KWƐMƆ! lɛlɛ lɛ kɛ oshara ekpe! Eejwara kwraa! Ani oona mɛi ni etumɔ kɛbote nu lɛ mli lɛ? Amɛteŋ mɛi komɛi enyɛ amɛbashɛ nu lɛ naa momo. Ani Paulo wɔnaa yɛ jɛmɛ lɛ? Ha wɔkwɛ nɔ ni eba enɔ nɛɛ.

Kaimɔ akɛ, awo Paulo tsuŋ afii enyɔ sɔŋŋ yɛ Kaisarea. Kɛkɛ ni akɛ lɛ kɛ gboklɛfoi krokomɛi ni fata ehe lɛ wo lɛlɛ mli, ni amɛyi gbɛ kɛmiiya Roma. Beni amɛho Kreta ŋshɔkpɔ lɛ he fioo lɛ, amɛkɛ ahum ko ni naa wa waa kpe. Kɔɔyɔɔ lɛ tswa waa aahu akɛ hii lɛ nyɛɛɛ amɛkudɔ lɛlɛ lɛ dɔŋŋ. Ni amɛnaaa hulu lɛ yɛ jetsɛremɔ mli, aloo ŋulamii lɛ hu yɛ jenamɔ mli. Yɛ naagbee, yɛ gbii babaoo sɛɛ lɛ, mɛi ni yɔɔ lɛlɛ lɛ mli lɛ fɛɛ anijiaŋ je wui kwraa akɛ abaanyɛ ahere amɛ yiwala.

Kɛkɛ ni Paulo te shi edamɔ shi ni ewie akɛ: ‘Nyɛteŋ mɔ kome folo po elaajeŋ ewala; lɛlɛ lɛ pɛ baalaaje. Ejaakɛ nyɔɔŋ nɛɛ mli lɛ, Nyɔŋmɔ bɔfo ko ba miŋɔɔ ni ebakɛɛ mi akɛ, “Kaashe gbeyei, Paulo! Esa akɛ oyadamɔ Roma nɔyelɔ Kaisare hiɛ kɛ̃. Ni Nyɔŋmɔ baahere mɛi fɛɛ ni kɛ bo fãa gbɛ lɛ ayiwala.”’

Aaafee nyɔɔŋteŋ yɛ gbi ni ji 14, kɛjɛ beni ahum lɛ bɔi tswaa lɛ nɔ lɛ, amlakui lɛ na akɛ nu lɛ mli ekwɔɔɔ dɔŋŋ! Akɛni amɛmiishe gbeyei akɛ ekolɛ lɛlɛ lɛ baayashi tɛ yɛ duŋ lɛ mli hewɔ lɛ, amɛŋmɛɛ amɛsɛkɛi lɛ ahe amɛwo nu lɛ mli. Enɔ jetsɛremɔ lɛ, amɛna shikpɔŋ. Amɛkpɛ amɛyiŋ akɛ amɛbaabɔ mɔdɛŋ ni amɛkudɔ lɛlɛ lɛ kɛya ŋshɔnaa shia lɛ nɔ tɔ̃ɔ yɛ jɛmɛ.

Ojogbaŋŋ, beni amɛbɛŋkɛ ŋshɔ lɛ naa saŋŋ lɛ, lɛlɛ lɛ yabote shia mli ni eka yɛ jɛmɛ. Kɛkɛ ni ŋshɔkei lɛ bɔi lɛ shiimɔ waa, kɛkɛ ni lɛlɛ lɛ bɔi jwaramɔ. Asraafonyo nukpa ni kwɛɔ amɛnɔ lɛ wie akɛ: ‘Nyɛ mɛi fɛɛ ni nyɛbaanyɛ nyɛsere lɛ, nyɛtua kɛbotea ŋshɔ lɛ mli klɛŋklɛŋ ni nyɛserea kɛyaa shikpɔŋ. Nyɛteŋ mɛi ni eshwɛ lɛ, nyɛbotea mli kɛnyiɛa amɛsɛɛ, ni nyɛmɔmɔa lɛlɛ lɛ fãi ni ekumɔ lɛ amli ni nyɛhiɛa mli waa.’ Ni nakai ji bɔ ni amɛfee. Nɛkɛ gbɛ nɔ amɛtsɔ ni gbɔmɛi 276 ni yɔɔ lɛlɛ lɛ mli lɛ yashɛ ŋshɔ lɛ naa shweshweeshwe, tamɔ bɔ ni ŋwɛibɔfo lɛ wo amɛ shi lɛ.

Atsɛɔ ŋshɔkpɔ lɛ akɛ Melita. Gbɔmɛi lɛ amli jɔ waa, ni amɛkwɛ gbɔmɛi ni jɛ lɛlɛ lɛ mli kɛba lɛ anɔ. Beni kɔɔyɔŋ tsakemɔ lɛ hi saŋŋ lɛ, akɛ Paulo wo lɛlɛ kroko mli ni akɛ lɛ tee Roma.