1. Mɛni esa akɛ wɔfee koni wɔsa Nyɔŋmɔ hiɛ?

KƐ́ WƆMIITAO ni wɔná wɔkɛ Nyɔŋmɔ teŋ wekukpaa ni miishɛɛ kɛ suɔmɔ yɔɔ mli lɛ mli ŋɔɔmɔ lɛ, no lɛ esaaa akɛ wɔkɛ apasa jamɔ náa nɔ ko feemɔ kwraa. Esa akɛ wɔkɛ wɔhe awo anɔkwa jamɔ mli. Ŋmɛnɛ, gbɔmɛi akpekpei abɔ ni yɔɔ shikpɔŋ lɛ nɔ fɛɛ miifee nakai.

2. Nɛgbɛ anyɛɔ anaa Yehowa Odasefoi yɛ, ni mɛ-ni ji amɛnitsumɔ?

² Taakɛ Biblia lɛ gba efɔ̃ shi lɛ, anɔkwa jálɔi lɛ feɔ gbɔmɛi “asafo babaoo” ní jɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” (Kpojiemɔ 7:9) Yehowa Odasefoi akpekpei abɔ kɛ ekãa miiye amɛmiibua mɛi krokomɛi, yɛ shikpɔji 235 nɔ, koni amɛbale Yehowa gbɛ̀i kɛ etaomɔ nii ni suɔmɔ yɔɔ mli lɛ.

3. Namɔ Odasefoi lɛ kɛ amɛjamɔ haa, ni mɛɛ jamɔi nɛkɛ amɛtsiɔ amɛhe kɛjɛɔ he?

³ Odasefoi lɛ kpɛlɛɔ nɔ akɛ Yehowa pɛ ji mɔ ni esa akɛ ajá. Amɛkulaaa shi amɛhaaa amagai loo jamɔ mli mfonirii. (1 Yohane 5:21) Amɛkɛ woo haaa mɛi ni egboi lɛ kɛtsɔ kpeshii kɛ kusum nifeemɔi krokomɛi ní woɔ apasa jamɔ mli hemɔkɛyelii kɛ “daimonioi atsɔɔmɔi” ahe hewalɛ ní amɛkɛ amɛhe aaawo mli lɛ nɔ. (1 Timoteo 4:1) Shi kɛlɛ, amɛshɛjeɔ mɛi ni nɔ̃ enyɔ amɛhiŋmɛiiaŋ lɛ amii kɛtsɔ shiwoo ni Nyɔŋmɔ kɛha akɛ ebaatee mɛi ni egboi lɛ ashi kɛba paradeiso shikpɔŋ nɔ ní amɛgbálaa mli amɛtsɔɔ amɛ lɛ nɔ.​—Yohane 5:28, 29; Bɔfoi lɛ Asaji 24:15.

4. Mɛni ji Nyɔŋmɔ webii ashidaamɔ yɛ ŋkunyaayeli he?

⁴ Odasefoi lɛ kɛ amɛhe wooo ashwaifeemɔ, ŋkunyaayeli, loo ayɛkpɛmɔ mli kwraa, ejaakɛ amɛle akɛ nɛkɛ nibii nɛɛ jɛɔ Abonsam ŋɔɔ. Amɛkɛ amɛhiɛ efɔ̃ɔɔ ŋkunyaayeli nɔ akɛ ebaabu amɛhe​—amɛkɛ amɛhiɛ fɔ̃ɔ Yehowa nɔ.​—Abɛi 18:10.

5. Yehowa Odasefoi ‘jɛɛɛ je lɛ mli’ yɛ mɛɛ gbɛ nɔ?

⁵ Yesu wie akɛ ekaselɔi lɛ baafee mɛi ni ‘jɛɛɛ je lɛ mli.’ (Yohane 17:16) Yesu diɛŋtsɛ kpoo akɛ ekɛ ehe baawo egbii lɛ amli maŋkwramɔ saji amli. (Yohane 6:15) Nakai nɔŋŋ Odasefoi hu kɛ amɛhe wooo maŋkwramɔ saji, maŋhedɔɔ, kɛ jeŋ nɛŋ kui ateŋ basabasafeemɔi amli. Shi kɛlɛ, amɛwoɔ amɛtooi ni amɛyeɔ maŋ ní amɛyɔɔ nɔ lɛ nɔ mlai anɔ.​—Yohane 15:19; Romabii 13:1, 7.

6. Mɛɛ gbɛtsɔɔmɔi Nyɔŋmɔ tsuji nyiɛɔ sɛɛ yɛ gbalashihilɛ kɛ gbalamlitsemɔ gbɛfaŋ?

⁶ Akɛni Odasefoi boɔ nɔyeli lɛ gbɛtsɔɔmɔi atoi hewɔ lɛ, amɛkwɛɔ ni amɛkɛ amɛgbalashihilɛ woɔ mla shishi. (Tito 3:1) Amɛfeɔ toiboo amɛhaa Nyɔŋmɔ gbɛtsɔɔmɔ, ni no hewɔ lɛ amɛkɛ amɛhe wooo yei pii kɛ shihilɛ mli. (1 Timoteo 3:2) Kɛfata he lɛ, akɛni amɛkɛ Biblia shishitoo mlai tsuɔ nii yɛ amɛshihilɛ mli hewɔ lɛ, efɔɔɔ kaa akɛ Nyɔŋmɔ tsuji agbalashihilɛ mli baatse.

7. Odasefoi jieɔ suɔmɔ kpo amɛtsɔɔ amɛhe yɛ mɛɛ gbɛ nɔ?

⁷ Odasefoi jieɔ suɔmɔ kpo amɛtsɔɔ amɛhe. Nɛkɛ suɔmɔ nɛɛ, kɛ suɔmɔ hu ní amɛyɔɔ kɛha Nyɔŋmɔ lɛ feɔ amɛ ekome yɛ anɔkwa nyɛmifeemɔ mli, eyɛ mli akɛ amɛjɛ wekui kɛ jeŋmaji babaoo mli. Kɛ́ amanehulu ko ba aloo hiamɔ ko te shi lɛ, Odasefoi ahe feɔ oyá ni amɛyayeɔ amɛbuaa amɛnyɛmimɛi lɛ. Odasefoi jieɔ suɔmɔ kpo yɛ bɔ ni amɛhiɔ shi amɛhaa lɛ mli.​—Yohane 13:35.

8. Mɛɛ nifeemɔi fɔji Nyɔŋmɔ webii tsiɔ amɛhe kɛjɛɔ he?

⁸ Yehowa webii bɔɔ mɔdɛŋ waa ni amɛhiɔ shi akɛ mɛi ni yeɔ anɔkwa, kɛ jalɔi. Amɛtsiɔ amɛhe kɛjɛɔ juu, malemɔ, jeŋba shara, dãatɔɔ, kɛ nitsumɔ mli nifeemɔ ní etsɔɔɔ anɔkwayeli lɛ ahe. Wumɛi eyiii amɛŋamɛi. Dani amɛaatsɔmɔ Odasefoi lɛ, kulɛ amɛteŋ mɛi komɛi feɔ nɛkɛ nibii nɛɛ, shi kɛtsɔ Yehowa yelikɛbuamɔ nɔ lɛ, amɛkpa. ‘Aju amɛhe’ yɛ Nyɔŋmɔ hiɛ.​—1 Korintobii 6:9-11.

9. Mɛni wolo ko wie yɛ Afrika mumɔŋ sɔlemɔi lɛ ahe?

⁹ Yɛ anɔkwale mli lɛ, jamɔi pii kɛɔ akɛ amɛhiɛ anɔkwale lɛ. Ekolɛ, amɛwieɔ nitsumɔi wuji ni amɛtsu lɛ ahe ni amɛkɛfiɔ amɛwiemɔ lɛ sɛɛ. Ákɛ nɔkwɛmɔnɔ lɛ, yɛ nɔ ni atsɛɔ amɛ mumɔŋ sɔlemɔi yɛ Afrika lɛ agbɛfaŋ nɛkɛ lɛ, wolo ko kɛɔ akɛ: “Nɔ ni akɛbaye ŋkunyaayelɔi loo tsofatsɛmɛi anitsumɔ najiaŋ ji [Kristofoi akui heei ní eba lɛ]. . . . Amɛkɛɔ akɛ amɛgbaa ni amɛfeɔ naakpɛɛ nii. Gbalɔi ni yɔɔ amɛteŋ lɛ kɛɔ akɛ amɛnaa ninaai ni amɛtsɔɔ lamɔi ashishi. Amɛkɛ nu krɔŋkrɔŋ, mu krɔŋkrɔŋ, lamulu, kɛnɛrɛi kɛ ohɛ tsuɔ nii ni amɛkɛtsáa mɛi ni amɛkɛtsĩɔ helai anaa.”

10, 11. Mɛni hewɔ nibii ni atsɛɔ amɛ naakpɛɛ nibii ŋmɛnɛ lɛ etsɔɔɔ akɛ jamɔ ko jɛ Nyɔŋmɔ ŋɔɔ lɛ?

¹⁰ Nɛkɛ jamɔi nɛɛ amli bii kɛɔ akɛ naakpɛɛ nii ji nɔ ni maa nɔ mi akɛ Nyɔŋmɔ jɔɔmɔ yɛ amɛjamɔ lɛ nɔ. Shi nɔ ni amɛtsɛɔ lɛ naakpɛɛ nii lɛ emaaa nɔ mi akɛ jamɔ ko náa Yehowa nɔkpɛlɛmɔ. Satan kɛ hewalɛ haa apasa jálɔi komɛi ni amɛkɛtsuɔ ‘hewalɛ nitsumɔi.’ (2 Tesalonikabii 2:9) Kɛfata he lɛ, Biblia lɛ egba efɔ̃ shi akɛ naakpɛɛ nikeenii ní jɛ Nyɔŋmɔ ŋɔɔ, tamɔ gbalɛ, lilɛii srɔtoi awiemɔ, kɛ nilee krɛdɛɛ ní aaaná lɛ fɛɛ ‘sɛɛ baafo.’​—1 Korintobii 13:8.

¹¹ Yesu bɔ kɔkɔ akɛ: “Jeee mɔ fɛɛ mɔ ni kɛɔ mi akɛ: Nuntsɔ, Nuntsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”​—Mateo 7:21-23.

12. Namɛi baabote ŋwɛi Maŋtsɛyeli lɛ mli?

¹² Belɛ, namɛi baabote ŋwɛi Maŋtsɛyeli lɛ mli mɔ? Amɛji mɛi ni feɔ Yehowa suɔmɔnaa nii lɛ.

13. Mɛɛ nitsumɔ Nyɔŋmɔ efã ewebii akɛ amɛtsu ŋmɛnɛ, ni namɛi ji mɛi ni tsuɔ?

¹³ Mɛni ji Nyɔŋmɔ suɔmɔnaa nii kɛha ewebii ŋmɛnɛ? Yesu kɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase.” (Mateo 24:14) Enɛ ji nitsumɔ ni Yehowa Odasefoi kɛ ekãa diɛŋtsɛ tsuɔ lɛ.

14. Mɛni ji Nyɔŋmɔ Maŋtsɛyeli lɛ, ni namɛi baaye nɔ yɛ Maŋtsɛyeli lɛ mli?

¹⁴ Yehowa Odasefoi jajeɔ Nyɔŋmɔ Maŋtsɛyeli lɛ amɛtsɔɔ yɛ “je nɛŋ fɛɛ” akɛ eji ŋwɛi nɔyeli ni baaye shikpɔŋ muu lɛ fɛɛ nɔ yɛ jalɛ naa. Amɛtsɔɔ akɛ Yehowa ehala Kristo Yesu akɛ nakai Maŋtsɛyeli lɛ nɔ Maŋtsɛ, ni eyɛ ehefatalɔi nɔyelɔi 144,000 ní ahala amɛ kɛjɛ adesai ateŋ.​—Daniel 7:14, 18; Kpojiemɔ 14:1, 4.

15. Mɛɛ nibii Maŋtsɛyeli lɛ baakpata fɛɛ hiɛ?

¹⁵ Odasefoi kɛ Biblia lɛ tsuɔ nii ni amɛkɛtsɔɔ mɛi akɛ Nyɔŋmɔ Maŋtsɛyeli lɛ baakpata Satan gbɛjianɔtoo muu lɛ fɛɛ hiɛ. Abaajie apasa jamɔ kɛ etsɔɔmɔi ní gbeɔ Nyɔŋmɔ he guɔ, ní ewoɔ Abonsam hiɛ nyam lɛ fɛɛ kɛya kwraa! (Kpojiemɔ 18:8) Abaajie adesai anɔyelii, ní teɔ shi woɔ Nyɔŋmɔ lɛ hu fɛɛ kɛya kwraa!​—Daniel 2:44.

16. Namɛi baafee Yesu Kristo shishibii, ni nɛgbɛ amɛbaahi?

¹⁶ Kɛfata he lɛ, Yehowa Odasefoi haa aleɔ akɛ Kristo Yesu kɛ sɛɛnamɔi ni yɔɔ nyam diɛŋtsɛ baaba abaha mɛi fɛɛ ni feɔ nɔ ni Nyɔŋmɔ taoɔ lɛ. Amɛbaafee eshishibii yɛ shikpɔŋ lɛ nɔ. Biblia lɛ woɔ shi akɛ: “Eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeena ohiafo kɛ mɔ ni efĩ lɛ lɛ mɔbɔ, ni ehere mɛi ni efĩ amɛ lɛ asusumai ayiwala.”​—Lala 72:12, 13.

17. Namɛi ji mɛi pɛ ni jajeɔ Nyɔŋmɔ Maŋtsɛyeli lɛ amɛtsɔɔ?

¹⁷ Gbɔmɛi akuu kroko ko bɛ ní feɔ Nyɔŋmɔ suɔmɔnaa nii kɛtsɔ Maŋtsɛyeli sanekpakpa lɛ shiɛmɔ nɔ. Yehowa Odasefoi pɛ ji mɛi ni haa aleɔ Nyɔŋmɔ Maŋtsɛyeli lɛ he sane yɛ shikpɔŋ muu lɛ fɛɛ nɔ.