Kɛhã Mɛi Ni Sumɔɔ Yehowa:

Yɛ afi 1971 lɛ, afee “Nyɔŋmɔ Gbɛ́i” Kpokpaa Wulu Nɔ Kpee lɛ. Mɛi ni tee kpee nɛɛ amii shɛ amɛhe waa yɛ woji hei srɔtoi ni ajie amɛ kpo lɛ hewɔ. Afi 1972 Yearbook lɛ wie woji nɛɛ ahe akɛ amɛji nɔ ko ni “mɔ ko mɔ ko jwɛŋmɔ shɛɛɛ he.” Nyɛmi nuu ko wie woji hei ni ajie amɛ kpo nɛɛ ekome he akɛ: “Eji nibii ni yɔɔ miishɛɛ waa ni baaba lɛ ahe sane ko ni wɔná!” Mɛɛ wolo etsɔɔ lɛ? No ji “The Nations Shall Know That I Am Jehovah”​—How? wolo lɛ. Shi mɛni hewɔ wolo nɛɛ hã mɛi amii shɛ amɛhe waa nakai? No ji, wolo nɛɛ tsɔɔ tsakemɔi ni afee yɛ shishinumɔ ni wɔhiɛ yɛ gbalɛi ni yɔɔ Biblia mli wolo ni ji Ezekiel lɛ mli lɛ​—gbalɛi ni kɔɔ nɔ ni baaba adesai fɛɛ anɔ wɔsɛɛ lɛ he.

Kɛjɛ be ni ajie ‘Know Jehovah’ wolo lɛ kpo kɛbashi amrɔ nɛɛ, Nyɔŋmɔ webii lɛ ayifalɛ etee hiɛ oyayaayai​—nakai beiaŋ lɛ amɛyifalɛ aaafee akpekpe 1.5, shi amrɔ nɛɛ amɛyi efa fe akpekpei 8. (Yes. 60:22) Yɛ jeŋ fɛɛ lɛ, Yehowa tsuji akpekpei abɔ nɛɛ wieɔ wiemɔi srɔtoisrɔtoi ni fa fe 900. (Zak. 8:23) Mɛi nɛɛ ateŋ mɛi babaoo nako wolo ko ni gbalaa Ezekiel gbalɛi lɛ amli fitsofitso amɛkase dã.

Kɛfata he lɛ, kɛjɛ afi 1971 kɛbaa nɛɛ, akɛni la lɛ miiya nɔ eekpɛ hewɔ lɛ, afee tsakemɔi pii yɛ bɔ ni wɔnuɔ Biblia mli anɔkwalei babaoo ashishi wɔhãa lɛ amli. (Abɛi 4:18) Yɛ afi 1985 lɛ, wɔbɔi bɔ ni abuɔ “gwantɛŋi krokomɛi” lɛ jalɔi ní amɛbatsɔmɔɔ Nyɔŋmɔ nanemɛi lɛ shishinumɔ faŋŋ. (Yoh. 10:16; Rom. 5:18; Yak. 2:23) Kɛkɛ ni yɛ afi 1995 lɛ, wɔbanu shishi klɛŋklɛŋ kwraa akɛ naagbee kojomɔ ni abaakojo mɛi akɛ “gwantɛŋi” kɛ “abotiai” lɛ baaba mli yɛ “amanehulu kpeteŋkpele” lɛ mli. (Mat. 24:21; 25:31, 32) Tsakemɔi nɛɛ fɛɛ esa bɔ ni wɔnuɔ Ezekiel wolo lɛ shishi wɔhãa lɛ he.

Yɛ nyɛsɛɛ afii nɛɛ amli lɛ, lá lɛ etee nɔ ekpɛ waa. Susumɔ nibii ni wɔkase yɛ Yesu nɔkwɛmɔnii loo abɛbuai lɛ amli lɛ he okwɛ. Nibii nɛɛ ateŋ babaoo ebafee faŋŋ yɛ wɔjwɛŋmɔŋ kɛ wɔtsuii amli agbɛnɛ. Nɔkwɛmɔnii nɛɛ ateŋ babaoo kɔɔ nibii ni etsɛŋ ebaaya nɔ yɛ amanehulu kpeteŋkpele ni eshɛ shi etã lɛ mli lɛ ahe. Nakai nɔŋŋ hu afee tsakemɔi yɛ bɔ ni wɔnuɔ Ezekiel wolo lɛ mli gbalɛi lɛ ekomɛi ashishi wɔhãa lɛ amli. Gbalɛi nɛɛ ateŋ ekomɛi nɛ: Gog ni jɛ Magog lɛ (yitso 38 kɛ 39), nuu ni woloŋmalɔ iŋki tɔ ŋmɔ ehɛ lɛ nitsumɔ lɛ (yitso 9), kɛ wui ni egbigbii ni jwere shikpɔŋ kplanaa lɛ nɔ lɛ, kɛ tsei enyɔ ni afee amɛ ekome lɛ (yitso 37). No hewɔ lɛ, akɛ shishinumɔ hei nɛɛ fɛɛ miiye nɔ ni aŋma yɛ ‘Know Jehovah’ wolo lɛ mli afii abɔ nɛ lɛ najiaŋ.

Belɛ, ebɛ naakpɛɛ akɛ Yehowa webii lɛ ateŋ mɛi pii ebi akɛ, “Mɛɛ be wɔbaaná wolo ko ni shishinumɔi hei ni wɔná yɛ Ezekiel gbalɛi lɛ amli lɛ fɛɛ yɔɔ mli?” Afee Ato Yehowa Jamɔ Krɔŋŋ Shishi Ekoŋŋ Agbɛnɛ! wolo lɛ koni etsu yiŋtoo nɛɛ he nii. Be ni okaneɔ emli yitsei 22 lɛ amli ni ojwɛŋɔ mfonirii fɛfɛji ni yɔɔ mli lɛ anɔ lɛ, onaa baakpɛ ohe yɛ bɔ ni atao nii amli jogbaŋŋ kɛfee wolo nɛɛ he. Wɔsɔle waa ni wɔsusu nii ahe kɛtee shɔŋŋ koni wɔna nɔ hewɔ ni Yehowa kɛ Biblia mli wolo ni ji Ezekiel, ni emli saji lɛ taa mɔ tsuiŋ lɛ hã lɛ. Wɔsusu sanebimɔi ni tamɔ nɔ ni nyiɛ sɛɛ nɛɛ ahe jogbaŋŋ: Mɛɛ nikasemɔi yɔɔ Ezekiel wolo lɛ mli kɛhã mɛi ni hi shi yɛ egbii lɛ amli lɛ kɛ wɔ mɛi ni wɔyɔɔ ŋmɛnɛ lɛ hu?  Te gbalɛi lɛ ateŋ nɔ ni wieɔ nibii ni baaba mli lolo wɔsɛɛ lɛ ahe? Ani esa akɛ wɔkɛ wɔjwɛŋmɔ ama nibii ni yɔɔ Ezekiel gbalɛi lɛ amli ni feɔ nibii ni baaba wɔsɛɛ lɛ ahe mfoniri lɛ anɔ? Saji nɛɛ ahetoi lɛ hãa wɔnuɔ Biblia mli wolo ni wɔsumɔɔ ekanemɔ waa nɛɛ shishi jogbaŋŋ amrɔ nɛɛ.

Be ni okaneɔ Biblia mli wolo ni ji Ezekiel lɛ kɛjɛ shishijee kɛyashi naagbee lɛ, ekã shi faŋŋ akɛ onyaa Yehowa gbɛjianɔtoo lɛ fã ni yɔɔ ŋwɛi lɛ he waa. Agbɛnɛ hu, ŋwanejee ko bɛ he akɛ, be ni onaa akɛ taomɔ nii kome too lɛ nɔŋŋ Yehowa kpaa gbɛ kɛjɛɔ mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ ni miisumɔ ni amɛjá lɛ jogbaŋŋ lɛ adɛŋ lɛ, omii shɛɔ ohe waa. Jamɔ Krɔŋŋ wolo lɛ baahã ohiɛ asɔ nibii ni Yehowa efee ehã ewebii lɛ kɛ nibii ni ebaafee ehã amɛ wɔsɛɛ lɛ waa fe tsutsu lɛ. Obaana akɛ wolo nɛɛ maa saji otii enyɔ komɛi anɔ mi shii abɔ. Klɛŋklɛŋ lɛ, bɔ ni afee ni wɔsa Yehowa hiɛ lɛ, esa akɛ wɔle lɛ ni wɔkpɛlɛ enɔ akɛ Jeŋ Muu Fɛɛ Nɔyelɔ. Nɔ ni ji enyɔ lɛ, esa akɛ wɔjá Yehowa yɛ gbɛ ni ekpɛlɛɔ nɔ lɛ nɔ, ni wɔhi shi yɛ etaomɔ nii lɛ anaa.

Wɔgbɛkpamɔ ji akɛ, wolo nɛɛ baawaje ofai shi ni otswa akɛ obaajá Yehowa yɛ gbɛ ni woɔ egbɛ́i kpele ni yɔɔ krɔŋkrɔŋ lɛ hiɛ nyam lɛ nɔ. Nakai beiaŋ nɔŋŋ lɛ, eba akɛ wolo nɛɛ baawo bo hewalɛ ni oya nɔ ni okpa be ni jeŋmaji lɛ fɛɛ baaná ale akɛ lɛ ji Yehowa lɛ gbɛ.​—Eze. 36:23; 38:23.

Wɔsɔlemɔ ji akɛ, Yehowa, wɔ-Tsɛ ni yɔɔ suɔmɔ lɛ ajɔɔ omɔdɛŋbɔɔ lɛ nɔ koni onu wolo ni ekɛ emumɔ lɛ tsirɛ gbalɔ Ezekiel ni eŋma lɛ shishi jogbaŋŋ.