Be ni Nebukadnezar mɔmɔ lumɛi lɛ kɛtee Babilon lɛ, ekɛ amɛ wo onukpa ko ni yɔɔ maŋtsɛ lɛ shĩa lɛ mli lɛ dɛŋ. Atsɛɔ nuu nɛɛ Ashpenaz. Nebukadnezar kɛɛ Ashpenaz akɛ etao oblahii lɛ ateŋ mɛi ni yɔɔ gbɔmɔtsoŋ hewalɛ kpakpa ni le nii hu. Abaatsɔse oblahii nɛɛ afii etɛ, koni amɛsɔmɔ akɛ maŋ onukpai yɛ Babilon. Abaatsɔɔ amɛ Akadia wiemɔ lɛ, ni ji wiemɔ ni awieɔ yɛ Babilon lɛ, ni amɛbaakase ekanemɔ kɛ eŋmaa. Kɛfata he lɛ, abaahã amɛ niyenii ni ahãa maŋtsɛ lɛ kɛ enukpai lɛ eko. Daniel, Hanania, Mishael, kɛ Azaria fata oblahii ni ahala kɛhã tsɔsemɔ nɛɛ ahe. Ashpenaz hã amɛ fɛɛ Babilonbii agbɛ́i. Ewo amɛ  Belteshazar, Shadrak, Meshak, kɛ Abednego. Ani tsɔsemɔ nɛɛ baahã oblahii ejwɛ nɛɛ akpa Yehowa sɔɔmɔ?

Oblahii ejwɛ lɛ tswa amɛfai shi akɛ amɛbaabo Yehowa toi. Amɛkpɛ amɛyiŋ akɛ amɛyeŋ maŋtsɛ lɛ niyenii lɛ, ejaakɛ Yehowa Mla lɛ kɛɛ ekomɛi ahe tseee. No hewɔ lɛ, amɛkɛɛ Ashpenaz akɛ: ‘Ofainɛ kaahã wɔ maŋtsɛ lɛ niyenii lɛ eko.’ Ashpenaz kɛɛ amɛ akɛ: ‘Kɛ́ nyɛyeee, ni maŋtsɛ lɛ na akɛ nyɛfee kanyakanya lɛ, ebaagbe mi!’

Shi Daniel kɛɛ mɔ ni kwɛɔ amɛnɔ lɛ akɛ: ‘Ofainɛ, hã wɔ tsei ayibii kɛ baji ni wɔye kɛ nu ni wɔnu gbii nyɔŋma. No sɛɛ lɛ, okɛ wɔ ato oblahii lɛ ni yeɔ maŋtsɛ lɛ niyenii lɛ ahe okwɛ.’ Mɔ ni kwɛɔ amɛnɔ lɛ kpɛlɛ nɔ.

Be ni gbii nyɔŋma lɛ ba naagbee lɛ, ana akɛ Daniel kɛ enanemɛi etɛ lɛ yɛ hewalɛ fe oblahii krokomɛi lɛ fɛɛ. Yehowa mii shɛ ehe waa akɛ amɛbo lɛ toi. Eduro Daniel hiɛshikamɔ koni ekɛtsɔɔ ninai kɛ lamɔi ashishi.

Be ni atsɔse oblahii lɛ agbe naa lɛ, Ashpenaz kɛ amɛ tee Nebukadnezar ŋɔɔ. Maŋtsɛ lɛ kɛ amɛ gba sane, ni ena akɛ Daniel, Hanania, Mishael, kɛ Azaria le nii ni amɛhiɛ kã shi fe oblahii krokomɛi lɛ fɛɛ. No hewɔ lɛ, ehã amɛtsu nii yɛ maŋtsɛ lɛ shĩa lɛ mli. Bei pii lɛ, maŋtsɛ lɛ biɔ amɛ ŋaawoo yɛ saji ni he hiaa ahe. Yehowa hã oblahii nɛɛ ahiɛ kã shi fe maŋtsɛ lɛ nilelɔi kɛ mɛi ni feɔ majik lɛ fɛɛ.

Eyɛ mli akɛ amɔ Daniel, Hanania, Mishael, kɛ Azaria kɛtee maŋ kroko nɔ moŋ, shi amɛhiɛ kpaaa nɔ akɛ Yehowa webii ji amɛ. Ani bo hu obaakai Yehowa kɛ́ ofɔlɔi bɛ omasɛi po?