Noa kɛ eweku lɛ kɛ kooloi lɛ bote adeka lɛ mli. Kɛkɛ ni Yehowa ŋa shinaa lɛ ni nugbɔ lɛ bɔi nɛmɔ. Nugbɔ lɛ nɛ aahu ni nu lɛ ha shikpɔŋ lɛ nɔ fɛɛ. Shi adeka lɛ eyaaa nu lɛ shishi. Ema nu lɛ hiɛ. Mɛi fɔji lɛ fɛɛ boteee adeka lɛ mli, no hewɔ lɛ amɛgboi. Shi Noa kɛ eweku lɛ gboiii. Amɛmii shɛ amɛhe waa akɛ amɛbo Yehowa toi.

Nugbɔ lɛ nɛ kɛjɛ leebi aahu kɛyashi gbɛkɛ gbii 40 sɔŋŋ, kɛkɛ ni ekpa. No sɛɛ lɛ, nu lɛ ba shi fiofio. Eba shi aahu ni adeka lɛ yama gɔji komɛi anɔ. Shi no mli fɛɛ lɛ, nu babaoo yɛ shikpɔŋ lɛ nɔ lolo, no hewɔ lɛ, Noa kɛ eweku lɛ nyɛɛɛ aje kpo yɛ adeka lɛ mli amrɔ nɔŋŋ.

Fiofio lɛ, nu lɛ fɛɛ gbi. Kɛkɛ ni Yehowa kɛɛ Noa kɛ eweku lɛ akɛ amɛbaanyɛ amɛje kpo yɛ adeka lɛ mli. No mli lɛ, amɛye afi kome kɛ sɛɛ yɛ adeka lɛ mli. Akɛni mɛi fɔji lɛ bɛ dɔŋŋ hewɔ lɛ, efee tamɔ nɔ ni je lɛ efee ehee. Amɛná miishɛɛ waa akɛ Yehowa ebaa amɛyi, no hewɔ lɛ, amɛshã afɔle amɛhã lɛ.

Yehowa hiɛ sɔ amɛ afɔleshãa lɛ. Ewo adesai ashi akɛ, ekɛ nu afua fiteŋ nibii fɛɛ ni yɔɔ shikpɔŋ lɛ nɔ lɛ dɔŋŋ. Ehã kwaabuɛtɛ loo rainbow ba ŋwɛi koni amɛna akɛ ebaaye shiwoo nɛɛ nɔ. No ji be klɛŋklɛŋ ni kwaabuɛtɛ ba ŋwɛi. Ani ona kwaabuɛtɛ dã?

Yehowa kɛɛ Noa kɛ eweku lɛ akɛ amɛfɔ ni shikpɔŋ lɛ nɔ ayi.