OO! OO! Mɛni yaa nɔ yɛ biɛ lɛ? Ani gbekɛ nuu ni kã shikpɔŋ lɛ epila waa? Kwɛmɔ! hii ni jɛɔ shia lɛ mli kɛbaa lɛ ateŋ mɔ kome ji Paulo! Ani oona Timoteo hu yɛ jɛmɛ? Ani gbekɛ nuu lɛ jɛ samfɛlɛ lɛ mli ebagbee shi?

Hɛɛ, nakai pɛpɛɛpɛ ji nɔ ni ba. Paulo kɛ kaselɔi ni yɔɔ biɛ yɛ Troia lɛ miiwie. Ele akɛ enaŋ amɛ dɔŋŋ aahu be kakadaŋŋ ejaakɛ esa akɛ ebote lɛlɛ mli kɛya enɔ jetsɛremɔ. No hewɔ lɛ etee nɔ ewie aahu kɛyashi nyɔɔŋteŋ tɔ̃ɔ.

Ojogbaŋŋ, gbekɛ nuu ni atsɛɔ lɛ Eutiko nɛɛ tá samfɛlɛ lɛ naa, kɛkɛ ni wɔ bɔi lɛ yeli. Ejɛ jɛmɛ etsɔ samfɛlɛ lɛ mli ebagbee shi, kɛjɛ nsɔɔdoi etɛ nɔ tɔ̃ɔ! No hewɔ lɛ obaanyɛ ona nɔ hewɔ ni gbɔmɛi lɛ ehao waa nakai lɛ. Beni hii lɛ bawó gbekɛ nuu lɛ nɔ lɛ, nɔ ni amɛsheɔ gbeyei yɛ he lɛ pɛpɛɛpɛ eba. Égbo!

Beni Paulo na akɛ gbekɛ nuu lɛ égbo lɛ, eho ebu enɔ ni eloo lɛ atuu. Kɛkɛ ni ewie akɛ: ‘Nyɛkahaoa. Ehiɛ kã!’ Ni ehiɛ kã lɛɛlɛŋ hu! Naakpɛɛ nii nɛ! Paulo kɛ lɛ eba wala mli ekoŋŋ! Mɛi babaoo ni yɔɔ jɛmɛ lɛ fɛɛ ná miishɛɛ waa.

Kɛkɛ ni amɛ fɛɛ amɛtee ŋwɛitsũ lɛ nɔ ekoŋŋ ni amɛyaye nii. Paulo tsa nɔ ewie aahu kɛyashi jetsɛremɔ. Shi bo diɛŋtsɛ obaana akɛ Eutiko wɔŋ dɔŋŋ! Kɛkɛ ni Paulo, kɛ Timoteo kɛ mɛi ni fata amɛhe kɛfãa gbɛ lɛ bote lɛlɛ lɛ mli. Ani ole he ni amɛyaa?

Paulo gbe eshiɛmɔ gbɛfãa ni ji etɛ lɛ naa etsɛko kwraa, ni enyiɛ gbɛ nɔ kɛmiiya shia. Paulo ehi Efeso maŋtiase lɛ pɛ mli afii etɛ sɔŋŋ yɛ egbɛfãa nɛɛ mli. No hewɔ lɛ gbɛfãa nɛɛ sɛɛ tsɛ kwraa fe nɔ ni ji enyɔ lɛ.

Beni lɛlɛ lɛ shi Troia lɛ, eyawa yɛ Mileeto be fioo. Akɛni Efeso kɛ jɛmɛ jɛkɛmɔ feɔ shitoi fioo ko pɛ hewɔ lɛ, Paulo tsu akɛ ayatsɛ́ onukpai ni yɔɔ asafo lɛ mli lɛ kɛba Mileeto koni ekɛ amɛ awie nɔ ni ji naagbee nɔ kwraa. Sɛɛ mli, beni be shɛ ni lɛlɛ lɛ baaya lɛ, amɛye awerɛho waa beni amɛna akɛ Paulo miiya lɛ!

Yɛ naagbee lɛ, lɛlɛ lɛ bashɛ Kaisarea. Beni Paulo yɔɔ biɛ yɛ kaselɔ Filipo shia lɛ, gbalɔ Agabo babɔ Paulo kɔkɔ. Ewie akɛ kɛ Paulo ba Yerusalem lɛ, abaawo lɛ tsuŋ. Ni lɛɛlɛŋ hu, nakai ji nɔ ni ba. Kɛkɛ ni beni ehi tsuŋwoo mli afii enyɔ yɛ Kaisarea sɛɛ lɛ, akɛ Paulo tee Roma koni ayakojo lɛ yɛ Roma nɔyelɔ Kaisare hiɛ. Nyɛhaa wɔkwɛa nɔ ni tee nɔ beni amɛfãa gbɛ kɛyaa Roma lɛ.