NAA Yesu yɛ Mu Gɔŋ lɛ nɔ. Hii ejwɛ ni kɛ lɛ yɔɔ jɛmɛ lɛ ji ebɔfoi lɛ. Amɛji Andrea kɛ Petro ni ji nyɛmimɛi lɛ, kɛ agbɛnɛ hu Yakobo kɛ Yohane, ni ji nyɛmimɛi lɛ. Nyɔŋmɔ sɔlemɔtsu ni yɔɔ Yerusalem lɛ ji nɔ ni onaa yɛ shɔŋŋ lɛ.

Gbii enyɔ eho kɛjɛ be mli ni Yesu ta teji oblayoo lɛ nɔ kɛtee Yerusalem lɛ. Jufɔ nɛ. Leebi mli lɛ, no mli lɛ Yesu yɛ sɔlemɔwe lɛ. Osɔfoi lɛ bɔ mɔdɛŋ ni amɛmɔ Yesu yɛ jɛmɛ ni amɛgbe lɛ. Shi amɛmiishe gbeyei akɛ amɛbaafee enɛ ejaakɛ gbɔmɛi lɛ sumɔɔ Yesu sane.

Yesu tsɛ nakai jamɔ mli hiɛnyiɛlɔi lɛ akɛ ‘onufui kɛ shikpãi ashwiei!’ Kɛkɛ ni Yesu kɛɛ akɛ, Nyɔŋmɔ baagbala amɛtoi yɛ nibii fɔji ni amɛfee lɛ fɛɛ hewɔ. No sɛɛ lɛ Yesu ba Mu Gɔŋ lɛ nɔ, kɛkɛ ni nɛkɛ bɔfoi ejwɛ nɛɛ bɔi lɛ saji abimɔ. Ani ole nibii ni amɛbiɔ Yesu lɛ?

Bɔfoi lɛ miibi nibii ni kɔɔ wɔsɛɛ be he. Amɛle akɛ Yesu kɛ nibii fɔji ni yaa nɔ yɛ shikpɔŋ lɛ nɔ lɛ fɛɛ baaba naagbee. Shi amɛmiitao amɛle beni enɛ baaba mli. Mɛɛ be Yesu baaba ekoŋŋ ni ebaye nɔ akɛ Maŋtsɛ?

Yesu le akɛ esɛɛnyiɛlɔi ni yɔɔ shikpɔŋ lɛ nɔ lɛ nyɛŋ amɛna lɛ beni ebaaba ekoŋŋ lɛ. Nɔ hewɔ ji akɛ, ebaahi ŋwɛi, ni amɛnyɛŋ amɛna lɛ yɛ jɛmɛ. No hewɔ lɛ, Yesu kɛɛ ebɔfoi lɛ nibii ni baaba yɛ shikpɔŋ nɔ beni ebaaye nɔ akɛ Maŋtsɛ yɛ ŋwɛi lɛ ekomɛi. Mɛni ji nɛkɛ nibii nɛɛ ekomɛi?

Yesu kɛɛ akɛ tai kpelei baaba, helai baamɔmɔ mɛi pii ni hɔmɔ hu baaye amɛ, awuiyeli baafa babaoo, ni shikpɔŋhosomɔi wuji baaba hei. Yesu kɛɛ hu akɛ abaashiɛ Nyɔŋmɔ maŋtsɛyeli lɛ he sanekpakpa lɛ atsɔɔ yɛ shikpɔŋ lɛ nɔ he fɛɛ he. Ani wɔna ni nɛkɛ nibii nɛɛ miiba mli yɛ wɔgbii nɛɛ amli? Hɛɛ! No hewɔ lɛ wɔbaanyɛ wɔná nɔmimaa akɛ Yesu miiye maŋtsɛ yɛ ŋwɛi amrɔ nɛɛ. Etsɛŋ ni ekɛ nibii fɔji fɛɛ baaba naagbee yɛ shikpɔŋ lɛ nɔ.