1-3. Mɛni Babilonbii lɛ feɔ kɛyeɔ Yehowa jálɔi lɛ ahe fɛo, ni mɛni hewɔ?

ŊƆƆ lɛ akɛ oji Yudafonyo ni yeɔ Nyɔŋmɔ anɔkwa ni oyɛ Babilon maŋ lɛ mli. Okɛ omaŋbii lɛ ehi nomŋɔɔ mli afii 50 loo nɔ. Taakɛ nyɛfɔɔ feemɔ yɛ Hejɔɔmɔ Gbi lɛ nɔ lɛ, ooya oyafata onyɛmimɛi anɔkwafoi krokomɛi lɛ ahe kɛjá Yehowa. Otsɔ gbɛjegbɛi ni mɛi ni miiya amɛmiiba lɛ ehã amɛnɔ efee hoo lɛ anɔ, ni ona jamɔhei kɛ gbatsũi babaoo yɛ gbɛjegbɛi lɛ ahe. Mɛi pii babuaa amɛhe naa yɛ hei nɛɛ, ni amɛshãa afɔlei ni amɛláa amɛhãa nyɔŋmɔi tamɔ Marduk.

² Be ni oho mɛi babaoo nɛɛ ahe lɛ, oyanina onyɛmimɛi fioo ko ni okɛ amɛ jáa Nyɔŋmɔ lɛ. * Nyɛtao he ko ni yɔɔ dioo, ekolɛ yɛ maŋ lɛ nujɔi lɛ ahe, koni nyɛfee ekome kɛsɔle, nyɛlá lalai, ní nyɛjwɛŋ Nyɔŋmɔ Wiemɔ lɛ nɔ. Be ni nyɛsɔleɔ lɛ, nyɛnu lɛji ni aŋmɔlɔ amɛ yɛ faa lɛ toi ni kɔɔyɔɔ miitswa amɛ lɛ agbɛɛmɔi blɛoo. Otsui nyɔ omli akɛ toiŋjɔlɛ fioo yɛ biɛ. Oná kulɛ maŋbii lɛ ateŋ mɔ ko enaŋ nyɛ koni ekabafite nyɛkpee lɛ taakɛ amɛfɔɔ feemɔ lɛ. Mɛni hewɔ amɛfeɔ nakai?

 ³ Ale Babilon akɛ eye kunim yɛ tai babaoo amli, ni maŋbii lɛ susuɔ akɛ amale nyɔŋmɔi ni amɛjáa lɛ ni hãa amɛyeɔ kunim lɛ. Yerusalem hiɛ ni Babilonbii lɛ kpãtã kwraa lɛ hã amɛná nɔmimaa akɛ amɛnyɔŋmɔ Marduk lɛ he wa fe Yehowa! No hewɔ lɛ, amɛyeɔ o-Nyɔŋmɔ lɛ kɛ ewebii lɛ ahe fɛo. Bei komɛi lɛ, amɛyeɔ nyɛhe fɛo amɛkɛɔ akɛ: “Nyɛláa Zion lalai lɛ eko nyɛhãa wɔ”! (Lala 137:3) Lalai babaoo yɛ ni aláa kɛjieɔ Yehowa yi yɛ kunim srɔtoi ni ehã Zion loo Yerusalem ye yɛ Yehowa henyɛlɔi lɛ anɔ lɛ hewɔ. Ekolɛ Babilonbii lɛ yeɔ Yudafoi lɛ ahe fɛo yɛ lalai nɛɛ ahe titri. Shi lalai lɛ ekomɛi hu wie Babilonbii lɛ diɛŋtsɛ ahe. Akɛ nɔkwɛmɔnɔ lɛ, lala lɛ eko kɛɔ akɛ: “Amɛhã Yerusalem etsɔ koikoi . . . Mɛi ni bɔle wɔ lɛ yeɔ wɔhe fɛo ni amɛŋmɔɔ wɔ.”​—Lala 79:1, 3, 4.

4, 5. Mɛɛ hiɛnɔkamɔ Ezekiel gbalɛ lɛ kɛhã, ni mɛni he wɔbaasusu yɛ yitso nɛɛ mli? (Kwɛmɔ mfoniri ni yɔɔ nikasemɔ lɛ shishijee lɛ.)

⁴ Agbɛnɛ hu, Yudafoi komɛi ni ekwa Nyɔŋmɔ yɛ jɛmɛ, ni amɛyeɔ ohe fɛo akɛni oheɔ Yehowa kɛ egbalɔi lɛ anɔ oyeɔ lolo lɛ hewɔ. Akɛni bo kɛ oweku lɛ, nyɛkɛ nyɛhe woɔ jamɔ krɔŋŋ mli hewɔ lɛ, nyɛtsui nyɔɔ nyɛmli yɛ nyɛhe fɛo ni ayeɔ nɛɛ fɛɛ sɛɛ. Kɛ́ nyɛfee ekome kɛsɔle ni nyɛlá lɛ, nyɛmii shɛɔ nyɛhe waa. Nyɔŋmɔ Wiemɔ lɛ ni okaneɔ lɛ hãa omii shɛɔ ohe waa. (Lala 94:19; Rom. 15:4) Ŋɔɔ lɛ akɛ yɛ gbi nɛɛ nɔ lɛ, onyɛmimɛi ni okɛjáa Nyɔŋmɔ lɛ eko kɛ nɔ ko krɛdɛɛ ko eba nyɛkpee nɛɛ shishi​—no ji wolokpo ko ni Ezekiel gbalɛ lɛ yɔɔ mli. Ooshwe ni onu shi ni Yehowa ewo akɛ ebaahã ewebii lɛ aku amɛsɛɛ kɛya amɛshikpɔŋ lɛ nɔ ekoŋŋ lɛ. Be ni akaneɔ gbalɛ nɛɛ waa ni onuɔ lɛ, omii shɛ ohe waa, ni ojwɛŋ hiɛnɔkamɔ ni no hãa onáa akɛ wɔsɛɛ ko lɛ, okɛ oweku lɛ baaku sɛɛ kɛya nyɛshikpɔŋ lɛ nɔ koni nyɛyato anɔkwa jamɔ shishi ekoŋŋ lɛ nɔ!

⁵ Ezekiel gbalɛ lɛ mli eyi obɔ kɛ shiwoi ni tsɔɔ akɛ abaasaa ato anɔkwa jamɔ shishi ekoŋŋ. Hã wɔpɛi nakai sane ni hãa mɔ náa hiɛnɔkamɔ lɛ mli wɔkwɛ. Mɛɛ gbɛ nɔ shiwoi nɛɛ lɛ ba mli ehã mɛi ni aŋɔ amɛ nom lɛ? Mɛɛ gbɛ nɔ gbalɛi nɛɛ eba mli yɛ ŋmɛnɛ beiaŋ? Agbɛnɛ hu, wɔbaakwɛ bɔ ni gbalɛi nɛɛ ekomɛi baaba mli ekoŋŋ wɔsɛɛ.

6. Mɛɛ gbɛ nɔ Yehowa bɔ ewebii lɛ kɔkɔ shii abɔ?

⁶ Yehowa tsɔ Ezekiel nɔ ehã ewebii lɛ le faŋŋ akɛ kɛ́ amɛtee nɔ amɛtse ehiɛ atua lɛ, ebaagbala amɛtoi. Yehowa kɛɛ akɛ: “Abaaŋɔ amɛ kɛya, amɛbaaya nomŋɔɔ mli.” (Eze. 12:11) Tamɔ bɔ ni wɔna yɛ wolo nɛɛ Yitso 6 lɛ mli lɛ, ahã Ezekiel fee nɔkwɛmɔnɔ ko kɛtsɔɔ bɔ ni abaagbala amɛtoi lɛ. Shi enɛ jeee klɛŋklɛŋ kwraa ni abɔ Israelbii lɛ kɔkɔ ni tamɔ nɛkɛ. Kɛjɛ Mose gbii lɛ amli tɔ̃ɔ, nɔ ni miihe ashɛ afii 1,000 ni tsɔ hiɛ lɛ, Yehowa bɔ ewebii lɛ kɔkɔ akɛ, kɛ́ amɛtee nɔ amɛtse ehiɛ atua lɛ, abaaŋɔ amɛ nom. (5 Mo. 28:36, 37) Gbalɔi tamɔ Yesaia kɛ Yeremia hu bɔ Israelbii lɛ kɔkɔ ni tamɔ nakai nɔŋŋ.​—Yes. 39:5-7; Yer. 20:3-6.

7. Mɛɛ gbɛi anɔ Yehowa gbala ewebii lɛ atoi?

 ⁷ Shi dɔlɛ sane ji akɛ, amɛteŋ mɛi babaoo eyabooo kɔkɔbɔi nɛɛ atoi. Be bashɛ ni Yehowa tsui kumɔ yɛ bɔ ni tookwɛlɔi gbohii lɛ anifeemɔi hã ewebii lɛ tsɔmɔ atuatselɔi, amagajalɔi, mɛi ni yeee anɔkwa, kɛ mɛi ni amɛjeŋba efite lɛ hewɔ. No hewɔ lɛ, ehã hɔmɔ ba maŋ lɛ mli​—no bafee naagba wulu kɛ hiɛshishwiemɔ kɛhã amɛ, ejaakɛ, kulɛ amɛshikpɔŋ lɛ ji shikpɔŋ ni “mliki kɛ wo hoɔ yɛ nɔ.” (Eze. 20:6, 7) Tamɔ bɔ ni agba afɔ̃ shi kɛjɛ jeeŋmɔ lɛ, sɛɛ mli lɛ, Yehowa hã aŋɔ ewebii atuatselɔi lɛ nom kɛgbala amɛtoi. Yɛ afi 607 D.Ŋ.B. lɛ, Nebukadnezar ni jɛ Babilon lɛ bakpãtã Yerusalem kɛ sɔlemɔ shĩa ni yɔɔ mli lɛ hiɛ. Aŋɔ Yudafoi ni je hiɛkpatamɔ lɛ mli lɛ ateŋ mɛi akpei abɔ nom kɛtee Babilon. Jɛmɛ ji he ni aye amɛhe fɛo waa ni ate shi awo amɛ, tamɔ atsɔɔ yɛ yitso nɛɛ shishijee lɛ.

8, 9. Mɛɛ gbɛ nɔ Nyɔŋmɔ tsɔ ebɔ Kristofoi asafo lɛ kɔkɔ yɛ jamɔkwamɔ he?

⁸ Ani nɔ ni ba Yudafoi ni Babilonbii lɛ ŋɔ amɛ nom lɛ anɔ lɛ eko ba Kristofoi asafo lɛ nɔ? Hɛɛ! Tamɔ bɔ ni eba lɛ yɛ blema Yudafoi lɛ agbɛfaŋ lɛ, atsɔ hiɛ abɔ Kristo sɛɛnyiɛlɔi lɛ kɔkɔ. Mra mli yɛ Yesu sɔɔmɔ nitsumɔ lɛ mli lɛ, ekɛɛ: “Nyɛkwɛa nyɛhe nɔ jogbaŋŋ yɛ amale gbalɔi lɛ ahe, ejaakɛ amɛkɛ gwantɛŋ hewolo haa amɛhe kɛbaa nyɛŋɔɔ, shi amɛmligbɛ lɛ amɛji ŋa mli gbei ni yeɔ nii hwaŋhwaŋ.” (Mat. 7:15) Afii komɛi asɛɛ lɛ, akɛ mumɔ tsirɛ bɔfo Paulo ni ekɛ kɔkɔbɔɔ ko ni tamɔ enɛ nɔŋŋ hã akɛ: “Mile akɛ kɛ́ mishi mitee lɛ, ŋa mli gbei ni yitseiaŋ wala baabote nyɛteŋ ni amɛkɛ suɔmɔ ehiɛŋ tooku lɛ, ni hii baate shi yɛ nyɛ diɛŋtsɛ nyɛteŋ, ni amɛbaawie saji kɔɔdɔji ni amɛkɛloo kaselɔi lɛ kɛnyiɛ amɛ diɛŋtsɛ amɛsɛɛ.”​—Bɔf. 20:29, 30.

⁹ Nakai beiaŋ lɛ, atsɔɔ Kristofoi lɛ bɔ ni amɛbaafee amɛyɔse mɛi ni he yɔɔ oshara tamɔ nɛkɛ lɛ ni amɛtsi amɛhe kɛje amɛhe. Afã Kristofoi asafoŋ onukpai lɛ koni amɛshwie mɛi ni ekwa anɔkwa jamɔ lɛ kɛje asafo lɛ mli. (1 Tim. 1:19; 2 Tim. 2:16-19; 2 Pet. 2:1-3; 2 Yoh. 10) Fɛɛ sɛɛ lɛ, tamɔ bɔ ni eba lɛ yɛ blema Israel kɛ Yuda sane lɛ mli lɛ, fiofio lɛ Kristofoi babaoo ku amɛhiɛ amɛshwie kɔkɔbɔi ni ajɛ suɔmɔ mli akɛhã nɛɛ anɔ. Be ni klɛŋklɛŋ afii 100 lɛ baa naagbee lɛ, mɛi ni ekwa anɔkwa jamɔ lɛ anifeemɔi ebote asafo lɛ mli. Yohane, ni ji Yesu bɔfoi lɛ ateŋ naagbee mɔ ni yɔɔ wala mli lolo be ni klɛŋklɛŋ afii 100 Ŋ.B. lɛ heɔ aba naagbee lɛ yɔse akɛ, no mli lɛ amale tsɔɔmɔi kɛ atuatsemɔ nifeemɔi ehe shi waa yɛ asafo lɛ mli. Lɛ pɛ ji mɔ ni shwɛ ni bɔ mɔdɛŋ akɛ ebaatsĩ nakai sui lɛ gbɛ koni amɛkahe shi yɛ asafo lɛ mli. (2 Tes. 2:6-8; 1 Yoh. 2:18) Yohane gbele sɛɛ lɛ, mɛni ba?

10, 11. Mɛɛ gbɛ nɔ Yesu abɛbua ni kɔɔ wiiti lɛ kɛ jwɛi lɛ he lɛ ba mli kɛjɛ afii 100 Ŋ.B. kɛbaa?

¹⁰ Be ni Yohane gbo lɛ, Yesu abɛbua ni kɔɔ wiiti lɛ kɛ jwɛi lɛ he lɛ bɔi mlibaa. (Kanemɔ Mateo 13:24-30.) Tamɔ bɔ ni Yesu tsɔ hiɛ egba lɛ, Satan du “jwɛi” loo amale Kristofoi efutu asafo lɛ, ni no  hã amale tsɔɔmɔi gbɛ eshwã asafo lɛ mli oyayaayai. Kwɛ bɔ ni Yehowa tsui baakumɔ ehã be ni ena akɛ, akɛ amagajamɔ, gbii juji kɛ nifeemɔi ni jɛ wɔŋjamɔ mli, kɛ amale tsɔɔmɔi ni aná kɛjɛ jeŋ nilelɔi ni ebuuu Nyɔŋmɔ lɛ kɛ Satan jamɔi amli lɛ ebule asafo ni e-Bi lɛ to shishi lɛ! Mɛni Yehowa fee yɛ he? Tamɔ bɔ ni efee Israelbii ni yeee anɔkwa lɛ, ehã aŋɔ amɛ nom. Kɛjɛ aaafee afii 100 Ŋ.B. kɛbaa lɛ, ebawa akɛ abaayɔse mɛi ni tamɔ wiiti lɛ, ejaakɛ amale Kristofoi lɛ ayi bafa waa. Yɛ gbɛ ko nɔ lɛ, Babilon Kpeteŋkpele lɛ, ni damɔ shi kɛhã amale jamɔi fɛɛ ni yɔɔ je lɛ mli lɛ ŋɔ anɔkwa Kristofoi asafo lɛ nom, shi efua amale Kristofoi lɛ atuu. Be ni amale Kristofoi lɛ shwereɔ lɛ, abaná Kristendom.

¹¹ Afii ohai abɔ ni Kristendom he shi akɛ jamɔ titri ni yɔɔ lɛ mli fɛɛ lɛ, no mli lɛ, anɔkwa Kristofoi komɛi yɛ, ni amɛji mɛi ni Yesu tsɛ amɛ akɛ “wiiti” yɛ ebɛbua lɛ mli lɛ. Tamɔ bɔ ni Yudafoi ni aŋɔ amɛ nom, ni awie amɛhe yɛ Ezekiel 6:9 lɛ fee lɛ, mɛi nɛɛ hu kai anɔkwa Nyɔŋmɔ lɛ. Amɛteŋ mɛi komɛi kɛ ekãa wie amɛshi Kristendom amale tsɔɔmɔi lɛ. Aye amɛhe fɛo ni awa amɛyi. Ani Yehowa baashi ewebii lɛ yɛ amale jamɔ mli kɛya naanɔ? Dabi! Tamɔ bɔ ni eba lɛ yɛ blema Israelbii lɛ agbɛfaŋ lɛ, Yehowa tsɔse amɛ bɔ ni sa kɛ be ni sa hu. (Yer. 46:28) Agbɛnɛ hu, Yehowa shiii ewebii lɛ  efolo, ehã amɛ hiɛnɔkamɔ. Hã wɔku wɔsɛɛ kɛya Yudafoi ni aŋɔ amɛ nom ni hi blema Babilon lɛ asane lɛ nɔ ekoŋŋ, ni wɔkwɛ bɔ ni Yehowa hã amɛná hiɛnɔkamɔ akɛ ebaajie amɛ kɛje nomŋɔɔ lɛ mli.

12, 13. Mɛni hewɔ Yehowa baafo emli ni efu ewebii ni aŋɔ amɛ nom yɛ Ezekiel gbii lɛ amli lɛ sɛɛ lɛ?

¹² Yehowa hã ewebii lɛ le faŋŋ akɛ emli efu amɛ, shi ewo amɛ shi hu akɛ, emli fuŋ amɛ kɛyaŋ naanɔ. Akɛ nɔkwɛmɔnɔ lɛ, kadimɔ wiemɔi nɛɛ: “Mimlifu lɛ sɛɛ baafo, ni mimli ni ewo amɛ la lɛ naa baajɔ, ni mitsui baanyɔ mimli. Ni be ni miŋmɛɛ mimlila lɛ he mishwie amɛnɔ migbe naa lɛ, amɛbaaná amɛle akɛ mi, Yehowa, mi miwie yɛ suɔmɔ ni misumɔɔ ni ajá mikome too pɛ lɛ mli.” (Eze. 5:13) Mɛni hewɔ Yehowa baafo emlifu lɛ sɛɛ lɛ?

¹³ Be ni aŋɔ Yudafoi ni yeee Nyɔŋmɔ anɔkwa lɛ nom lɛ, aŋɔ anɔkwafoi komɛi hu nom afata he. Agbɛnɛ hu, Yehowa tsɔ Ezekiel nɔ egba akɛ, ewebii ni aŋɔ amɔ nom lɛ ekomɛi baatsake amɛtsui be ni amɛyɔɔ nomŋɔɔ lɛ mli. Mɛi ni baashwa amɛhe lɛ ekomɛi baakai hiɛgbejianii ni amɛfee kɛtse Nyɔŋmɔ hiɛ atua lɛ, ni amɛbaakpa Yehowa fai koni ena amɛ mɔbɔ ni ekɛ amɛhe eshai lɛ ake amɛ. (Eze. 6:8-10; 12:16) Ezekiel fata anɔkwafoi nɛɛ ahe, ni gbalɔ Daniel kɛ enanemɛi etɛ lɛ hu fata he. Anɔkwa, Daniel wala sɛɛ tsɛ  aahu akɛ, ena nomŋɔɔ lɛ shishijee kɛ enaagbee fɛɛ. Aŋma bɔ ni ejɛ etsuiŋ esɔle kɛtsɔɔ tsuitsakemɔ yɛ Israelbii lɛ ahe eshai lɛ ahewɔ lɛ he sane yɛ Daniel yitso 9 lɛ. Ŋwanejee ko bɛ he akɛ, henumɔi ni yɔɔ esɔlemɔ lɛ mli lɛ tsɔɔ bɔ ni mɛi ni aŋɔ amɔ nom lɛ ateŋ mɛi babaoo hu shweɔ ni Yehowa kɛ amɛhe eshai ake amɛ koni amɛná edɛŋ jɔɔmɔi ekoŋŋ. Belɛ, ekã shi faŋŋ akɛ Ezekiel gbalɛi ni wo shi akɛ abaakpɔ̃ amɛ ni abaato jamɔ krɔŋŋ shishi ekoŋŋ lɛ hã amɛmii shɛ amɛhe waa!

14. Mɛni hewɔ Yehowa baahã ewebii lɛ aku amɛsɛɛ kɛba amɛmaŋ lɛ?

¹⁴ Shi nɔ ko yɛ ni he hiaa waa yɛ Yehowa webii lɛ ni abaakpɔ̃ amɛ kɛ jamɔ krɔŋŋ shishi ni abaasaa ato ekoŋŋ lɛ mli. Jeee akɛ amɛsa jiemɔ hewɔ Yehowa baafo nom ni aŋɔ amɛ afii babaoo lɛ sɛɛ lɛ, shi moŋ, akɛni eji Yehowa be ni ekɛbaatse egbɛ́i lɛ he yɛ jeŋmaji lɛ fɛɛ ahiɛ ekoŋŋ lɛ hewɔ. (Eze. 36:22) Nakai Babilonbii lɛ baaná ale shi kome nyɔŋlo akɛ amɛnyɔŋmɔi, tamɔ Marduk lɛ jeee nɔ ko kwraa yɛ Nuŋtsɔ Ofe Yehowa lɛ hiɛ! Yehowa tsɔ Ezekiel nɔ ewo ewebii ni aŋɔ amɛ nom lɛ shi; hã wɔsusu shiwoi nɛɛ enumɔ ahe wɔkwɛ. Klɛŋklɛŋ lɛ, hã wɔsusu nɔ ni shiwoi nɛɛ ateŋ eko fɛɛ eko tsɔɔ kɛhã anɔkwafoi ni hi shi yɛ nakai beiaŋ lɛ ahe. No sɛɛ lɛ, wɔbaakwɛ bɔ ni shiwoi nɛɛ ba mli yɛ gbɛ ni da nɔ.

15. Kɛ́ mɛi ni aŋɔ amɛ nom lɛ ku amɛsɛɛ kɛba lɛ, mɛɛ tsakemɔi abaafee yɛ amɛjamɔ nifeemɔi amli?

¹⁵ SHIWOO 1. Ajáŋ amagai dɔŋŋ ni afeŋ nyaŋemɔ nibii ni kɛ amale jamɔ yɔɔ tsakpãa lɛ dɔŋŋ. (Kanemɔ Ezekiel 11:18; 12:24.) Tamɔ bɔ ni wɔsusu he yɛ wolo nɛɛ Yitso 5 lɛ mli lɛ, akɛ amale jamɔ nifeemɔi, tamɔ amagajamɔ, bule Yerusalem kɛ sɔlemɔ shĩa lɛ. No hewɔ lɛ, maŋbii lɛ fite kwraa ni amɛtsi amɛhe kɛje Yehowa he. Yehowa tsɔ Ezekiel nɔ egba akɛ, mɛi ni aŋɔ amɛ nom lɛ baanyɛ akpa gbɛ akɛ wɔsɛɛ ko lɛ, amɛbaanyɛ amɛkɛ amɛhe awo jamɔ ni he tse ni abuleko lɛ mli ekoŋŋ. Kɛ́ amɛku amɛsɛɛ amɛba amɛmaŋ lɛ, jɔɔmɔi krokomɛi fɛɛ ni amɛbaaná lɛ baadamɔ sane titri nɛɛ nɔ: Nyɔŋmɔ gbɛjianɔtoo kɛhã jamɔ krɔŋŋ ni abaato shishi ekoŋŋ lɛ.

16. Mɛɛ shi Yehowa wo ewebii lɛ yɛ amɛshikpɔŋ lɛ he?

 ¹⁶ SHIWOO 2. Amɛbaaku amɛsɛɛ kɛya amɛshikpɔŋ lɛ nɔ ekoŋŋ. Yehowa kɛɛ mɛi ni aŋɔ amɛ nom lɛ akɛ: “Mikɛ Israel shikpɔŋ lɛ baahã nyɛ.” (Eze. 11:17) Shiwoo nɛɛ sa kadimɔ waa, ejaakɛ Babilonbii ni ye Nyɔŋmɔ webii ni aŋɔ amɛ nom lɛ ahe fɛo lɛ hãaa amɛná hiɛnɔkamɔ ko kwraa akɛ wɔsɛɛ lɛ, amɛbaaku amɛsɛɛ kɛya amɛmaŋ ni amɛsumɔɔ lɛ mli. (Yes. 14:4, 17) Kɛfata he lɛ, gbii abɔ ni mɛi ni baaku amɛsɛɛ lɛ baaya nɔ aye anɔkwa lɛ, amɛshikpɔŋ lɛ baafee shikpɔŋ ni baa nii babaoo, ni ebaahã amɛná niyenii kɛ nitsumɔ kpakpa amɛtsu. Bɔ ni hɔmɔ hã amɛhiɛ shwie shi ni amɛnii fee mɔbɔ lɛ baafee tsutsu nii ni eho etee.​—Kanemɔ Ezekiel 36:30.

17. Te Yehowa baana afɔlei ni amɛbaashã amɛhã lɛ lɛ tɛŋŋ?

¹⁷ SHIWOO 3. Abaabɔi nikee afɔlei shãa ekoŋŋ yɛ Yehowa afɔleshaa latɛ lɛ nɔ. Tamɔ bɔ ni wɔna yɛ wolo nɛɛ Yitso 2 lɛ mli lɛ, yɛ Mose Mla lɛ shishi lɛ, afɔlei kɛ nikeenii ni akɛhãa lɛ ji jamɔ krɔŋŋ lɛ fã ko ni he hiaa waa. Kɛ́ nomii ni baaku amɛsɛɛ lɛ tee nɔ amɛbo Yehowa toi ni amɛjá ekome too pɛ lɛ, ebaaná amɛfɔlei lɛ ahe miishɛɛ. No baahã akɛ maŋbii lɛ ahe eshai lɛ ake amɛ ni amɛbaabɛŋkɛ amɛ-Nyɔŋmɔ lɛ kpaakpa. Yehowa wo shi akɛ: “Israel shĩa muu lɛ fɛɛ, amɛ fɛɛ kwa amɛbaasɔmɔ mi. Maná amɛhe miishɛɛ yɛ jɛmɛ, ni mabi oniai ni nyɛtsuɔ lɛ kɛ afɔlei ni nyɛkɛhãa lɛ amli klɛŋklɛŋ yibii lɛ, nyɛnibii krɔŋkrɔŋi lɛ fɛɛ ashi yɛ jɛmɛ.” (Eze. 20:40) Abaato jamɔ krɔŋŋ shishi ekoŋŋ lɛɛlɛŋ, ni no baahã Nyɔŋmɔ webii lɛ aná jɔɔmɔi babaoo.

18. Mɛɛ gbɛ nɔ Yehowa baatsɔ ekwɛ ewebii lɛ anɔ?

¹⁸ SHIWOO 4. Abaajie tookwɛlɔi gbohii lɛ kɛje amɛteŋ. Hii ni nyiɛ hiɛ lɛ anifeemɔi gbohii lɛ ji yiŋtoo kome hewɔ ni Nyɔŋmɔ webii lɛ tɔ̃ tɔmɔi ni yɔɔ hiɛdɔɔ lɛ. Yehowa wo shi akɛ ebaatsu enɛ he nii. Ewo shi yɛ tookwɛlɔi gbohii nɛɛ ahe akɛ: “Mihãŋ amɛlɛ migwantɛŋi lɛ dɔŋŋ . . . Majie migwantɛŋi lɛ yɛ amɛdaaŋ.” Shi Yehowa wo enɔkwafoi lɛ ashi akɛ: “Makwɛ migwantɛŋi lɛ anɔ.” (Eze. 34:10, 12) Mɛɛ gbɛ nɔ ebaatsɔ efee enɛ? Ekɛ hii anɔkwafoi ni yeɔ ewiemɔi lɛ anɔ lɛ baatsu nii akɛ tookwɛlɔi.

19. Mɛɛ shi Yehowa wo yɛ ekomefeemɔ he?

 ¹⁹ SHIWOO 5. Ekomefeemɔ baahi Yehowa jálɔi ateŋ. Dani Nyɔŋmɔ webii lɛ baaya nomŋɔɔ mli lɛ, no mli lɛ, ekomefeemɔ bɛ amɛteŋ; kwɛ bɔ ni enɛ baahao amɛteŋ mɛi ni ji anɔkwafoi lɛ waa. Amale gbalɔi kɛ tookwɛlɔi gbohii lɛ anifeemɔ lɛ hã maŋbii lɛ tse Yehowa gbalɔi anɔkwafoi lɛ ahiɛ atua; maŋbii lɛ amli gbala ewo kui amli ni amɛkɛ amɛhe bɔi tswaa. No hewɔ lɛ, jamɔ krɔŋŋ ni abaato shishi ekoŋŋ lɛ he nibii ni yɔɔ miishɛɛ waa lɛ ateŋ ekome ji shiwoo nɛɛ ni atsɔ Ezekiel nɔ akɛhã lɛ, no ji: “Mahã amɛ tsui ni efee ekome, ni mikɛ mumɔ hee baawo amɛmli.” (Eze. 11:19) Kɛ́ Yudafoi ni baaku amɛsɛɛ lɛ tee nɔ amɛwaje amɛ kɛ Yehowa Nyɔŋmɔ teŋ wekukpaa lɛ, ni amɛhã ekomefeemɔ hu hi amɛ kɛ amɛnyɛmimɛi lɛ ateŋ lɛ, henyɛlɔ ko kwraa nyɛŋ aye amɛnɔ kunim. Akɛ maŋ lɛ, amɛbaawo Yehowa hiɛ nyam shi kome ekoŋŋ moŋ fe nɔ ni amɛbaagbe ehe guɔ loo amɛbaashwie ehiɛ shi.

20, 21. Mɛɛ gbɛ nɔ Nyɔŋmɔ shiwoo lɛ ba mli yɛ Yudafoi ni ku amɛsɛɛ kɛjɛ nomŋɔɔ mli lɛ agbɛfaŋ?

²⁰ Ani shiwoi enumɔ nɛɛ ba mli yɛ Yudafoi ni ku amɛsɛɛ kɛjɛ nomŋɔɔ mli lɛ agbɛfaŋ? Esa akɛ wɔkai wiemɔi ni anɔkwafo Yoshua ni hi shi yɛ blema lɛ wie lɛ, akɛ: “Nibii kpakpai fɛɛ ni Yehowa, nyɛ-Nyɔŋmɔ lɛ, wo nyɛ shi akɛ ebaafee ehã nyɛ lɛ ateŋ ekome folo po bɛ ni efeko.  Fɛɛ eba mli ehã nyɛ. Emli wiemɔ kome folo po bɛ ni bako mli.” (Yos. 23:14) Tamɔ bɔ ni eba lɛ yɛ Yoshua gbii lɛ amli lɛ, nakai nɔŋŋ esa akɛ eba lɛ yɛ Yudafoi ni ku amɛsɛɛ kɛtee amɛmaŋ lɛ agbɛfaŋ.

²¹ Yudafoi lɛ kpa amagai jamɔ kɛ amale jamɔŋ nifeemɔi ni yɔɔ nyaŋemɔ ni hã amɛtsi amɛhe kɛje Yehowa he lɛ. Eyɛ mli akɛ, efee tamɔ nɔ ni nibii amli wa kɛhã amɛ moŋ, shi amɛnyɛ amɛyahi amɛshikpɔŋ lɛ nɔ, amɛhu nɔ, ni amɛdu nii yɛ nɔ, ni amɛmii shɛ amɛhe yɛ jɛmɛ. Nibii ni amɛfee klɛŋklɛŋ lɛ ateŋ eko ji akɛ, amɛsaa amɛma Yehowa afɔleshaa latɛ lɛ yɛ Yerusalem ni amɛshã afɔlei ni sa ehiɛ yɛ nɔ. (Ezr. 3:2-6) Yehowa hã amɛ tookwɛlɔi kpakpai ni sheɔ Nyɔŋmɔ gbeyei, tamɔ osɔfo anɔkwafo kɛ woloŋmalɔ Ezra, amralo Nehemia, amralo Zerubabel, Osɔfonukpa Yoshua, kɛ gbalɔi ni yɔɔ ekãa ni ji Hagai, Zakaria, kɛ Maleaki. Gbii abɔ ni maŋbii lɛ tee nɔ amɛbo gbɛtsɔɔmɔi ni jɛ Yehowa ŋɔɔ lɛ toi lɛ, ekomefeemɔ hi amɛteŋ bɔ ni amɛnako nɔ ko ni tamɔ nakai dã be kplaŋŋ nɛ.​—Yes. 61:1-4; kanemɔ Yeremia 3:15.

22. Te wɔfeɔ tɛŋŋ wɔleɔ akɛ shiwoi ni kɔɔ jamɔ krɔŋŋ ni abaasaa ato shishi ekoŋŋ lɛ he, ni ba mli yɛ Yudafoi lɛ agbɛfaŋ lɛ feɔ nɔ ko ni baaba mli yɛ gbɛ ni da nɔ lɛ he mfoniri lɛ?

²² Ŋwanejee ko bɛ he akɛ, bɔ ni Yehowa shiwoi akɛ ebaahã ato jamɔ krɔŋŋ shishi ekoŋŋ lɛ ba mli klɛŋklɛŋ yɛ Yudafoi lɛ agbɛfaŋ  lɛ wo ewebii lɛ hewalɛ waa! Shi bɔ ni nakai shiwoi lɛ ba mli hã lɛ feɔ nɔ ko ni baaba mli yɛ gbɛ ni da nɔ lɛ he mfoniri kɛkɛ. Te wɔfeɔ tɛŋŋ wɔleɔ enɛ? Yehowa kɛɛ shiwoi nɛɛ baaba mli, shi ja ewebii lɛ efee nɔ ko dã; ja amɛtee nɔ amɛbo lɛ toi ni amɛfee nɔ ni ekɛɔ amɛ lɛ dã. Sɛɛ mli lɛ, Yudafoi lɛ gbo Nyɔŋmɔ nɔ toi ekoŋŋ ni amɛtse ehiɛ atua. Shi tamɔ bɔ ni Yoshua kɛɛ lɛ, Yehowa wiemɔ baa mli be fɛɛ be. Enɛ tsɔɔ akɛ, shiwoi nɛɛ baaba mli ekoŋŋ yɛ gbɛ ni da nɔ kɛya naanɔ. Hã wɔkwɛ bɔ ni enɛ ba lɛ ehã.

23, 24. Mɛɛ be “bei ni abaasaa nibii fɛɛ” lɛ je shishi, ni yɛ mɛɛ gbɛ nɔ?

²³ Akɛ mɛi ni kaseɔ Biblia lɛ, wɔle akɛ jeŋ fɔŋ nɛɛ naagbee gbii lɛ je shishi kɛjɛ afi 1914. Shi wɔ, akɛ Yehowa tsuji lɛ, enɛ edɔɔɔ wɔ kwraa. Anɔkwa, Biblia lɛ hãa wɔleɔ akɛ nɔ ko ni yɔɔ miishɛɛ waa bɔi mlibaa kɛjɛ afi 1914​—no ji “bei ni abaasaa nibii fɛɛ” lɛ. (Bɔf. 3:21) Te wɔfeɔ tɛŋŋ wɔleɔ enɛ? Obaabi akɛ, mɛni ba yɛ ŋwɛi yɛ afi 1914? Awó Yesu Kristo akɛ Mesia Maŋtsɛyeli lɛ nɔ Maŋtsɛ! Mɛɛ gbɛ nɔ nakai nifeemɔ lɛ bafee bei ni akɛbaasaa nibii fɛɛ? Kaimɔ akɛ, Yehowa wo Maŋtsɛ David shi akɛ ebaahã eseshi lɛ maŋtsɛyeli lɛ adamɔ shi kɛya naanɔ. (1 Kro. 17:11-14) Yɛ afi 607 D.Ŋ.B., be ni Babilonbii lɛ kpãtã Yerusalem hiɛ ni no hã maŋtsɛmɛi ni jɛ David weku lɛ mli lɛ sɛɛ fo lɛ, maŋtsɛyeli nɛɛ sɛɛ fo kɛyashi be ko.

²⁴ Yesu ji “gbɔmɔ Bi lɛ,” ni eji David seshinyo, no hewɔ lɛ, ebatsɔ mɔ ni yɔɔ hegbɛ yɛ mla naa akɛ David maŋtsɛyeli lɛ niyelɔ. (Mat. 1:1; 16:13-16; Luka 1:32, 33) Yɛ afi 1914, be ni Yehowa kɛ Yesu ta maŋtsɛ sɛi lɛ nɔ yɛ ŋwɛi lɛ, no beiaŋ ni “bei ni abaasaa nibii fɛɛ” lɛ je shishi! No gbele gbɛ agbɛnɛ koni Yehowa ahã Maŋtsɛ ni yeɔ emuu nɛɛ atsa nitsumɔ ni ji nibii fɛɛ asaamɔ lɛ nɔ.

25, 26. (a) Mɛɛ be bei kpalaŋŋ ni Babilon Kpeteŋkpele lɛ kɛŋɔ anɔkwa jamɔ nom lɛ ba naagbee, ni te wɔfeɔ tɛŋŋ wɔleɔ? (Kwɛmɔ akrabatsa ni ji “Mɛni Hewɔ Wɔkɛɔ Akɛ Afi 1919 Lɛ?” hu.) (b) Mɛɛ gbalɛ bɔi mlibaa kɛjɛ afi 1919 lɛ nɔ kɛbaa?

²⁵ Be ni awó Kristo Maŋtsɛ lɛ, nibii ni efee klɛŋklɛŋ lɛ ateŋ ekome ji, efata e-Tsɛ lɛ he kɛbakwɛ gbɛjianɔ ni Nyɔŋmɔ webii lɛ eto  kɛhã jamɔ krɔŋŋ yɛ shikpɔŋ lɛ nɔ lɛ. (Mal. 3:1-5) Tamɔ bɔ ni Yesu gba yɛ enɔkwɛmɔnɔ ni kɔɔ wiiti kɛ jwɛi lɛ he lɛ mli lɛ, afii babaoo shwie mli ni anyɛɛɛ ana srɔto ni yɔɔ wiiti lɛ kɛ jwɛi lɛ teŋ; no ji ebawa akɛ abaayɔse anɔkwa Kristofoi ni afɔ amɛ mu lɛ yɛ amale Kristofoi ni kɛɔ akɛ afɔ amɛ mu lɛ ateŋ. * Shi agbɛnɛ, nikpamɔ be lɛ bashɛ yɛ afi 1914, ni ana srɔto lɛ faŋŋ diɛŋtsɛ. Dani afi 1914 lɛ baashɛ lɛ, no mli lɛ, Biblia Kaselɔi anɔkwafoi komɛi kɛ afii pii ekpa Kristendom amale tsɔɔmɔi lɛ ahe mama ni amɛbɔi amɛhe tsemɔ fiofio kɛmiije amale jamɔ gbɛjianɔtoo nɛɛ he. Eji be ni Yehowa kɛbaaye ebua ewebii lɛ ni amɛtse amɛhe kwraa agbɛnɛ. No hewɔ lɛ, yɛ afi 1919, ni ji afii fioo komɛi be ni “nikpamɔ be lɛ” je shishi lɛ, ahã Nyɔŋmɔ webii lɛ ye amɛhe kwraa kɛje nom ni Babilon Kpeteŋkpele lɛ ŋɔ amɛ lɛ mli. (Mat. 13:30) Nomŋɔɔ lɛ eba naagbee agbɛnɛ!

²⁶ Ezekiel gbalɛi ni kɔɔ anɔkwa jamɔ ni abaato shishi ekoŋŋ lɛ he lɛ bɔi mlibaa yɛ gbɛ ni da nɔ fe emlibai krokomɛi fɛɛ ni Nyɔŋmɔ webii ni hi shi yɛ blema beiaŋ lɛ ena pɛŋ. Agbɛnɛ, hã wɔkwɛ bɔ ni shiwoi enumɔ ni wɔsusu amɛhe momo lɛ eba mli yɛ gbɛ ni da nɔ.

27. Mɛɛ gbɛ nɔ Nyɔŋmɔ tsuu ewebii lɛ ahe kɛje amagajamɔ he?

²⁷ SHIWOO 1. Amagajamɔ kɛ jamɔŋ nifeemɔi krokomɛi ni yɔɔ nyaŋemɔ lɛ fɛɛ sɛɛ baafo. Yɛ afi 1800 afii lɛ anaagbee gbɛ kɛmiimɔ afi 1900 afii lɛ ashishijee gbɛ lɛ, anɔkwa Kristofoi lɛ bɔi amɛhe naabuamɔ kɛhã jamɔ, ni amɛbɔi amɛhe tsimɔ kɛje amale jamɔŋ nifeemɔi ahe. Amɛkwa tsɔɔmɔi ni damɔɔɔ Biblia lɛ nɔ, ni ná amɛshishifã kɛjɛ amale jamɔ mli lɛ, tamɔ woo ni akɛhãa nyɔŋmɔi etɛ ni efee ekome ni ji Triniti lɛ, adesa susuma ni gbooo, kɛ hɛl la tsɔɔmɔ lɛ. Amɛfee lɛ faŋŋ akɛ amagai srɔtoi fɛɛ ni akɛtsuɔ nii yɛ jamɔ mli lɛ esaaa Nyɔŋmɔ hiɛ. Fiofio lɛ, Nyɔŋmɔ webii lɛ bayɔse akɛ krɔɔs ni akɛtsuɔ nii yɛ jamɔ mli lɛ ji amagajamɔ.​—Eze. 14:6.

28. Mɛɛ shishinumɔ naa Yehowa hã ewebii lɛ ku amɛsɛɛ kɛba amɛshikpɔŋ lɛ nɔ ekoŋŋ?

 ²⁸ SHIWOO 2. Nyɔŋmɔ kɛ ewebii lɛ baaku sɛɛ kɛya amɛfonirifeemɔŋ shikpɔŋ lɛ nɔ ekoŋŋ. Be ni anɔkwa Kristofoi lɛ shi Babilon Kpeteŋkpele lɛ mli lɛ, amɛyaje amɛfonirifeemɔŋ shikpɔŋ ni hi jogbaŋŋ lɛ nɔ, he ni mumɔŋ hɔmɔ yeŋ amɛ dɔŋŋ yɛ. (Kanemɔ Ezekiel 34:13, 14.) Tamɔ bɔ ni wɔbaana yɛ wolo nɛɛ Yitso 19 lɛ mli lɛ, Yehowa ejɔɔ mfonirifeemɔŋ shikpɔŋ nɛɛ kɛ mumɔŋ niyenii babaoo ni anako enɔ dã.​—Eze. 11:17.

29. Mɛɛ gbɛ nɔ awo shiɛmɔ nitsumɔ lɛ mli hewalɛ yɛ afi 1919?

²⁹ SHIWOO 3. Abaabɔi nikee afɔlei shãa ekoŋŋ yɛ Yehowa afɔleshaa latɛ lɛ nɔ. Yɛ klɛŋklɛŋ afii 100 Ŋ.B. lɛ, ahã Kristofoi lɛ le akɛ esa akɛ amɛshã afɔlei ni jara wa kwraa fe nɔ ni akɛ kooloi shãa lɛ amɛhã Nyɔŋmɔ​—afɔlei nɛɛ ji wiemɔi ni amɛwie kɛjie Yehowa yi kɛ ehe sane ni amɛshiɛ amɛtsɔɔ mɛi krokomɛi lɛ. (Heb. 13:15) Yɛ afii ohai babaoo ni Babilon Kpeteŋkpele lɛ kɛŋɔ Nyɔŋmɔ webii lɛ  nom lɛ mli lɛ, abɛ gbɛjianɔtoo ko ni baakwɛ ni ashã afɔlei ni tamɔ nɛkɛ. Shi be ni nomŋɔɔ lɛ ba naagbee lɛ, no mli lɛ, Nyɔŋmɔ webii lɛ kɛ yijiemɔ afɔlei ni tamɔ nɛkɛ miihã Nyɔŋmɔ momo. No mli lɛ, amɛkɛ ekãa miitsu shiɛmɔ nitsumɔ lɛ ni amɛkɛ miishɛɛ miijie Nyɔŋmɔ yi yɛ amɛkpeei ashishi. Kɛjɛ afi 1919 kɛbaa nɛɛ, “nyɔŋ anɔkwafo kɛ hiɛshikalɔ lɛ” egbala ejwɛŋmɔ kɛtee bɔ ni shiɛmɔ nitsumɔ lɛ he hiaa waa lɛ nɔ, ni amɛto gbɛjianɔ koni atsu lɛ jogbaŋŋ kɛmɔ shi. (Mat. 24:45-47) No hewɔ lɛ, wɔbaanyɛ wɔkɛɛ akɛ, Yehowa afɔleshaa latɛ lɛ nɔ eyi kɛ mɛi babaoo ni kɛ yijiemɔ afɔlei miihã Yehowa kɛmiijie egbɛ́i krɔŋkrɔŋ lɛ yi!

30. Mɛni Yesu fee koni ewebii lɛ aná tookwɛlɔi kpakpai?

³⁰ SHIWOO 4. Abaajie tookwɛlɔi gbohii lɛ kɛje Nyɔŋmɔ webii lɛ ateŋ. Kristo jie Nyɔŋmɔ webii lɛ kɛje amale tookwɛlɔi ni yɔɔ Kristendom ni foɔ amɛ pɛ amɛnɔ mli ni feɔ nibii ni ejaaa lɛ adɛŋ. Yɛ Kristo asafo lɛ mli lɛ, ahe tookwɛlɔi fɛɛ ni feɔ amɛnii tamɔ nakai amale tookwɛlɔi lɛ ahegbɛi lɛ yɛ amɛdɛŋ. (Eze. 20:38) Yesu, ni ji Tookwɛlɔ Kpakpa lɛ, kwɛ ni alɛ etoi lɛ jogbaŋŋ. Yɛ afi 1919 lɛ, ehala nyɔŋ anɔkwafo kɛ hiɛshikalɔ lɛ. Kristofoi anɔkwafoi ni afɔ amɛmu lɛ ateŋ kuu fioo nɛɛ nyiɛ hiɛ ni ahã Nyɔŋmɔ webii mumɔŋ niyenii babaoo kɛlɛ amɛ jogbaŋŋ. Sɛɛ mli lɛ, atsɔse asafoŋ onukpai koni amɛwa kɛkwɛ “Nyɔŋmɔ tooku” lɛ. (1 Pet. 5:1, 2) Bei pii lɛ, akɛ wiemɔi ni yɔɔ Ezekiel 34:15, 16 lɛ tsuɔ nii kɛkaiɔ tookwɛlɔi ni ji Kristofoi lɛ koni amɛnyiɛ bɔ ni Yehowa Nyɔŋmɔ kɛ Yesu Kristo kwɛɔ toi lɛ ehãa lɛ sɛɛ pɛpɛɛpɛ.

31. Mɛɛ gbɛ nɔ Yehowa ehã gbalɛ ni yɔɔ Ezekiel 11:19 lɛ eba mli?

³¹ SHIWOO 5. Ekomefeemɔ baahi Yehowa jálɔi ateŋ. Afii ohai abɔ nɛɛ amli fɛɛ lɛ, Kristendom mli egbala kwraa ni amɛná jamɔ kui srɔtoi babaoo ni kɛ amɛhe tswaa. Shi Yehowa efee nɔ ko ni yɔɔ naakpɛɛ diɛŋtsɛ ehã ewebii ni ekɛ amɛ eba anɔkwa jamɔ mli ekoŋŋ lɛ. Etsɔ Ezekiel nɔ ewo shi akɛ, “mahã amɛ tsui ni efee ekome,” ni shiwoo nɛɛ eba mli yɛ gbɛ ni yɔɔ nyam nɔ. (Eze. 11:19) Kristo yɛ sɛɛnyiɛlɔi akpekpei abɔ ni jɛ wekui, wiemɔi, jamɔi, maji, kɛ shihilɛi srɔtoi amli yɛ jeŋ fɛɛ. Kɛ̃lɛ, amɛ fɛɛ amɛfee ekome yɛ gbɛ ni nɔ bɛ nɔ kɛmiikase anɔkwale kome too lɛ nɔŋŋ ni amɛmiitsu nitsumɔ kome. Gbi gbɛkɛ ni enɔ jetsɛremɔ lɛ Yesu baagbo lɛ, esɔle kɛ hiɛdɔɔ koni ahã esɛɛnyiɛlɔi lɛ afee ekome. (Kanemɔ Yohane 17:11, 20-23.) Yehowa etsu Yesu nibimɔ nɛɛ he nii yɛ gbɛ ni da waa nɔ yɛ wɔgbii nɛɛ amli.

32. Amrɔ nɛɛ ni gbalɛi ni kɔɔ jamɔ krɔŋŋ ni abaato shishi ekoŋŋ lɛ ahe lɛ eba mli lɛ, te onuɔ he ohãa tɛŋŋ? (Kwɛmɔ akrabatsa ni ji “Nomŋɔɔ Kɛ Jamɔ Krɔŋŋ Ni Abaato Shishi Ekoŋŋ Lɛ He Gbalɛi.”)

³² Ani eŋɔɔɔ onaa waa akɛ oyɛ be ni yɔɔ miishɛɛ nɛɛ mli, ni ji be ni ato jamɔ krɔŋŋ shishi ekoŋŋ nɛɛ? Ŋmɛnɛ lɛ, wɔnaa akɛ Ezekiel gbalɛi lɛ eba mli yɛ nibii fɛɛ ni wɔfeɔ kɛjáa Nyɔŋmɔ lɛ agbɛfaŋ. Wɔbaanyɛ wɔná nɔmimaa akɛ, amrɔ nɛɛ, Yehowa ená ewebii lɛ ahe miishɛɛ, tamɔ bɔ ni etsɔ Ezekiel nɔ egba lɛ pɛpɛɛpɛ, egba akɛ: “Maná nyɛhe miishɛɛ.” (Eze. 20:41) Oná hegbɛ kpele diɛŋtsɛ akɛ  ofata mɛi ni efee ekome, ni alɛɔ amɛ jogbaŋŋ, ni amɛkɛ yijiemɔ afɔlei hãa Yehowa yɛ jeŋ fɛɛ, ni ahã amɛye amɛhe kɛje nom ni Babilon Kpeteŋkpele lɛ ŋɔ amɛ afii babaoo lɛ mli lɛ ahe! Shi Ezekiel gbalɛi ni tsɔɔ akɛ abaasaa nibii fɛɛ lɛ ekomɛi yɛ baaba mli yɛ gbɛ ni da nɔ lolo.

33-35. (a) Te Yudafoi ni aŋɔ amɛ nom lɛ nu gbalɛ ni yɔɔ Ezekiel 36:35 lɛ shishi amɛhã tɛŋŋ? (b) Ŋmɛnɛ lɛ, te wɔ hu wɔnuɔ gbalɛ nɛɛ shishi wɔhãa tɛŋŋ? (Kwɛmɔ akrabatsa ni ji “Bei Ni Abaasaa Nibii Fɛɛ” Lɛ hu.)

³³ Tamɔ bɔ ni wɔna kɛtsɔ hiɛ lɛ, “bei ni abaasaa nibii fɛɛ” lɛ je shishi be ni awó Yesu ni jɛ David wekutɔkpaa lɛ mli lɛ maŋtsɛ yɛ afi 1914 lɛ. (Eze. 37:24) No sɛɛ lɛ, Yehowa hã Kristo hegbɛ ni eto jamɔ krɔŋŋ shishi ekoŋŋ yɛ Yehowa webii lɛ ateŋ be ni Babilon Kpeteŋkpele lɛ eŋɔ amɛ nom afii babaoo sɛɛ lɛ. Shi ani no kɛ nitsumɔ ni akɛwo Kristo dɛŋ akɛ esaa nibii lɛ ba naagbee? Dabi kwraa! Ebaaya nɔ etsu nitsumɔ nɛɛ yɛ gbɛ ni nɔ bɛ nɔ wɔsɛɛ, ni Ezekiel gbalɛi lɛ hãa wɔnaa sane nɛɛ naa jogbaŋŋ yɛ gbɛ ni taa mɔ tsuiŋ nɔ.

³⁴ Akɛ nɔkwɛmɔnɔ lɛ, susumɔ sane ni akɛ mumɔ tsirɛ Ezekiel ni eŋma nɛɛ he okwɛ: “Mɛi baakɛɛ akɛ: ‘Shikpɔŋ ni kã shi amaŋfɔ lɛ etsɔ tamɔ Eden abɔɔ.’” (Eze. 36:35) Te Ezekiel kɛ enyɛmimɛi ni aŋɔ amɛ nom lɛ nu shiwoo nɛɛ shishi amɛhã tɛŋŋ? Ekã shi faŋŋ akɛ, amɛkpaaa gbɛ akɛ shikpɔŋ ni akɛ amɛ baaku sɛɛ kɛba nɔ lɛ baatsɔ tamɔ Eden abɔɔ loo Paradeiso lɛ diɛŋtsɛ, nɔ ni Yehowa to shishi kɛjɛ shishijee lɛ! (1 Mo. 2:8) Moŋ lɛ, amɛnu shishi akɛ Yehowa miiwo amɛ shi akɛ, shikpɔŋ ni ekɛ amɛ baaku sɛɛ kɛba nɔ lɛ baafee fɛo ni ebaaba nii jogbaŋŋ.

³⁵ Ŋmɛnɛ lɛ, te wɔ hu wɔnuɔ gbalɛ nɛɛ shishi wɔhãa tɛŋŋ? Wɔkpaaa gbɛ akɛ wɔbaahi shikpɔŋ ni etsɔ Paradeiso diɛŋtsɛ nɔ amrɔ nɛɛ yɛ jeŋ fɔŋ ni Satan Abonsam yeɔ nɔ nɛɛ mli. Moŋ lɛ, wɔnuɔ shishi akɛ, shiwoo nɛɛ eba mli ŋmɛnɛ yɛ mfonirifeemɔŋ. Akɛ Yehowa tsuji lɛ, wɔyɛ mfonirifeemɔŋ shikpɔŋ, ni ji mumɔŋ paradeiso lɛ nɔ, he ni wɔsɔmɔɔ Yehowa jogbaŋŋ ni wɔkɛ esɔɔmɔ krɔŋŋ lɛ yeɔ klɛŋklɛŋ gbɛhe yɛ wɔshihilɛ mli yɛ lɛ. Fiofio lɛ, mfonirifeemɔŋ shikpɔŋ nɛɛ miiya nɔ eefee fɛo waa be fɛɛ be. Shi mɛni baaba wɔsɛɛ?

36, 37. Mɛɛ shiwoo baaba mli yɛ Paradeiso ni baaba wɔsɛɛ lɛ mli?

³⁶ Yɛ Harmagedon ta wulu lɛ sɛɛ lɛ, Yesu baatsa nitsumɔ ni akɛwo edɛŋ akɛ esaa nibii fɛɛ lɛ nɔ, ni ebaasaa shikpɔŋ lɛ diɛŋtsɛ po efata he. Yɛ afii akpe ni ekɛbaaye nɔ lɛ mli lɛ, ebaaye ebua adesai ni amɛhã shikpɔŋ muu lɛ fɛɛ atsɔ Eden abɔɔ loo paradeiso, tamɔ bɔ ni Yehowa to eyiŋ kɛjɛ shishijee lɛ pɛpɛɛpɛ! (Luka 23:43) Kɛkɛ lɛ, toiŋjɔlɛ baahi adesai fɛɛ ateŋ, ni amɛbaakwɛ shikpɔŋ ni ji amɛshĩa lɛ nɔ jogbaŋŋ. Oshãra ko oshãra ko ninaŋ amɛ, ni mɔ ko woŋ amɛhe gbeyei yɛ he ko he ko. Feemɔ be ni shiwoo ni nyiɛ sɛɛ nɛɛ po eba mli lɛ he mfoniri okwɛ: “Mikɛ amɛ baakpaŋ toiŋjɔlɛ  kpaŋmɔ, ni majie ŋa mli kooloi awuiyelɔi kɛje shikpɔŋ lɛ nɔ, koni amɛhi shi yɛ ŋa lɛ nɔ ni efɔŋ ko ninaaa amɛ, ni amɛwɔ yɛ koi lɛ amli.”​—Eze. 34:25.

³⁷ Feemɔ he mfoniri okwɛ! Nakai beiaŋ lɛ, obaanyɛ oyashara shi yɛ shikpɔŋ nɛɛ nɔ he fɛɛ he ni osheee nɔ ko nɔ ko gbeyei. Kooloo ko kooloo ko yeŋ bo awui. Oshãra ko nyɛŋ afite toiŋjɔlɛ ni oyɔɔ lɛ. Okome too obaanyɛ onyiɛ koo hayii mli, ni obaaná bɔ ni jɛmɛ yɔɔ fɛo hã lɛ he miishɛɛ, ni obaanyɛ okã jɛmɛ ni owɔ jogbaŋŋ, ni ote shi kɛ hewalɛ hee ni efɔŋ ko efɔŋ ko ninaaa bo!

38. Kɛ́ shiwoo ni yɔɔ Ezekiel 28:26 lɛ ba mli lɛ, te obaanu he ohã tɛŋŋ?

³⁸ Nakai beiaŋ lɛ, wɔbaana ni shiwoo ni nyiɛ sɛɛ nɛɛ hu eba mli, akɛ: “Amɛbaahi [shikpɔŋ lɛ] nɔ, ni sane fɔŋ ko ninaŋ amɛ, ni amɛbaamamɔ shĩai ni amɛbaafee wain ŋmɔji, ni kɛ́ migbala mɛi ni ebɔle amɛ ni yeɔ amɛhe fɛo lɛ atoi lɛ, amɛbaahi shi shweshweeshwe; ni amɛbaaná amɛle akɛ miji Yehowa, amɛ-Nyɔŋmɔ lɛ.” (Eze. 28:26) Nakai beiaŋ lɛ, Yehowa henyɛlɔi lɛ eko eko bɛ dɔŋŋ, no hewɔ lɛ, wɔbaaná toiŋjɔlɛ kɛ shweshweeshwe shihilɛ yɛ shikpɔŋ lɛ nɔ fɛɛ. Wɔbaakwɛ shikpɔŋ lɛ nɔ jogbaŋŋ, wɔbaakwɛ wɔ diɛŋtsɛ wɔhe kɛ wɔsuɔlɔi hu jogbaŋŋ, ni wɔbaamamɔ shĩai kpakpai ni wɔbaahi mli, ni wɔbaafee wain ŋmɔji.

39. Mɛni hewɔ obaanyɛ oná nɔmimaa akɛ Ezekiel gbalɛi ni kɔɔ Paradeiso lɛ he lɛ baaba mli?

³⁹ Ani onaa shiwoo nɛɛ tamɔ lamɔi kɛkɛ? Kɛ́ nakai ni lɛ, no lɛ, kaimɔ nibii ni ona momo yɛ be ni ‘asaa nibii fɛɛ’ nɛɛ mli lɛ. Yɛ Satan shiteekɛwoi ni naa wala waa lɛ fɛɛ sɛɛ lɛ, ahã Yesu hewalɛ ni eto jamɔ krɔŋŋ shishi ekoŋŋ yɛ jeŋ ni mli shihilɛ efite kwraa nɛɛ mli. Enɛ ji odaseyeli kpele ni tsɔɔ akɛ shiwoi fɛɛ ni Nyɔŋmɔ tsɔ Ezekiel nɔ ekɛhã lɛ baaba mli!