Kɛjɛ fã nɛɛ nɔ kɛyaa lɛ, wɔbaasusu saji ni yɔɔ Kristofoi A-Greek Ŋmalɛ lɛ amli lɛ ahe. Yesu fɔlɔi jeee shikatsɛmɛi, ni amɛhi maŋ bibioo ko mli. Epapa tsu nii akɛ kapintafonyo, ni Yesu kɛ lɛ tsu nitsumɔ nɛɛ. Yesu ji mɔ ni agba akɛ ebaahere adesai ayiwala lɛ. Yehowa wó lɛ ŋwɛi Maŋtsɛyeli lɛ nɔ Maŋtsɛ. Kɛ́ fɔlɔ ji bo lɛ, ye obua obii lɛ ni amɛna akɛ, Yehowa susu Yesu he waa, no hewɔ lɛ, ehã afɔ lɛ awo weku ko ni sheɔ Nyɔŋmɔ gbeyei ni toiŋjɔlɛ yɔɔ mli lɛ mli. Yehowa bu Yesu he koni Herode akagbe lɛ, ni no hãa wɔnaa akɛ, nɔ ko nɔ ko nyɛŋ atsĩ Yehowa naa koni ekatsu eyiŋtoi ahe nii. Nyɔŋmɔ hã Yohane saa gbɛ ehã Yesu. Kasemɔ saji nɛɛ ni osusu he. Hã obii lɛ ana faŋŋ akɛ, kɛjɛ Yesu gbekɛbiiashi tɔ̃ɔ lɛ, ekɛ enifeemɔ tsɔɔ akɛ eesumɔ ni ekase Yehowa he nii koni ehiɛ akã shi.