Aaafee afii 70 eho kɛjɛ be ni Israelbii lɛ ku amɛsɛɛ kɛtee Yerusalem. Shi amɛteŋ mɛi komɛi yɛ Persia Nɔyeli lɛ hei srɔtoi lolo. Mɛi nɛɛ ateŋ mɔ kome ji Ezra. Ezra tsɔɔ mɛi Yehowa Mla lɛ. Be ko lɛ, enu akɛ mɛi ni eku amɛsɛɛ kɛtee Yerusalem lɛ yeee Mla lɛ nɔ. No hewɔ lɛ, ekpɛ eyiŋ akɛ ebaaya jɛmɛ ni ekɛ amɛ ayawie. Persia Maŋtsɛ Artashasta kɛɛ lɛ akɛ: ‘Nyɔŋmɔ ehã ohiɛ ekã shi bɔ ni afee ni otsɔɔ mɛi e-Mla lɛ. Yaa, bo kɛ mɛi fɛɛ ni miisumɔ ni amɛ kɛ bo aya lɛ.’ Ezra kɛ mɛi ni miitao amɛku amɛsɛɛ kɛya Yerusalem lɛ kpe. Amɛsɔle amɛbi Yehowa hebuu yɛ gbɛ kakadaŋŋ ni amɛyaafã lɛ nɔ, kɛkɛ ni amɛyi gbɛ.

Amɛye nyɔji ejwɛ yɛ gbɛ lɛ nɔ dani amɛyashɛ Yerusalem. Be ni amɛyashɛ lɛ, maŋ onukpai lɛ kɛɛ Ezra akɛ: ‘Israelbii lɛ egbo Yehowa nɔ toi ni amɛkɛ yei ni jáa amale nyɔŋmɔi ebote gbalashihilɛ mli.’ Ani ole nɔ ni Ezra fee yɛ sane nɛɛ he? Eho ekula shi yɛ mɛi lɛ fɛɛ ahiɛ, ni esɔle ekɛɛ Yehowa akɛ: ‘Yehowa, nibii ni ofee ohã wɔ lɛ fa waa, shi wɔfee esha wɔshi bo.’ Mɛi lɛ tsake amɛtsui, shi amɛtee nɔ amɛfee nibii komɛi ni ejaaa. Ezra hala onukpai kɛ kojolɔi ni amɛtsu naagba nɛɛ he nii. Yɛ nyɔji etɛ mli lɛ, ashwie mɛi fɛɛ ni jáaa Yehowa lɛ.

Enɛ sɛɛ afii 12 lɛ, Ezra bua mɛi lɛ fɛɛ anaa yɛ maŋ lɛ mli he ni maŋbii lɛ buaa amɛhe naa yɛ lɛ, ni ekane Nyɔŋmɔ Mla lɛ ehã amɛ. No beiaŋ lɛ, atswa Yerusalem gbogboi lɛ ekoŋŋ. Be ni Ezra gbele wolo lɛ naa lɛ, mɛi lɛ fɛɛ te shi amɛdamɔ shi. Ezra jie Yehowa yi, ni mɛi lɛ fɛɛ hole amɛniji anɔ kɛtsɔɔ akɛ amɛkpɛlɛɔ nɔ ni efee lɛ nɔ. No sɛɛ lɛ, ekane Mla lɛ ehã amɛ ni egbala mli. Maŋbii lɛ bo toi jogbaŋŋ. Amɛkpɛlɛ nɔ akɛ amɛje Yehowa sɛɛ ekoŋŋ, ni amɛfo waa. Enɔ jetsɛremɔ lɛ, Ezra tsa Mla lɛ kanemɔ nɔ. Maŋbii lɛ na yɛ Mla lɛ mli akɛ, etsɛŋ, ehe baahia ni amɛye Agbai Agbi Jurɔ lɛ. No hewɔ lɛ, amɛbɔi amɛhe saamɔ amrɔ nɔŋŋ kɛhã gbi jurɔ nɛɛ.

 Aye gbi jurɔ nɛɛ gbii kpawo, ni gbii kpawo lɛ fɛɛ lɛ, mɛi lɛ ná miishɛɛ ni amɛda Yehowa shi akɛ ehã amɛná niyenii pii. Agbai Agbi Jurɔ nɛɛ fee miishɛɛ fe eko fɛɛ eko ni aye kɛjɛ Yoshua yinɔ kɛyashi nakai beiaŋ. Gbi jurɔ lɛ sɛɛ lɛ, mɛi lɛ bua amɛhe naa ni amɛsɔle amɛkɛɛ: ‘Yehowa, bo ohere wɔ kɛjɛ nyɔŋyeli mli. Olɛ wɔ yɛ ŋa lɛ nɔ, ni ohã wɔ shikpɔŋ fɛfɛo nɛɛ. Shi wɔgbo onɔ toi shii abɔ. Otsu gbalɔi ní amɛkɛ wɔ abawie, shi wɔbooo toi. Loloolo lɛ, oná tsui ohã wɔ. Oye shi ni owo Abraham lɛ nɔ. Amrɔ nɛɛ, wɔmiiwo bo shi akɛ wɔbaabo bo toi.’ Amɛŋma amɛshiwoo lɛ amɛfɔ̃ shi, ni maŋ onukpai lɛ, Levibii lɛ, kɛ osɔfoi lɛ sɔo naa kɛ amɛnaasɔomɔnɔi.