe lɛ yɛ jɛmɛ, ni no sɛɛ lɛ ebaate shi kɛjɛ gbohii ateŋ. Shi dani nakai be lɛ aaashɛ lɛ, Yesu tee nɔ etsa helatsɛmɛi lɛ.

Gbi ko lɛ Yesu miitsɔɔ nii yɛ Hejɔɔmɔ Gbi lɛ nɔ. Hejɔɔmɔ Gbi lɛ ji gbi ni Yudafoi lɛ kɛjɔɔ amɛhe. Yoo ni onaa yɛ biɛ lɛ he éye waa. Afii 18 sɔŋŋ nɛ ni edɔ emli kɔmɔɔ, ni enyɛɛɛ ekpa emli trɔmɔɔ. No hewɔ lɛ Yesu kɛ eniji shwie enɔ, ni ebɔi shitee, ni edamɔ shi. Atsa lɛ!

Enɛ ha jamɔ mli hiɛnyiɛlɔi lɛ amli fu waa. Amɛteŋ mɔ kome bolɔ ewo mɛi babaoo ni ebua amɛhe naa lɛ akɛ: ‘Gbii ekpaa yɛ kɛha wɔ ni wɔkɛbaatsu nii. Nɛkɛ gbii nɛɛ anɔ pɛ esa akɛ nyɛba koni atsa nyɛ, jeee Hejɔɔmɔ Gbi lɛ nɔ!’

Shi Yesu ha hetoo akɛ: ‘Gbɔmɛi gbohii ji nyɛ. Ani nyɛteŋ mɔ fɛɛ mɔ fɛneŋ eteji ni eyaha lɛ nu ni enu yɛ Hejɔɔmɔ Gbi lɛ nɔ? No hewɔ lɛ, ani esaaa akɛ atsaa nɛkɛ yoo ni nii yɔɔ mɔbɔ, ni hela eye lɛ afii 18 sɔŋŋ nɛ lɛ yɛ Hejɔɔmɔ Gbi lɛ nɔ?’ Yesu hetoo lɛ ha hii gbohii nɛɛ ahiɛ gboi.

Sɛɛ mli lɛ Yesu kɛ ebɔfoi lɛ tsa amɛgbɛfãa lɛ nɔ kɛmiiya Yerusalem. Beni amɛyɔɔ Yeriko maŋ lɛ klotia lɛ, shwilafoi enyɔ ni baa nii nu akɛ Yesu miiho. No hewɔ lɛ amɛbolɔ akɛ: ‘Yesu, ye obua wɔ!’

Yesu tsɛ shwilafoi lɛ kɛba ni ebi amɛ akɛ: ‘Mɛni nyɛtaoɔ ni mafee maha nyɛ?’ Amɛkɛɛ lɛ akɛ: ‘Nuŋtsɔ, ha ni wɔhiŋmɛii agbele.’ Yesu tara amɛ hiŋmɛii ahe, ni amɛna nii amrɔ nɔŋŋ! Ani ole nɔ hewɔ ni Yesu fee naakpɛɛ nibii nɛɛ fɛɛ lɛ? Ejaakɛ esumɔɔ gbɔmɛi lɛ asane ni eetao ni amɛna hemɔkɛyeli yɛ emli. No hewɔ lɛ wɔyɛ nɔmimaa akɛ beni ebaaye nɔ akɛ Maŋtsɛ lɛ, hela haŋ mɔ ko mɔ ko he aye dɔŋŋ yɛ shikpɔŋ nɔ.