MILE akɛ okɛ mi baakpã gbee akɛ mɛi krokomɛi anɔ kwɔlɔ, loo amɛdara ni amɛhe wa fe mi kɛ bo. Namɔ obaakɛɛ akɛ enɔ kwɔ fe wɔ lɛ?— Lɛ ji Yehowa Nyɔŋmɔ. Ni e-Bi, Tsɔɔlɔ Kpele lɛ hu? Ani enɔ kwɔ fe wɔ?— Hɛɛ, enɔ kwɔ fe wɔ.

Yesu kɛ Nyɔŋmɔ ehi ŋwɛi. Mumɔŋ Bi, loo ŋwɛibɔfo ji lɛ. Ani Nyɔŋmɔ bɔ ŋwɛibɔfoi krokomɛi, loo mumɔŋ bii?— Hɛɛ, ebɔ amɛteŋ akpekpei abɔ. Nɛkɛ ŋwɛibɔfoi nɛɛ hu anɔ kwɔlɔ ni amɛhe wa waa fe wɔ.—Lala 104:4; Daniel 7:10.

Ani okaiɔ ŋwɛibɔfo ni wie etsɔɔ Maria lɛ gbɛi?— Gabriel ni. Ekɛɛ Maria akɛ ebinuu lɛ baatsɔ Nyɔŋmɔ Bi. Nyɔŋmɔ kɛ emumɔŋ Bi lɛ wala wo Maria musuŋ koni anyɛ afɔ Yesu akɛ abifao yɛ shikpɔŋ nɔ.—Luka 1:26, 27.

Ani oheɔ nakai naakpɛɛ nii lɛ oyeɔ? Ani oheɔ oyeɔ akɛ Yesu kɛ Nyɔŋmɔ ehi ŋwɛi pɛŋ?— Yesu kɛɛ akɛ nakai eji. Te fee tɛŋŋ ni Yesu le nɛkɛ nibii nɛɛ? Ojogbaŋŋ, ekolɛ be mli ni Yesu ji gbekɛ nuu lɛ mli ni Maria kɛɛ lɛ nɔ ni Gabriel wie lɛ. Ekolɛ Yosef hu kɛɛ Yesu akɛ e-Tsɛ diɛŋtsɛ ji Nyɔŋmɔ.

Beni abaptisi Yesu lɛ, Nyɔŋmɔ po wie kɛjɛ ŋwɛi akɛ: “Mɔnɛ ji misuɔmɔ bi” lɛ. (Mateo 3:17) Ni gbi gbɛkɛ dani Yesu baagbo lɛ, esɔle  akɛ: “Ni agbɛnɛ, Ataa, ŋɔɔ anunyam ni miyɔɔ yɛ oŋɔɔ dani je lɛ yɔɔ lɛ owo mihiɛ nyam.” (Yohane 17:5) Hɛɛ, Yesu bi koni akɛ lɛ aya koni ekɛ Nyɔŋmɔ ayahi ŋwɛi ekoŋŋ. Te ebaafee tɛŋŋ ehi jɛmɛ?— Kɛtsɔ mumɔŋ gbɔmɔ ni anaaa lɛ, loo ŋwɛibɔfo ni Yehowa Nyɔŋmɔ baaha etsɔ ekoŋŋ lɛ pɛ nɔ.

Agbɛnɛ miisumɔ ni mabi bo sane ko ni he hiaa. Ani ŋwɛibɔfoi lɛ fɛɛ hi? Te osusuɔ tɛŋŋ?— Ojogbaŋŋ, be ko ni eho lɛ, amɛ fɛɛ amɛhi. Ejaakɛ Yehowa bɔ amɛ fɛɛ, ni nɔ fɛɛ nɔ ni efeɔ lɛ hi. Shi, kɛkɛ ni ŋwɛibɔfoi lɛ ateŋ mɔ kome batsɔ mɔ fɔŋ. Te fee tɛŋŋ ni eba lɛ nakai hu?

Kɛha hetoo lɛ, esa akɛ wɔgbala wɔjwɛŋmɔ kɛya be mli ni Nyɔŋmɔ bɔ klɛŋklɛŋ nuu kɛ yoo ni ji Adam kɛ Hawa lɛ nɔ. Mɛi komɛi kɛɔ akɛ amɛhe sane lɛ ji adesã ko kɛkɛ. Shi Tsɔɔlɔ Kpele lɛ le akɛ eji anɔkwale.

Beni Nyɔŋmɔ bɔ Adam kɛ Hawa lɛ, ekɛ amɛ to abɔɔ fɛfɛo ko mli yɛ he ko ni atsɛɔ jɛmɛ akɛ Eden. Eji trom ko, paradeiso ko. Kulɛ amɛbaanyɛ amɛfɔ bii babaoo, ni amɛtsɔ weku ni da, ni amɛhi Paradeiso kɛya naanɔ. Shi nikasemɔ ko yɛ ni ehe miihia ni amɛkase. Eji nɔ ko ni wɔwie he momo. Nyɛhaa wɔkwɛa akɛ wɔkaiɔ lo.

 Yehowa kɛɛ Adam kɛ Hawa akɛ amɛbaanyɛ amɛye aduawai fɛɛ ni tsei ni yɔɔ abɔɔ lɛ mli lɛ woɔ lɛ anɔ yibii lɛ eko. Shi tso kome ko yɛ ni esaaa akɛ amɛyeɔ enɔ yibii lɛ eko. Nyɔŋmɔ kɛɛ amɛ nɔ ni baaba kɛji akɛ amɛye eko. Ekɛɛ akɛ: ‘Gboimɔ nyɛaagboi.’ (1 Mose 2:17) No hewɔ lɛ, mɛni ji nii ni esa akɛ Adam kɛ Hawa akase lɛ?—

No ji ni akase toiboo. Hɛɛ, wala damɔ toiboo ni amɛaafee amɛha Yehowa Nyɔŋmɔ lɛ nɔ! Efaaa kɛkɛ akɛ Adam kɛ Hawa aaakɛɛ akɛ amɛbaabo lɛ toi. Esa akɛ amɛtsɔ nibii ni amɛbaafee lɛ nɔ amɛtsɔɔ akɛ amɛbaafee nakai. Eji amɛbo Nyɔŋmɔ toi kulɛ, amɛbaatsɔɔ akɛ amɛsumɔɔ lɛ, ni amɛmiisumɔ ni efee amɛ-Nɔyelɔ. Kɛkɛ lɛ, amɛbaahi shi kɛya naanɔ yɛ Paradeiso. Shi kɛji akɛ amɛye tso lɛ yibii lɛ eko lɛ, mɛni no baatsɔɔ?—

Ebaatsɔɔ akɛ amɛhiɛ esɔɔɔ nɔ ni Nyɔŋmɔ kɛha amɛ lɛ diɛŋtsɛ. Eji oyɛ jɛmɛ kulɛ, ani obaabo Yehowa toi?— Klɛŋklɛŋ lɛ, Adam kɛ Hawa fee nakai. Shi mɔ ko ni nɔ kwɔ fe amɛ laka Hawa. Eha etsɔ mɔ ni booo Yehowa toi. Namɔ ni?—

 Biblia lɛ kɛɔ akɛ onufu ko wie etsɔɔ Hawa. Shi ole akɛ onufu diɛŋtsɛ nyɛŋ ni ewie. No hewɔ lɛ te efee tɛŋŋ ni enyɛ ewie mɔ?— Ŋwɛibɔfo ko ha efee tamɔ nɔ ni onufu lɛ miiwie. Shi ŋwɛibɔfo lɛ diɛŋtsɛ moŋ wieɔ lɛ. Ŋwɛibɔfo lɛ eje shishi eesusu nibii fɔji ahe. Eetao ni Adam kɛ Hawa ajá lɛ. Eesumɔ ni amɛfee nibii ni ebaakɛɛ amɛ lɛ. Eesumɔ ni ebaye Nyɔŋmɔ gbɛhe lɛ.

No hewɔ lɛ, nakai ŋwɛibɔfo fɔŋ lɛ kɛ susumɔi fɔji wo Hawa jwɛŋmɔ mli. Etsɔ onufu lɛ nɔ ekɛɛ lɛ akɛ: ‘Nyɔŋmɔ ekɛɛɛ bo anɔkwale lɛ. Kɛji akɛ oye nakai tso lɛ nɔ yibii lɛ eko lɛ ogboŋ. Obaale nii tamɔ Nyɔŋmɔ.’ Eji bo ni kulɛ, ani obaahe nɔ ni gbee lɛ kɛɛ lɛ oye?—

Hawa je shishi etao nɔ ko ni Nyɔŋmɔ kɛhako lɛ. Eye tso ni agu enɔ yibii lɛ yeli lɛ eko. Kɛkɛ ni ekɛ eko ha Adam. Adam heee nɔ ni onufu lɛ wie lɛ eyeee. Shi bɔ ni eshweɔ ni ekɛ Hawa ahi shi lɛ mli wa fe suɔmɔ ni eyɔɔ kɛha Nyɔŋmɔ lɛ. No hewɔ lɛ, lɛ hu eye tso lɛ nɔ yibii lɛ eko.—1 Mose 3:1-6; 1 Timoteo 2:14.

Mɛni jɛ mli ba?— Adam kɛ Hawa batsɔmɔ mɛi ni yeee emuu, amɛgbɔlɔ, ni amɛgboi. Ni akɛni amɛyeee emuu hewɔ lɛ, amɛbii lɛ fɛɛ hu bafee mɛi ni yeee emuu, ni yɛ naagbee lɛ amɛgbɔlɔ ni amɛgboi.  Nyɔŋmɔ maleko! Wala damɔ toiboo ni aaaya nɔ afee aha lɛ lɛ nɔ diɛŋtsɛ. (Romabii 5:12) Biblia lɛ kɛɔ wɔ akɛ atsɛɔ ŋwɛibɔfo ni male etsɔɔ Hawa lɛ akɛ Satan Abonsam, ni atsɛɔ ŋwɛibɔfoi krokomɛi ni bafee efɔŋ lɛ akɛ daimonioi.—Yakobo 2:19; Kpojiemɔ 12:9.

Agbɛnɛ, ani obaanyɛ onu nɔ hewɔ ni ŋwɛibɔfo kpakpa ni Nyɔŋmɔ bɔ lɛ lɛ batsɔ mɔ fɔŋ lɛ shishi?— No ji akɛ eje shishi esusu nibii fɔji ahe. Eesumɔ ni etsɔ Mɔ ni Baa Klɛŋklɛŋ. Ele akɛ Nyɔŋmɔ ekɛɛ Adam kɛ Hawa akɛ amɛfɔ, ni eetao ni amɛ fɛɛ amɛjá lɛ. Abonsam miisumɔ ni eha mɔ fɛɛ mɔ atsɔ mɔ ni booo Yehowa toi. No hewɔ lɛ, ebɔɔ mɔdɛŋ ni ekɛ susumɔi gbohii awo wɔjwɛŋmɔ mli.—Yakobo 1:13-15.

Abonsam kɛɔ akɛ mɔ ko mɔ ko sumɔɔɔ Yehowa diɛŋtsɛ. Ekɛɔ akɛ bo kɛ mi fɛɛ sumɔɔɔ Nyɔŋmɔ, ni akɛ wɔsumɔɔɔ ni wɔfee nɔ ni Nyɔŋmɔ kɛɔ lɛ diɛŋtsɛ. Ekɛɔ akɛ, be mli ni nɔ fɛɛ nɔ yaa nɔ jogbaŋŋ kɛhaa wɔ lɛ, no mli pɛ wɔboɔ Yehowa toi. Ani nɔ ni Abonsam wieɔ lɛ ja? Ani nakai wɔji?

Tsɔɔlɔ Kpele lɛ kɛɛ amalelɔ ji Abonsam! Yesu tsɔɔ diɛŋtsɛ akɛ esumɔɔ Yehowa kɛtsɔ toiboo ni efee kɛha Lɛ lɛ nɔ. Ni Yesu bo Nyɔŋmɔ toi jeee yɛ be mli ni nibii ehi kɛha lɛ lɛ pɛ. Efee nakai be fɛɛ be, yɛ be mli ni gbɔmɛi haa nibii amli waa kɛhaa lɛ lɛ po. Eye Yehowa anɔkwa kɛyashi egbele mli. No hewɔ ni Nyɔŋmɔ kɛ lɛ ba wala mli koni ebahi shi kɛya naanɔ lɛ.

No hewɔ lɛ, namɔ obaakɛɛ akɛ lɛ ji wɔ henyɛlɔ ni fe fɛɛ?— Hɛɛ, lɛ ji Satan Abonsam. Ani obaanyɛ ona lɛ?— Dabi! Shi wɔle akɛ eyɛ, ni akɛ enɔ kwɔ ni eyɛ hewalɛ waa fe wɔ. Ni kɛlɛ, namɔ nɔ kwɔ fe Abonsam?— Lɛ ji Yehowa Nyɔŋmɔ. No hewɔ lɛ, wɔle akɛ Nyɔŋmɔ baanyɛ abu wɔhe.