Satan miisumɔ ni okɛ ohe awo ŋkunyaayeli nifeemɔ mli. Mɛi pii shãa afɔlei amɛhaa amɛ blematsɛmɛi loo mumɔi koni amɛkɛbu amɛhe kɛjɛ efɔŋ ni aaaba amɛnɔ lɛ he. Amɛfeɔ enɛ ejaakɛ amɛsheɔ hewalɛi ni jɛ mumɔi aje lɛ mli lɛ gbeyei. Amɛwoɔ ŋkunyaayeli gai loo nineshi gai. Amɛnuɔ “tsofai” ni akɛɛ ehiɛ ŋkunyaayeli hewalɛ loo amɛkɛkpaa amɛgbɔmɔtsei ahe. Mɛi komɛi kɛ nibii komɛi ni amɛheɔ amɛyeɔ akɛ amɛhiɛ hewalɛi ni buɔ mɔ he toɔ amɛshiai amli loo amɛtsaa shi ni amɛfuɔ. Mɛi krokomɛi kɛ ŋkunyaayeli “tsofa” tsuɔ nii ejaakɛ amɛheɔ amɛyeɔ akɛ ebaaha amɛye omanye yɛ nitsumɔ mli, yɛ skul kaai amli, loo yɛ nyiɛmɔ ni tsɔɔ gbalashihilɛ hiɛ lɛ mli.

Ohebuu nɔ̃ ni hi fe fɛɛ kɛmiijɛ Satan dɛŋ ji ni oná Yehowa akɛ onaanyo. Yehowa Nyɔŋmɔ kɛ eŋwɛibɔfoi lɛ ahe wa kwraa fe Satan kɛ edaimonioi lɛ. (Yakobo 2:19; Kpojiemɔ 12:9) Yehowa miisumɔ waa ni ejie ehewalɛ kpo yɛ enanemɛi​—mɛi ni yeɔ lɛ anɔkwa kɛmɔɔ shi lɛ ahe.​—2 Kronika 16:9.

Nyɔŋmɔ Wiemɔ lɛ kɛɔ akɛ: “Nyɛkayea ŋkunyaa.” Yehowa buɔ ŋkunyaayeli kɛ ayɛkpɛmɔ fɔ ejaakɛ nakai nifeemɔi lɛ kɛ mɔ woɔ Satan Abonsam hewalɛ shishi tɛ̃ɛ.​—3 Mose 19:26.