Mose hi Midian afii 40. Ebote gbalashihilɛ mli, ni efɔ bii. Gbi ko be ni ekwɛɔ etoi lɛ yɛ Sinai Gɔŋ lɛ masɛi lɛ, ena nɔ ko ni hã enaa kpɛ ehe waa. Ena ni ŋmei tso ko miitso, shi tso lɛ eshãaa! Be ni Mose tsi ebɛŋkɛ koni ekwɛ nɔ hewɔ ni tso lɛ eshãaa lɛ, gbee ko jɛ ŋmei tso lɛ mli kɛɛ lɛ akɛ: ‘Mose! Kaatsi obɛŋkɛ dɔŋŋ. Jiemɔ otokotai lɛ, ejaakɛ he ni odamɔ lɛ yɛ krɔŋkrɔŋ.’ Yehowa ni kɛ Mose wie lɛ, ni etsɔ ŋwɛibɔfo ko nɔ efee nakai.

Mose she gbeyei, ni ekɛ enine tsĩ ehiɛ. Kɛkɛ ni Yehowa kɛɛ lɛ akɛ: ‘Mina naagbai ni Israelbii lɛ kɛkpeɔ lɛ. Majie amɛ kɛjɛ Ejiptbii lɛ adɛŋ, ni mikɛ amɛ baaya shikpɔŋ kpakpa nɔ. Bo obaanyiɛ amɛhiɛ kɛje Ejipt.’ Mose naa kpɛ ehe waa.

Mose bi akɛ: ‘Kɛ́ Israelbii lɛ bi mi akɛ, namɔ tsu mi lɛ, mɛni mikɛɛ amɛ?’ Nyɔŋmɔ hã lɛ hetoo akɛ: ‘Kɛɛmɔ amɛ akɛ, Yehowa, Abraham Nyɔŋmɔ lɛ kɛ Isak Nyɔŋmɔ lɛ kɛ Yakob Nyɔŋmɔ lɛ ji mɔ ni tsu bo.’ Mose bi ekoŋŋ akɛ: ‘Kɛji amɛbooo mi toi hu?’ No hewɔ lɛ, Yehowa fee okadi ko etsɔɔ Mose koni ena akɛ, ebaawa lɛ. Yehowa hã Mose shɛ etso lɛ efɔ̃ shikpɔŋ, kɛkɛ ni tso lɛ tsɔ onufu! Mose mɔ onufu lɛ lei mli, ni etsɔ tso ekoŋŋ. Yehowa kɛɛ lɛ akɛ: ‘Kɛ́ ofee okadi nɛɛ otsɔɔ amɛ lɛ, amɛbaana akɛ mi ji mɔ ni tsu bo.’

Mose jie enaa ekoŋŋ akɛ: ‘Mileee wiemɔ jogbaŋŋ.’ Yehowa wo lɛ shi akɛ: ‘Mahã onyɛmi Aaron kɛ bo aya koni ewa bo, ni matsɔɔ lɛ nɔ ni ewie.’ Enɛ hã Mose na faŋŋ akɛ, Yehowa baaye abua lɛ. No hewɔ lɛ, ekɛ eŋa kɛ ebihii lɛ shi kɛtee Ejipt.