Yehowa eŋmɛŋ gbɔmɛi fɔji agbɛ ni amɛfite Paradeiso. Enanemɛi pɛ baahi jɛmɛ. Mɛni baaba gbɔmɛi fɔji anɔ? Bɔni afee ni ole hetoo lɛ, susumɔ Noa he sane ni ji anɔkwale lɛ he okwɛ. Noa hi shi afii akpei abɔ ni eho nɛ. Eji gbɔmɔ kpakpa ni ebɔ mɔdɛŋ ni efee Yehowa suɔmɔnaa nii be fɛɛ be. Shi gbɔmɛi krokomɛi ni yɔɔ shikpɔŋ nɔ lɛ fee nibii fɔji. No hewɔ lɛ, Yehowa kɛɛ Noa akɛ E-kɛ nu afua baaba koni ekɛbakpata nakai gbɔmɛi yiwalɔi lɛ fɛɛ ahiɛ. Ekɛɛ Noa akɛ ekpɛ adeka koni lɛ kɛ eweku lɛ akagboi kɛ́ Nu Afua lɛ ba.—1 Mose 6:9-18.

Noa kɛ eweku lɛ kpɛ adeka lɛ. Noa bɔ gbɔmɛi lɛ kɔkɔ akɛ Nu Afua lɛ miiba, shi amɛbooo lɛ toi. Amɛtee nɔ amɛfee nibii fɔji. Beni agbe adeka lɛ naa lɛ, Noa ŋɔ kooloi kɛtee adeka lɛ mli, ni lɛ kɛ eweku lɛ hu tee mli. Kɛkɛ ni Yehowa kɛ ahum kpeteŋkpele ko ba. Nugbɔ nɛ shwaneshwane kɛ nyɔɔŋnyɔɔŋ gbii 40. Nu lɛ hà shikpɔŋ lɛ fɛɛ nɔ.—1 Mose 7:7-12.

 Gbɔmɛi fɔji lɛ gboi, shi ahere Noa kɛ eweku lɛ yiwala. Yehowa kɛ amɛ tsɔ Nu Afua lɛ mli shweshweeshwe kɛba shikpɔŋ ni ajie efɔŋfeemɔ fɛɛ kɛjɛ nɔ lɛ nɔ. (1 Mose 7:22, 23) Biblia lɛ kɛɔ akɛ shikome ekoŋŋ lɛ be lɛ miiba ni Yehowa baakpata mɛi ni sumɔɔɔ ni amɛfeɔ nɔ ni ja lɛ ahiɛ ekoŋŋ. Akpataŋ gbɔmɛi kpakpai lɛ ahiɛ. Amɛbaahi shi kɛya naanɔ yɛ Paradeiso shikpɔŋ lɛ nɔ.—2 Petro 2:5, 6, 9.

Gbɔmɛi babaoo feɔ nibii fɔji ŋmɛnɛ. Haomɔ eyi je lɛ mli obɔ. Yehowa tsuɔ e-Dasefoi lɛ shii abɔ koni amɛyabɔ gbɔmɛi lɛ kɔkɔ, kɛlɛ amɛteŋ mɛi ni fa sumɔɔɔ ni amɛboɔ Yehowa wiemɔi lɛ atoi. Amɛsumɔɔɔ ni amɛtsakeɔ amɛshihilɛ gbɛ̀i lɛ. Amɛsumɔɔɔ ni amɛkpɛlɛɔ nɔ ni Nyɔŋmɔ kɛɔ yɛ nɔ ni ja kɛ nɔ ni ejaaa he lɛ nɔ. Mɛni baaba nɛkɛ gbɔmɛi nɛɛ anɔ? Ani amɛbaatsake gbi ko? Mɛi pii tsakeŋ kɔkɔɔkɔ. Be miiba ni abaakpata gbɔmɛi fɔji lɛ ahiɛ ni amɛhiŋ shi dɔŋŋ.—Lala 92:8.

Akpataŋ shikpɔŋ lɛ hiɛ; abaafee lɛ paradeiso. Mɛi ni batsɔmɔɔ Nyɔŋmɔ nanemɛi lɛ baahi shi kɛya naanɔ yɛ Paradeiso lɛ mli yɛ shikpɔŋ nɔ.—Lala 37:29.