Be ni Adam kɛ Hawa shi Eden abɔɔ lɛ mli lɛ, amɛfɔ bii babaoo. Atsɛɔ amɛ klɛŋklɛŋ binuu lɛ Kain, ni atsɛɔ mɔ ni ji enyɔ lɛ Habel. Kain batsɔ okwaafonyo, ni Habel batsɔ tookwɛlɔ.

Gbi ko lɛ, Kain kɛ Habel shã afɔle amɛhã Yehowa. Afɔle ji nikeenii krɛdɛɛ ko. Yehowa sumɔ Habel afɔle lɛ he, shi esumɔɔɔ Kain nɔ lɛ. Enɛ hã Kain mli fu waa. Yehowa kɛ hiɛdɔɔ wie etsɔɔ Kain. Ekɛɛ lɛ akɛ emlifu lɛ baanyɛ ahã efee nɔ ko gbonyo. Shi Kain booo toi.

Kain kɛɛ Habel akɛ: ‘Hã wɔya ŋa lɛ mli.’ Be ni amɛtee lɛ, Kain kɛ nɔ ko tswa enyɛmi lɛ ni egbe lɛ. Mɛni Yehowa  fee Kain yɛ nɔ ni efee lɛ hewɔ? Yehowa gbala Kain toi. Eshwie lɛ kɛje eweku lɛ masɛi kɛtee he ko shɔŋŋ, ni ehãaa eku esɛɛ dɔŋŋ.

Mɛni wɔkaseɔ yɛ sane nɛɛ mli? Kɛ́ nibii eyaaa lɛ bɔ ni wɔsumɔɔ lɛ, wɔmli baanyɛ afu. Shi kɛji wɔna akɛ wɔmli efu, aloo mɔ ko na ni ebɔ wɔ kɔkɔ yɛ he lɛ, esa akɛ wɔjɔɔ wɔtsui he oya koni wɔkafee nɔ ko gbonyo.

Habel fee nɔ ni ja, ejaakɛ esumɔɔ Yehowa. No hewɔ lɛ, Yehowa baakai lɛ daa. Nyɔŋmɔ baatee lɛ shi kɛba wala mli ekoŋŋ yɛ Paradeiso lɛ mli.