Nyɔŋmɔ miisumɔ ni obatsɔ enaanyo. Ani osusu Mɔ ni fe mɔ fɛɛ mɔ yɛ jeŋ muu fɛɛ lɛ ni ooonyɛ otsɔ enaanyo lɛ he pɛŋ? Atsɛ́ Abraham, ni hi shi jeeŋmɔ ko lɛ akɛ Nyɔŋmɔ naanyo. (Yakobo 2:23) Mɛi krokomɛi ni awie amɛhe yɛ Biblia lɛ mli lɛ hu ná Nyɔŋmɔ kɛ naanyobɔɔ mli ŋɔɔmɔ ni ajɔɔ amɛ babaoo. Ŋmɛnɛ, gbɔmɛi ni jɛ shikpɔŋ lɛ nɔ hei srɔtoi fɛɛ ebatsɔmɔ Nyɔŋmɔ nanemɛi. Bo hu obaanyɛ otsɔ Nyɔŋmɔ naanyo.

Nyɔŋmɔ naanyo ní oootsɔ lɛ hi fe adesa fɛɛ adesa naanyo ní oootsɔ. Nyɔŋmɔ haaa enanemɛi anɔkwafoi lɛ ahiɛnɔkamɔ afee efolo kɔkɔɔkɔ. (Lala 18:27) Nyɔŋmɔ naanyo ni oji lɛ hi fe ninámɔ. Kɛji akɛ niiatsɛ gbo lɛ, eshika lɛ yajeɔ mɛi krokomɛi adɛŋ. Yɛ no najiaŋ lɛ, mɛi ni náa amɛkɛ Nyɔŋmɔ teŋ naanyobɔɔ mli ŋɔɔmɔ lɛ yɛ jwetri ko ni mɔ ko mɔ ko nyɛŋ aŋɔ kɛya.​—Mateo 6:19.

Ekolɛ mɛi komɛi baabɔ mɔdɛŋ ni amɛtsĩ bo gbɛ koni okakase Nyɔŋmɔ he nii. Onanemɛi kɛ oweku lɛ mli bii po baanyɛ afee nakai. (Mateo 10:36, 37) Kɛji akɛ mɛi komɛi ŋmɔ bo aloo amɛwo ohe gbeyei lɛ, bi ohe akɛ, ‘Namɔ hiɛ misumɔɔ ni masa—adesai aloo Nyɔŋmɔ?’ Susumɔ enɛ he okwɛ: Kɛji akɛ mɔ ko kɛɛ bo akɛ okaye nii lɛ, ani obaabo lɛ toi? Dabi kwraa! Niyenii he miihia bo koni ohi wala mli. Shi Nyɔŋmɔ baanyɛ aha ohi shi kɛya naanɔ! No hewɔ lɛ, kaaha mɔ ko miitsĩ bo gbɛ yɛ bɔ ni ooofee okase Nyɔŋmɔ naanyo ni oootsɔ lɛ he.​—Yohane 17:3.