Shi mɛni hewɔ ni Satan kɛ edaimonioi lɛ tsuɔ nii waa ni amɛkɛlakaa gbɔmɛi lɛ? Ejaakɛ amɛmiitao ni wɔbafata amɛhe yɛ amɛ atuatsemɔ lɛ mli. Amɛmiitao ni wɔja amɛ. Amɛmiitao ni wɔhe amɛ amale wiemɔi lɛ wɔye ni wɔfee nibii ni Yehowa sumɔɔɔ. Nɛkɛ nifeemɔi nɛɛ babaoo kɔɔ kusumii ni afeɔ yɛ mɛi ni egboi lɛ ahewɔ lɛ he.

Suɔlɔ ko gbele ji henumɔ mli niiashikpamɔ ko ni dɔlɛ yɔɔ mli waa, ni eji adebɔɔ su ni eja gbɛ hu akɛ aaaye awerɛho. Beni Yesu naanyo Lazaro gbo lɛ, Yesu “fo.”—Yohane 11:35.

Kusumii pii yɛ ni kɔɔ gbele he, ni sɔrɔto-feemɔi babaoo yɛ mli yɛ je lɛŋ fɛɛ. Pii yɛ ni Biblia mli shishitoo mlai eteee shi ewooo. Shi kɛlɛ, nifeemɔi lɛ ekomɛi damɔ shishinumɔ ni ahiɛ akɛ gbohii lɛ ahiɛ kamɔ ni amɛnyɛɔ amɛnaa hiɛkalɔi lɛ nɔ. Kpeshii, awerɛho ni ayeɔ kɛtekeɔ nɔ, kɛ yarafeemɔi ni afeɔ lɛ haŋtsii aahu ni etekeɔ nɔ lɛ fɛɛ shishifa jɛ gbeyei ni asheɔ akɛ aaafee nɔ ko ni esaaa mɛi ni egboi lɛ amumɔi lɛ ahiɛ lɛ hewɔ. Shi akɛni gbohii lɛ, “amɛleee nɔ ko nɔ ko” hewɔ lɛ, mɛi ni kɛ amɛhe woɔ nifeemɔi nɛɛ amli  lɛ miiha Satan amale lɛ miigbɛ kɛmiishwa.—Jajelɔ 9:5.

Kusumii loo nifeemɔi krokomɛi hu yɛ ni jɛ hemɔkɛyeli ni ayɔɔ akɛ yelikɛbuamɔ ni jɛ hiɛkalɔi lɛ aŋɔɔ he miihia gbohii lɛ, ni akɛ kɛji akpataaa amɛ lɛ, no lɛ amɛbaaye hiɛkalɔi lɛ awui lɛ mli. Yɛ maji komɛi anɔ lɛ, atsɛɔ niyeli kɛ afɔleshaa aaafee mɔ lɛ gbele sɛɛ gbii 40 aloo afi po sɔŋŋ. Ni akɛɔ akɛ aafee enɛ koni eye ebua mɔ ni egbo lɛ koni ‘efo mli kɛya’ mumɔi ashihilɛ he lɛ. Kusum kroko hu ni afɔɔ feemɔ ji niyenii kɛ daai ni akɛhaa mɛi ni egboi lɛ.

Nɛkɛ nibii nɛɛ ejaaa, ejaakɛ amɛhaa Satan amale wiemɔi ni kɔɔ gbohii lɛ ahe lɛ gbɛɔ eshwaa. Ani Yehowa baakpɛlɛ wɔhe ni wɔkɛwoɔ kusumii ni damɔ daimonioi atsɔɔmɔi anɔ lɛ mli lɛ nɔ? Dabi kɔkɔɔkɔ!—2 Korintobii 6:14-18.

Anɔkwa Nyɔŋmɔ lɛ tsuji kɛ amɛhe wooo nifeemɔi ni fiɔ Satan amale lɛ sɛɛ lɛ mli. Shi moŋ, amɛkɛ suɔmɔ bɔɔ mɔdɛŋ fɛɛ ni amɛaanyɛ ni amɛkɛshɛje mɛi ni yɔɔ wala mli lɛ amii. Amɛle akɛ kɛ mɔ ko  gbo lɛ, Yehowa pɛ ji mɔ ni baanyɛ aye abua lɛ.—Hiob 14:14, 15.

Mɛi komɛi kɛ daimonioi lɛ naa sharamɔ tɛɛ aloo kɛtsɔɔ gbɔmɛi adesai anɔ. Atsɛɔ enɛ akɛ mumɔi atsɛmɔ nifeemɔ. Vudu, ayɛ kpɛmɔ, ashwai-feemɔ, klamɔ, kɛ gbohii anii ni abiɔ lɛ fɛɛ ji mumɔi atsɛmɔ nifeemɔi sɔrɔtoi.

Biblia lɛ buɔ nibii nɛɛ fɔ ni ekɛɔ akɛ: “Ni akana nyɛteŋ mɔ ko ni . . . klaa, aloo ashwaifeelɔ aloo okɔmfo loo ŋkunyaayelɔ, aloo kablɛfilɔ, aloo mɔ ni tsɛɔ sisa, aloo ayɛ, aloo mɔ ni biɔ gbohii anii. Ejaakɛ Yehowa miihi mɔ fɛɛ mɔ ni feɔ nɛkɛ nii nɛɛ.”—5 Mose 18:10-12.

Mɛni hewɔ ni Yehowa bɔɔ wɔ kɔkɔ waa yɛ nɛkɛ nifeemɔi nɛɛ ahe lɛ?

Yehowa bɔɔ wɔ kɔkɔ yɛ mumɔi atsɛmɔ nifeemɔi fɛɛ he, yɛ wɔ diɛŋtsɛ wɔsɛɛnamɔ hewɔ.  Esumɔɔ gbɔmɛi adesai ni ebuɔ amɛhe hu, ni ele akɛ bɔ fɛɛ bɔ ni fee lɛ mɛi ni kɛ amɛhe woɔ daimonioi anifeemɔi amli lɛ baana amanehulu.

Amɛteŋ mɔ ko ni tamɔ nakai ji Nilda, ni ji okɔmfo ko ni hi Brazil lɛ. Daimonioi lɛ ha yoo nɛɛ shihilɛ bafee awerɛho. Egba akɛ: “Mumɔi lɛ . . . bayiɔ minɔ, ni amɛfamɔɔ mi kɛyaa kɛbaa. Nɔ nyɔɔ minɔ kɛkɛ lɛ mihiɛ etserɛ mi ekoŋŋ shii abɔ, ni enɛ haa atsĩɔ minaa yɛ jwɛŋmɔ mli naagbai ahewɔ. Daimonioi lɛ wa mi yi aahu akɛ ebasa mihenumɔi ahe tete po. Mibɔi tsofai ni jɔɔ henumɔi ahe lɛ kɔlɔmɔ ni mibɔi daanumɔ kɛ zigaret shɛremɔ hu daa gbi. Enɛ tee nɔ afii babaoo.”

Yɛ be ni sa mli lɛ, Nilda tsi ehe kwraa kɛjɛ daimonioi lɛ ahewalɛ shishi, kɛtsɔ Yehowa kɛ e-Dasefoi ni yɔɔ shikpɔŋ nɔ lɛ ayelikɛbuamɔ nɔ, ni amrɔ nɛɛ eyɛ shihilɛ kpakpa ni hi jogbaŋŋ mli. Yoo nɛɛ kɛɛ: “Miiwo mɛi fɛɛ hewalɛ ni amɛkɛ mumɔi [fɔji] lɛ akana sharamɔ ko kwraa, jeee shikome tete po.”