Wɔ fɛɛ wɔyɛ nɔ ko ni wɔbaahala. No ji kɛji wɔɔsɔmɔ Yehowa aloo wɔɔsɔmɔ Satan kɛ edaimonioi lɛ. Wɔnyɛŋ enyɔ lɛ fɛɛ wɔfee. Kwɛ bɔ ni nilee yɔɔ mli akɛ wɔɔsɔmɔ Yehowa!

Taakɛ bɔ ni wɔna lɛ, daimonioi lɛ naa gbɔmɛi awuiyeli kɛ amɛ lakamɔ he miishɛɛ. Yehowa bɛ nakai. Esumɔɔ adesai tamɔ bɔ ni tsɛ sumɔɔ ebii lɛ. Lɛ ji “duromɔ nii kpakpai kɛ nikeenii ni hi kɛwula shi fɛɛ lɛ” a-Halɔ. (Yakobo 1:17) Etsiii nɔ kpakpa ko naa ni adesai akana, kɛji nakai nii lɛ jara wa waa kɛha lɛ po.—Efesobii 2:4-7.

Susumɔ nibii ni Nyɔŋmɔ Bi, Yesu fee yɛ shikpɔŋ nɔ lɛ ahe okwɛ. Eha mumuii wie ni eha shwilafoi na nii. Etsa kpitiyelɔi kɛ mɛi ni eje kpa lɛ fɛɛ. Efamɔ daimonioi ni etsa helai sɔrɔtoi fɛɛ. Yesu tee gbohii ashi po kɛba wala mli ekoŋŋ, kɛtsɔ Nyɔŋmɔ hewalɛ nɔ.—Mateo 9:32-35; 15:30, 31; Luka 7:11-15.

Ní eeemale ni ekɛlaka wɔ lɛ, Nyɔŋmɔ wieɔ anɔkwale be fɛɛ be. Elakaaa mɔ ko mɔ ko kɔkɔɔkɔ.—4 Mose 23:19.

Bɔ ni anaanu kpaa mɔɔ adɔdɔŋ lɛ, nakai hemɔkɛyeli gbonyo kɛ amalei emɔmɔ mɛi akpekpei abɔ. Amɛsheɔ gbohii lɛ agbeyei. Amɛsheɔ daimonioi lɛ agbeyei. Amɛyeɔ amɛtsui yɛ loomɔi, okadii, ŋkunyaayelii, kɛ wɔji anifeemɔi ahe. Hemɔkɛyelii kɛ kusum nifeemɔi ni damɔ Satan Abonsam amalei lɛ anɔ lɛ efimɔ amɛ kwraa. Nɛkɛ nibii nɛɛ eko kwraa lakaaa Nyɔŋmɔ tsuji lɛ ateŋ mɔ ko.

Yehowa he wa kwraa fe Satan. Kɛji osɔmɔ Yehowa lɛ, ebaabu ohe kɛjɛ daimonioi lɛ ahe. (Yakobo 4:7) Ŋkunyaayeli naŋ onɔ hewalɛ. Akɛ nɔkwɛmɔ nɔ lɛ, okɔmfɔi etɛ komɛi ni he wa waa, ni amɛyɔɔ Nigeria lɛ kɛ ŋkunyaayeli bɔ mɔdɛŋ akɛ amɛaagbe Yehowa Odasefonyo ko ni kpoo akɛ eshiii maŋ lɛ mli lɛ. Beni ŋkunyaayeli lɛ tsuuu nii sɛɛ lɛ, okɔmfoi lɛ ateŋ mɔ kome she gbeyei waa, ni etee Odasefonyo lɛ ŋɔɔ, ni eyakpa lɛ fai ni ena lɛ mɔbɔ.

Kɛji daimonioi miigba onaa lɛ, obaanyɛ obo otsɛ Yehowa gbɛi lɛ ni ebaabu ohe. (Abɛi 18:10) Shi bɔni afee ni ona Nyɔŋmɔ hebuu lɛ, esa akɛ otsi ohe kwraa kɛjɛ nɔ fɛɛ nɔ ni kɔɔ mumɔi atsɛmɔ nifeemɔi kɛ daimonioi ajamɔ he lɛ he. Nyɔŋmɔ jalɔi ni hi blema Efeso lɛ fee nakai. Amɛloo amɛ ashwaifeemɔ he woji lɛ fɛɛ ni amɛshã. (Bɔfoi lɛ Asaji 19:19, 20) Esa akɛ Nyɔŋmɔ tsuji ni yɔɔ ŋmɛnɛ lɛ hu afee nakai. Esa akɛ oshɛrɛ ŋkunyaayeli nibii, sɛbɛi,  kpaai ni afimɔɔ akɛ “hebuu nii,” wɔji anifeemɔi, ashwaifeemɔ he woji, kɛ nibii krokomɛi fɛɛ ni kɛ mumɔi atsɛmɔ nifeemɔ yɔɔ tsakpaa lɛ oshwie.

Kɛji ootao osa Nyɔŋmɔ hiɛ lɛ, no lɛ efaaa akɛ oooshi apasa jamɔ ni okpa nibii fɔji afeemɔ kɛkɛ. Esa akɛ okɛ ohe awo jamɔ krɔŋŋ mli kɛ ekaa diɛŋtsɛ. Biblia lɛ tsɔɔ nɔ ni sa akɛ ofee:

Satan kɛ daimonioi lɛ yɛ gbɔmɛi yɛ shikpɔŋ lɛ nɔ ni amɛtsɔɔ nibii ni ejaaa ni amɛfeɔ hu. Shi Yehowa hu yɛ ewebii. Amɛji Yehowa Odasefoi. (Yesaia 43:10) Amɛyifalɛ fe akpekpei ekpaa, yɛ je lɛŋ fɛɛ. Amɛ fɛɛ amɛbɔɔ mɔdɛŋ waa ni amɛfee nibii kpakpai ni amɛtsɔɔ gbɔmɛi anɔkwale lɛ hu. Obaanyɛ ona amɛ yɛ maji pii anɔ, yɛ Maŋtsɛyeli Asa lɛ nɔ, he ni amɛkɛ miishɛɛ baakpee bo atuu yɛ lɛ.

Amɛnitsumɔ ji ni amɛye amɛbua mɛi krokomɛi ni amɛsɔmɔ Nyɔŋmɔ. Amɛkɛ bo baakase Biblia lɛ yɛ bo diɛŋtsɛ oshia, ni amɛbaaye amɛbua bo ni okase bɔ ni ooofee oja Yehowa yɛ gbɛ ni ja nɔ. Ehe ehiaŋ ni owo enɛ he nyɔmɔ. Odasefoi lɛ yɛ he miishɛɛ akɛ amɛaatsɔɔ anɔkwale lɛ ejaakɛ amɛsumɔɔ gbɔmɛi ni amɛsumɔɔ Yehowa Nyɔŋmɔ hu.